مشاهدة النسخة كاملة : حازي يا بت حازي .... رواية ملهاش حل


الدكتورة مها
10-09-2008, 05:23 PM
بسم الله الرحمن الرحيم


القصة دي بتمثل 15 مليون بنت واللي بيضغط عليهم المجتمع علشان يتجوزو هم مش بأديهم انهم لسه قاعدين

ده اللي حصل في يوم من الايام الكتيره اللي بتمر بيها البنات

وبعدين في بداية اليوم ده .... نزلت من البيت زي كل يوم وركبت ورايحة علي شغلي اللي حصل بئي ايييييييييه؟؟؟

انا داخلة الصيدلية الصبح لا بيا ولا عليا ألاقيلكم شوية مناظر غريبة الشكل..مين دول؟:confused::confused: ..ركزت شوية و بحلقت و بقللت عينيا ..إيييه ده؟ :eek::eek: البنات شكلها مزهزه كده و الصيدلية على سنجة عشرة ..ده حتى العيانين على غير العادة شكلهم جايين غاسلين وشهم ..

عرررق نظرية المؤااامرة بدأ ينقح في نفوخي و مستقبلات دقات الندالة اتفتحت في جميع أنحاء مخي...يمكن تفتيش :confused::confused:؟..يمكن؟..لااااا ده مايفسرش كميات الماكياج المهولة اللي محطوطة على الوشوش ..دي لو اتجمعت كلها تطلعلها 2 طن ..دا البنات قربوا يطلعلهم أتب في ضهورهم من تقل اللي محطوط على وشوشهم..لأ لأ:mad::mad:..فيه مؤامرة تحاك في الظلام خلف ظهري..و أنا لما اتكلم نحوي (على أساسا ان ده نحوي يعني) تعرفوا ان الخطب جلل(حلوة مش كده؟:D:D)..

إتمشيت شوية في الصيدلية كل اما عيني تيجي في عين واحدة تبعد راسها بعيد و تعمل إن حاجة وقعت منها تحت المكتب و تنزل و تغيب..أقوم أبص عليها ألاقيها مستربعة ع الأرض و مطلعة الروج و الأيلاينر و شغااالة :rolleyes::rolleyes:


طب مابدهاش بأه..طلعت أنا كمان أدوات الكفاح و إبتديت مشوار التظبيط و انتوا عارفين مشوار التظبيط يبتدي بنقطة..أيلاينر بأه .آي شادو..أهو اللي يقدرني عليه ربنا..مش فاهمه حاجة آه..لكن مش هابقى أنا الكلوب المطفي وسطيهم يعني


شوية و لقيتلكم المديرة بتاعتي داخلة و جره وراها واحدة شكلها ماريحنيش..آااااااه :D:D...فهمت فهمت..دي شكلها أم عريس:p:p..أيوة أيوة هما بيبانوا..تلاقي الست كده مستحمية ولابسه اللي ع الحبل و حاطة فاترينة دهب في أي مكان يسمح بده. .او مايسمحش.. عشان تزغلل عينينا و تتمنظر على اللي خلفونا..ماعلينا ..بس الست شكلها حلو كده و أرستكراطي (آه بالكاف..شوية رقة دي أم عريس ;))..فاضلها القميص البنبي أبو ريش و تبقى حتة من رجاء الجداوي في فيلم "في بيتنا رجل" ..كانت تحفة في الفيلم ده..سيبت أنا كل التفاصيل دي ..ماتهمنيش..وركزت في الجزمة دي..يا جدعان مش باشتمها..لسه المرحلة دي قدام..انا قصدي جزمة ام العريس :D.. سيبكوا بأه من الناس اللي بيقولولكم الراجل بيبان من جزمته..ماتصدقوش..من خلال خبرتي الحياتية الطويييييلة ..أحب أقولكم إن الراجل بيبان من جزمة أمه..جربوها كده و هتلاقوها طريقة ماتخرش الورنيش;)


الست قعدت هي و المديرة و احنا ماتعرفوناش..ماتعرفوناش حقيقي يعني..سبحان الله ..كل قوانين الفيزيا و الأحياء و الوراثة و حتى الجنح بتتكسر في اللحظة دي :)..الوشوش القديمة بتتطبق و تتفرش وجوه جديدة لانج..اللي عينيها بتوسع و اللي بقها بيصغر و اللي بتبيض..بيصعبوا عليا قوي الرجالة تاني يوم الجواز..يوم الصباحية بعد العروسة مابتغسل وشها..إحنا عندنا عنبر جلطات كامل في المستشفى لضحايا الموضوع ده..ماعلينا..المهم بدأت المديرة تتكلم


صباح الخير يا بنات..أعرفكم بمدام سعاد..هي..أأأ..هاتسألكم على حاجة كده..بخصوص الأدوية


و في ثواني كان طابور العرض مصفوف..انا في الأول كرامتي وجعتني..بأه أنا على آخر الزمن أقف مرصوصة كده في طابور ولا طابور الجمعية..بس اشمعنى أنا يعني..و انا أقعد كده و أسيب العيال ياكلوا الجو..قومت و جريت و أخدت مكاني..عادي يعني أنا مافيش في دماغي حاجة أنا قلت بس مشاركة و جدانية يعني..و بعدين طابور العرض ده مش جديد يعني..ياما حصل و ياما هيحصل ..و بعدين ده شئ مهم جدا في حياة البنات زيه زي كشف الهيئة في الكليات العسكرية يا إما يركبك طيارة و تطلع للسما يا إما يركبك توك توك و تتكل على بيتكم



أيوة يا طونط..أي خدمة؟
أؤمري حضرتك ..عايزة تسألي عن إيه؟
قطن..شاش..ميكروكروم؟
قلب..سكر..كبد..مخ..طحال..اللي يعجبك؟


الست لفت عينيها في وشوشنا شوية كده و سألتنا بطريقة ماما سامية في برنامج الأطفال الهادف عروستي
مين فيكوا يا حلوين بتعرف تعمل بصارااااه؟


بصينا لبعض بامتعاض مشوب بالإستنكار
بصارة؟ :eek::eek::eek::eek::eek:


و فجأة كل واحدة رجعت لقواعدها و كل الوشوش رجعت لقوالبها
بصارة؟..أخرتها بصارة؟
لا يا خالتي غلطتي في العنوان
ده يا ماما مش قسم البصارة ..إحنا تخصص عدس بجبة


كلهم أخدوا الموضوع وش كده ورجعوا أماكنهم إلا أنا و نيفين(غريمتي الجديدة و اللي أخدت مكان نهى)..أنا شخصيا ماهضمتهاش..إزاي يعني؟..لألأ ..الموضوع فيه إنه ..الست جزمتها بتلمع و زي الفل..دي مش جزمة واحدة تسأل عن البصارة لأ..الصوت كده مش راكب ع الصورة
..ده مش منظر واحدة ميح و لا حتى جلدة..برضه نيفين واقفة جنبي في الطابور اللي ماعادش فيه غيري أنا و هي..واقفة و هي تزوي مابين حاجبيها(أنا مالي ..دي هي)..و فجأة لقيت البت عينيها نورت زي ماتكون الأخ نيوتن ووقعت فوق راسها تفاحة..و فجأة سمعت صوت غريب بيخرج من بقها ..أرق صوت سمعتوه في حياتكم مايجيش جنبه حاجة و قالت و هي بتمسك إيديها ببعض قدامها زي فيروز في فيلم "معانا ريال"
يعني إيه يا طونط بصارة؟


الست فجأة وقفت و في عينيها فرحة زي ماتكون كسبت عمرة من إيريال


إنتي يا حبيبتشي ماتعرفيش يعني إيه بصارة؟..تبقي بنت عز..هي دي ..هي دي اللي أنا عايزاها
يا بنت اللععععييييبة؟


البنات كلهم لفوا و على وشهم تعبير كأنهم لسه شاريين إزازة زيت من أم 10 جنيه إلا ربع
يخرب بييييييتك


الست صحيح أروبة ..بس عادي يعني دي حماة و الحموات مرفوع عنهم القلم..لكن البت نيفين يطلع منها كل ده؟..دي أكيد دمها فيه كرات بيضا و كرات حمرا و صفائح دموية مليانة كهن على أخرها..الست ماصدقت وراحت واخدة البنت تحت باطها و خارجين و احنا واقفين نبص لبعض و سامعينها بتسألها
و انتي يا حبيبتي دفعة كام؟


ترد عليها المضروبة بصوت سوسن بدر في سلام يا صاحبي (رقة رقة يعني)
2006


كمان..طب و النبي لأنا مبلغة عنك دفعة 99 كلها تيجي تقيم عليكي الحد


الكل قعد في مكانه و بيبصوا لبعض و هما مش مستوعبين
لكن أنا تكالبت على جراحي (مش باقولكم الموضوع كبير)..و طلعت في الخفاء أجندتي السماوي (سماوي من لونها و على أساس يبقى منها لباب السما) و كتبت فيا ..الطريقة رقم 504 تكييف..الإستعباط و الإستهبال في كل من تاريخ التخرج و محتويات حلل المطبخ..صحيح ان الطرق الموجودة في الأجندة كلها مانفعتنيش بحاجة لكن "على المرء أن يسعى و ليس عليه إدراك النجاح"..


و فضلنا نهري و ننكت في نفسيتنا ..و مافرقش معانا حتى لما البت نيفين رجعت و هي تجر أذيال الخيبة بعد ماعرفت ان العريس شغال بانتيير في فرنسا..يعني نقاش عقبال أملتكم و تقريبا جاي ياخدها سقالة..معلش أصل الدنيا كده زي "الحضري" يوم ترقصلك و يوم تقلبك و تديك بومبة.


أنا بأه رجعت البيت و ناوية أعمل مع ماما خناقة لرب السما..إزاي ماتوعينيش على حوار البصارة ده؟..ده تهريج..ده تسيب..دي قلة وعي..ده من أساسيات التربية الحديثة..و لو ماما ماعلمتنيش أجيب مين يعلمني يعني..طنط حشرية؟



طلعت فوق السطوح هز الهوا كمي كل البنات اتجوزت وانا اعده جنب امي ...هههههههههههه

علي فكرة وللحديث بقية لو عاوزين الباقي قلوللي

اتمني انها تعجبكو ؟؟؟

nour eljannah
10-09-2008, 05:36 PM
هههههههههههههههههههههههههههههههههههههههههه


بجد بجد فظيعه
انا مت من الضحك

كمليهاااااااااااااااااااااا بليييييييييييييييييييييييييييييز

رقه رقه يعني هههههههههههه


بجد حلوه موت مش قادره امسك نفسي من الضحك


كمليها بقي يلاااااااااااااااااااااااااا


ميرسي جدا ليكي ضحكتيني وانا كنت مكتئبه ههههههههه

الدكتورة مها
10-09-2008, 06:55 PM
أهلا بيكي يا قمراية المنتدى

وفرحانة جدا انى قدرت اضحكك بالطريقة دي

ومن عيوني حاضر ..... هتلاقي بقية القصة عندك

ومرة تانية

نورتيني بردك الجميل

نور الإيمان
10-09-2008, 06:58 PM
ههههههههههههههههههههههه
هاهاهاهاهاهاهاه:)
اhhhhhhh
هىهىهىهى:)
ههههه:)
ههه
شكراااااااااااااااا لك أنا مبطلتش ضحك وانا بقرأ.:):)

امانى
10-09-2008, 08:20 PM
ههههههههههههه رووووووووووووووووووووعه بجد و اسلوبك عجبنى جدا جدا ننتظر المزيد..وشكراااااااااا

القيثارة
10-09-2008, 08:39 PM
بجد حلوة قوي
اسلوبك وخفة ظلك بيجننوا
انا مستنية البقية
ما تبخليش علينا بيها
وشكرا ع حوار البصارة
ايوة
حلوة قوووى حملة التوعية دى
وهنعتبر البصارة هى الدرس
الاول
مستنين الدرس التانى

الدكتورة مها
10-09-2008, 09:35 PM
ههههههههههههههههههههههه

هاهاهاهاهاهاهاه:)
اhhhhhhh
هىهىهىهى:)
ههههه:)
ههه

شكراااااااااااااااا لك أنا مبطلتش ضحك وانا بقرأ.:):)



انا ضحكت على ضحكك اكتر من ضحكي على الرواية

نورتي يا نور الايمان

وباذن الله باقي الحلقات تعجبك

الدكتورة مها
10-09-2008, 09:36 PM
ههههههههههههه رووووووووووووووووووووعه بجد و اسلوبك عجبنى جدا جدا ننتظر المزيد..وشكراااااااااا


انتى اللى روعة

وردك اروع

وعلى فكرة اليوميات دي منقولة عن رواية لكاتبة لا اذكر اسمها

ولكن

هذه اليويمات موجودة فى منتديات كتيرة وحبيت انقلها لكم

واتمنى انها تنال اعجابكم

الدكتورة مها
10-09-2008, 09:38 PM
بجد حلوة قوي

اسلوبك وخفة ظلك بيجننوا
انا مستنية البقية
ما تبخليش علينا بيها
وشكرا ع حوار البصارة
ايوة
حلوة قوووى حملة التوعية دى
وهنعتبر البصارة هى الدرس
الاول

مستنين الدرس التانى



فعلا موضوع البصارة دة مهم جدا

وكلنا لازم نتعلم طريقتها

وانتظروني لمعرفة باقي حملة التوعية ......

وربنا يسعدكم جميعا

نورتيني بمرورك الجميل

أدهم صبري
11-09-2008, 05:49 AM
:D:D:D

جميلة جدا
بتفكرني بقصص منفصلة قرأتها في كتاب "أنا عايزا أتجوز"
بس بجد تحفة
وأكيد مستنيين بقية الحديث

bloadbaby69
11-09-2008, 11:09 AM
هههههههههههههههههههههههه
شكرااااااااااااااا علي اليوميات الرائعه

الدكتورة مها
11-09-2008, 01:56 PM
:D:D:D


جميلة جدا
بتفكرني بقصص منفصلة قرأتها في كتاب "أنا عايزا أتجوز"
بس بجد تحفة

وأكيد مستنيين بقية الحديث



فعلا يا استاذ أدهم

هي هي القصة ...... بس التغيير مطلوب بردوا

مش معقولة هانزل بالقصة زي ما هي

المهم انها تكون عجبتك

الدكتورة مها
11-09-2008, 01:59 PM
هههههههههههههههههههههههه


شكرااااااااااااااا علي اليوميات الرائعه







http://www.dubaieyes.net/gallery/data/media/69/twqi3-ma-1-3-8.gif




http://img143.imageshack.us/img143/6469/17pg.gif

الدكتورة مها
11-09-2008, 02:02 PM
الجزء التااااااااااااااااني




آه آه نسيت أقولكم مين طنط حشرية دي ..صحبة ماما طنط "حشرية" ..(اسمها شكرية ..حشرية ده النيكنيم اللي صحابها الأنتيخ بينادوها بيه ) جابت لي عريس
عريس ايه ...راااااجل ;);)

أيوة طبعا ماهو لازم يبقى راجل امال هتجوز ايه..موتوسيكل؟:D:D

لأ قصدي هيبة كده و مركز عاقل وراسي و بيفهم في كل حاجه
عريس و بيفهم ؟..أشك ..الصراحة لسه ماقابلتش النوعية دي قبل كده ..عموما جايز :o:o
ماشي يا طنط حشـ..قصدي شكرية شكرية ..و ده هييجي أمتى و مع ميين؟..هيجيب مامته معاه
مامته؟هي هي هي..يا حبيتشي بقولك راااجل
أيوة يعني أبوه تكاثر ذاتيا و جابه لوحده:mad::mad:؟؟...ما هو لازم يبقى له ام
لا لازم تفهمي ده "مستكل"قصدي مستقل جدا و رأيه من دماغه و مابيديش ودانه لحد و معتمد على نفسه اعتمادا تاما
الله.."مستكل" و رأيه من دماغه و مابيديش ودانه لحد ..انا باموت في النوع ده :cool::cool:
أحمد عبد العزيز في المال و البنون ..شريف منير في ليالي الحلمية..محمد رياض في أي حاجه مثلها قبل مايتجوز(الوحش)
الصراحة جسمي قشعر ..باموووت في النوعية دي..يا سلام بأه لو سنانه مزاحمه بعضها زي نبيل الحلفاوي و الا ودانه واقفه زي حمدي قنديل و الا بلغد زي عمرو موسى :p:p

الرجالة اللي ليهم شخصية و هيبه لازم يبقى ليهم ديفوهات زي دي و هو ده اللي بيميزهم..و بعدين انا اتعقدت من الناس اللي شكلها حلو ..أنا عايزة واحد وحش مش عايزة بتوع لجنة السياسات خلاص


و جه اليوم الموعود..نضاااافنا الشقة و نفضنا السجاد و غسلنا الستاير اللي كانت لسه مغسوله و كويت الطقم و لبسته و حطيت مكياج نص نص ..مش في الكواليتي .لأ في الكوانتيتي ..لو طلع من اللي مابيحبوش الميكاب الكتير و قلب وشه و امتعض ..أخش أغسل وشي واطلعله زي ما ربنا خلقني(هو اللي جابه لنفسه) ;);) ..أما لو كان من اللي بيحبوا التكني كالر ..عندي صباع روج بطعم الفراولة هاخش أكله كله ..ما حدش يغلطني بأه ..عروسة فول أوبشن أهه
قاعدين مستنيين سمعنا صوت رجلين ع السلم وهوب رن الجرس رننننة رزييييينة قووووي..يا سلام الكبير كبير برضه

دخل م الباب ..يااااسلاااام حاجه كده بتاع مترين و نص طول بعرض و عارفين كل الديفوهات بتاع نبيل و حمدي و عمرو ...ياسلام زي ماتكون أبواب السما كانت مفتوحة ..سنان ايه وودان ايه و لغد عسسسل ماحصلش تحس انه شايل فيه الخزين
لابس بدلة مقلمة تقليمة خفيفة كده و كرافته شيك و نضارة طبية ..ايه ده وزير المواصلات يا خواتشي

واحنا كلنا لسه واقفين ع الباب بنبص لبعض ..وانا فرحانه قوي .الراجل هيبه كده و يخض و يحسس الواحده انها جنبه ولا حاجه ..يمكن تلاقي بنات كتير تقوللك لازم احس بشخصيتي ..لكن خدوها مني حكمة ..كل اما تقلب البنت و تنفضلها كل اما تنفض جيوبك...لأ لأ مش دي الحكمة ..سوري ..قصدي كل اما تنفض للبنت كل اما تقع فيك اكتر..ايوة ايوة هي دي ..احنا لسه واقفين ع الباب و ده مد راسه من جوة وبصلنا ..اتفضلوا يا جماعه واقفين بره كده ليه..اتفضلوا( ده العريس ) ماشي ....!!!

اتحركنا كاننا تحت التنويم المغناطيسي و بابا بيبصلي نظرة معناها..ايه اللي انتي جايباهولنا يتأنزح علينا ده ..وانا ابصله نظرة معناها ..بحبه يا بابا .عاااااا...

دخل و قعد و حط رجل على رجل و احنا واقفين
بصلنا و ابتسم ابتسامه انيقة و هزلنا راسه اقعدوا اقعدوا
قعدنا قداموا مبهورين بنبصلوا زي ما مرات عم محمد البواب بتبص لجوزين الغوايش بتوع مرات عم مصطفى المكوجي
قاعد هو ع اكرسي اللي في وش الكرسي اللي انا قاعده عليه..قعد يبصلي كده و يبص للفازة اللي ع الترابيزة اللي في وسط الصالون و فجأه بدون مقدمات راح قايم شايل الفازة بالورد اللي فيها و حاطتها ع البوفيه..وقاعد تاني
بابا بصله و ال1111 ظهرت على وشة واضحة جلية _ملحوظة بابا بيظهر على وشة 1111 مش 111 زي الناس العادية خصوصا لما بيبقى متغاظ-بص لبابا و ابتسم برضه الإبتسامه الأنيقة:أصلي مش عارف أشوفها كويس..


دي طبعا اللي تبقى أنا..ومش عايزة نباهة هو كان شايف وشي يبقى كان عايز يشوف....يا نهار اسود ...و واضح ان بابا كمان وصل للنقطة دي بتفكيرة لأن حواجبوا كانوا خلاص قربوا يندمجوا و يبقوا خط واحد طويل فوق مناخيره اللي احمرت و بقه اللي كان مكرمش لأنه واضح انه بيجز على سنانه
ماما مدت ايديها و طبطبت على ايده يعني استنى لما نشوف أخرتها ايه
بابا بصلها يعني ده واضح انه بجح و عينه يندب فيها رصاصة
رفعت حواجبها واتنهدت يعني الرجالة كلها بقت كده ..جيل الدش يا سيدي


كل ده و اختكوا قاعده غرقانة في عرقها و هو مركز قوي مش عارفه في ايه؟...ومش عايزة أعرف
وفجأة برضه و بدون مقدمات تاني اتفتح في الكلام ..
لو سمحتي ممكن أعلق على حاجه ..وبيشاور
بابا اتحرك بتحفز عشان يقوم بتصرف أبوي لطيف و ينط في كرشه و ماما شايفاها بدأت تطلع رجلها من الشوز تحسبا لإحتمال استخدامها كدعم معنوي بابا يحتاجه

تعلق على ايه
ضوافرك
هااه؟
ضوافرك
مالها
انتي ليه بتقصيها مدوره مش عارفه ان المربعه هي الموضه
هي الموضه في الدهب ايه دلوقتي الأصفر والا الأبيض؟
بس اللون الأبيض اللي انتوا داهنين بيه الأوضه ده هايل و اللون اللي انتوا داهنين بيه البيت كمان
هو البيت ده تمليك والا ايجار؟
ايجارات الشقق بقت غالية قوي على فكرة اليومين دول
اليومين دول ساقعه شوية باين الشتا داخل بدري السنة دي
انتوا عارفين ان السنة دي سنة خبيثة أصل انا مواليد تسعه و عشرين فبراير وباحتفل بعيد ميلادي كل أربع سنين مرةهاهاها
..مرة واحد جه يقعد على قهوة قعد على شاي هاهاهاها
الشاي بتاعي خفيف يا طنط على فكرة و بمعلقة سكر واحده

ماما بعد ماتاكدت انه أهبل صدرتله الوش الخشب..الشاي خلص من عندنا يا حبيبي

الشاي خلص ..طب خلاص نخليها قهوة
هي القهوة اللي تحت البيت دي مش عاملالكوا ازعاج
اصل ازعاج الناس ده اسوأ حاجه في الدنيا خصوصا الكلام الكتير
كتير قوي المكياج اللي انتي حطاه يا آنسة..
آنسه انتي برضه ماقولتليش اسمك ايه ..الإسم دايما مهم
القسم بقه اللي جنبكوا ده بيحميكوا كويس بيخوف الحرميه يجوا الناحية دي..أصل الناس خلاص هتاكل بعض
هو انتوا هتاكلوا ايه النهارده انا شامم ريحةملوخية بالأرانب
الأرانب بقت سهلة دلوقتي على فكرة الواحد يدخل بميت جنيه في البورصة يطلعلوا بأرنب.. مليون يعني
مليون مرة أقول لطنط شكرية عايز عروسة مش عارف اتأخرت ليه على ماجابتني هنا
بابا فرمله :
أنا عارف...بره

نعم يا عمي قصدك السفر بره لأ انا مش ناوي أصلي

بررره..أطلع بره ماعندناش بنات للجواز

هاهاها ..بتهزر يا عمي ..أمال دي ايه..يا جماعه حد
يقوللي اسمها ايه ..هاتجوز واحده ماعرفش اسمها

انا قلت بره ماعندناش بنات للجواز

مش فاهم حضرتك بتتكلم بجد.بتهزر أكيد مقلب..
آه شوفتوا برنامج مقلب دوت كوم


و هنا قرائي الأعزاء وصل ارتفاع الضغط ببابا حدا لم تشهده البلاد من قبل و قام و هو الذي يبلغ طوله 170 سنتي و عمره 62 سنة بحمل البيه العريس المترين و نص ده هيلا بيلا من الصالون لباب الشقة و زقله ع السلم و سمعناه
بيتدحررررج دحرررجه رزيييينة جددددا



و العاقبة عندكم في المسرات

nour eljannah
11-09-2008, 04:02 PM
هههههههههههههههههههههههههههههههههههههههه

ي خبر


رهيبه

بس العريس دا ايه
لوك لوك لوك لوك
صدعني والله هههههههههههههه


ميرسي ي دكتوره

مستنيه الباقي بفاااااااااااارغ الصبر
اوعي تتأخري

القيثارة
11-09-2008, 10:10 PM
حلو قوي الفصل التانى
يا دكتورة
بجد
ولا العريس يا اخواتى عليه
اهو دا بقي اللي كامل الاوصاف
وما شاء الله ع أخلاقه
دى هايلة
لالالالالا
هايلة ايه دى فوق الفظيعة بشويه
ولا ذكاؤه
مش قادرة اوصفلك

انا عاوزة اسأل سؤال
لالالا بجد
سؤال
هو لما اتدحرج من ع السلم
اتدحرج ازاى؟
لا لا
يعنى قصدى هندسيا
يعنى
كعورة
ولا شقلبة
شكل كده الوالد
اداه مقص

امانى
11-09-2008, 11:17 PM
شكرا جدا جدا يا دكتورة مها ومنتظرين باقى الاجزاء ...وبعدين انا بجد اتخنقت من الكوبه ده ...الحمد لله ان الوالد اتصرف والا كنت انتى اللى هتتصرفى ولا ايه؟.ههههههههههههههههههههه

miss potter
11-09-2008, 11:48 PM
لا بجد جميييييييلة جدا

كميلها و عاوزين منها تانى

الدكتورة مها
12-09-2008, 04:00 AM
هههههههههههههههههههههههههههههههههههههههه

ي خبر


رهيبه

بس العريس دا ايه
لوك لوك لوك لوك
صدعني والله هههههههههههههه


ميرسي ي دكتوره

مستنيه الباقي بفاااااااااااارغ الصبر
اوعي تتأخري


منورة يا قمراية المنتدى


وباذن الله مش هاتاخر عليكي فى الباقي


لان باقي العرسان حاجة نادرة الوجود فعلا


وبكرة تشوفي بنفسك


المهم تدعي كويس انك متقعيش فى عريس منهم ...... لاحسن هاتبقي :rolleyes::rolleyes::rolleyes::rolleyes:


أستر يارب

الدكتورة مها
12-09-2008, 04:03 AM
حلو قوي الفصل التانى

يا دكتورة
بجد
ولا العريس يا اخواتى عليه
اهو دا بقي اللي كامل الاوصاف
وما شاء الله ع أخلاقه
دى هايلة
لالالالالا
هايلة ايه دى فوق الفظيعة بشويه
ولا ذكاؤه
مش قادرة اوصفلك

انا عاوزة اسأل سؤال
لالالا بجد
سؤال
هو لما اتدحرج من ع السلم
اتدحرج ازاى؟
لا لا
يعنى قصدى هندسيا
يعنى
كعورة
ولا شقلبة
شكل كده الوالد

اداه مقص




ههههههههههههههههههههههههههههه



أنتى كنتي معاهم والا ايه؟


شكلك كدة كنتي مستنياه تحت بير السلم عشان تاخديه لنفسك ..... اصله عريس لقطة صح؟


اهو انا مش خايفة غير من كدة


عموما مبروك عليكي


قصدى ..... مكنش يومك يا سكر


نورتي التوبيك واتمنى باق يالعرسان يعجبوكي ...... متتسرعيش وتختاري حد لحد ما تشوفيهم كلهم

الدكتورة مها
12-09-2008, 04:04 AM
شكرا جدا جدا يا دكتورة مها ومنتظرين باقى الاجزاء ...وبعدين انا بجد اتخنقت من الكوبه ده ...الحمد لله ان الوالد اتصرف والا كنت انتى اللى هتتصرفى ولا ايه؟.ههههههههههههههههههههه



هههههههههههههههههههههههه


معاكي حق ...... كنت زمانى دلوقتى باكل عيش وحلاوة فى مكان جميل وشاعري


أكيد عرفتيه المكان دة والا ايه؟

الدكتورة مها
12-09-2008, 04:06 AM
لا بجد جميييييييلة جدا


كميلها و عاوزين منها تانى




دة انتى اللى أجمل

وردك هو اللى اروع

ومش هتاخر عليكم فى الباقي ان شاء الرحمن

الدكتورة مها
12-09-2008, 04:13 AM
الجزء التالت


وده اللي حصل في يوم وانا نزله ورايحة الشغل

بصوا بأه ..أولا الحكاية دي برضه من فصيلة هم يبكي و هم يضحك ..بس الصراحه يعني الصراحه ..انتوا هتضحكوا عليا أنا..هتشوفوا ..بس بقولكوا ايه بما اني فتاه ركيكة ..قصدي رقيقة رقيقة..و مهيضة الجناح..ههه حلوة مهيضه دي..فبليز بليز ..بلاش تريقة



الحكاية دي مايعرفهاش أي حد غير انا و ماما ..ماحكيتهاش لأي حد من أصحابي ..يعني ابقوا اتفشخروا قدام كل أصحابكم بالأمتياز ده ...حصريا على روايات2..حكاية العريس التاني ..إقرا الحادثة ..اقرا الحادثة




احمم..مقدمة...عارفين ايه احساس واحده و هي ماشية في الشارع و تحس ان حد معجب بيها..مش معاكسه يعني و كده ..لأ بيبقى فيه كده كيميا زي مابيقولوا الأجانب ..و على فكرة فيه جوازات كتير بتبدأ كده ...واحد يشوف واحده في الشارع..يمشي وراها ..يعرف ساكنة فين و يسأل عليها و يخطبها ..ابن عمي عمل كده و البت لسعته حتت قلم على وشة ..علم على صداغه 3 أيام ..قام هو اتكيف قوي و قال البت دي واضح انها مؤدبة و متربية وراح خطبها ..آه و النعمة..هي صحيح بعد كده اتضح ان ايديها بتطول عليه في كل المواقف مش في الموقف ده بس ..بس و الله الراجل مبسوط و بيحلف باليوم اللي شافها فيه..و بيلعن أبو ...والا بلاش ....دي في مقام عمتي برضه


المهم أنا يوم نازله من البيت رايحه الشغل..حسيت بكيميا م اللي كنت بقولكم عليها دي ..حسيت ان فيه عين هتخرم قفايا ..اتديرت بسرعه كده في الخباثة لقيتلكم راجل انما ايه ..طول بعرض بارتفاع.ماسك ف ايده شنطة سودا و لابس بدله و كرافته و نضارة شمس....عامل كده زي العيال اللي كانوا بيطلعوا في إعلانات جمعية شباب المستقبل بتاع جمال مبارك "شباب الجيل ..قوام جينا ..هو ..هو" فاكرينهم ؟..

المهم الواد كان حليوة و انا قلبي هفهفله أول مالمحته ..استنيت شوية ع المحطه و بعدين جه الميكروباص..ركبت راح راكب ورايا..قلت الشياكه دي كلها هتركب مكروباص ليه يعني..أكيد في الأمر إنا ..و جه كمان قعد جنبي ....يا حلولي يا حلولي..بس كنت خايفه ليعاكس و ساعتها أنا ماعرفش أبويا ..باللي ف رجلي و لايهمني لا شباب المستقبل و لا جمال مبارك ولا حاجه أبدا..بس لاقيته في نص المسافه كده ..بيميل عليا و بيقول باسلوب رزين كده ..لو سمحتي ممكن أسأل حضرتك على حاجه ..وانتوا ماتعرفونيش... باتسطل لما حد يقولي حضرتك ..بس برضه مش سهله يعني..صدرت الوش الخشب و قلتله ..خير بمناسبة ايه ؟...يعني كنت عايز أسأل بس ..هو حضرتك مرتبطه ..واضح انك مش مخطوبة ولا متجوزة مافيش دبل في ايديكي ..بس الإرتباط بأه لازم أتأكد منه من حضرتك ..(حضرتك تاني يا حلولي)..والله الكلام ده مايتقالش في مواصلات و بعدين انا ماعرفكش و مش متعوده أكلم حد ماعرفوش ..طب يعني أنا لو معجب بحضرتك و عندي نيه أتقدم رسمي ..أعمل ايه ..أصلي بصراحه متابعك من مده بس دي أول مرة أتشجع و أحاول أكلمك ..

ياحلاوة ياحلاوة متابعني من زمان ..ده واقع بأه..بس برضه على مين ..لازم أثبت ..و الله لو حضرتك متابعني زي مابتقول تبقى عارف بيتي و عارف بابايا ..هو الوحيد اللي ينفع يتكلم في المواضيع دي ..لو سمحت ماتحرجنيش اكتر من كده ..جامده جامده يعني ...الحقيقة انت كده أثبتيلي اني أحسنت الإختيار....ياسلام ياسلام..الله الله ..هو ده الكلام ..لحد كده الأمور كلها صح و مية مية ..صديته آه بس كمان قلتله كلم بابا..سيبتله سكه مفتوحه يعني .



الواد بأه التباع راح شاخط فيا في اللحظه دي ..الأجرة يا أبله والا هتركبوا ببلاش...يابن اللذينا ..دانا عماله أترسم من ساعتها تبعتر كرامتي كده ؟...جيت أمد ايدي جوه الشنطه لقيتلكوا الأخ بأه راح بسرعه مطلع فلوس و محاسبلي ..لأ مايصحش ..لأ بأه اسمحيلي ..أنا لا يمكن أقبل واحده هاتقدملها تدفع و انا موجود ...وجون وجون وجون ..هيتقدملي خلاص أيوة كده هو انا صحيح ماعرفش هو بيشتغل ايه و الا عايش فين والا بيقلد فنانين والا ايه نظامه بس الجواب بيبان من عنوانه.




أول ما المكروباص وقف لقيته نزل معايا في نفس المحطه و بصلي و قاللي ..أنا حبيت أنقذك يعني في المكروباص ..واضح قوي انك ماعاكيش فلوس...الدم ضرب في نافوخي..وله انت هتتمنظر عليا والا ايه ؟..واضح ان شنطتك فاضية آخر الشهر بأه يالا وفرتلك أجرة المكروباص تنفعك ..بصتله بذهول كده و قلت له ..مين اللي قالك الكلام الفارغ ده ..انا عمري مامشي بشنطتي فيها أقل من 300 جنيه..قالي باستهزاء كده ..لاااااماصدقش..الدم كان خلاص قرب يطلع من نافوخي زي النافورة..رحت مطلعه كل اللي في المحفظه مورياهولي ..أهه حتى شوف 50-100-200-220
لقيته مد ايده اخد الفلوس..و بصلها كده و عدها و قاللي آه صحيح انتي معاكي فلوس أهه


و في لحظه راح مطبقهم و حاطتهم في جيبه ..و قاللي انا هاخليهم معايا بأه سوفينير لحد لما آجيلكم البيت ..ماستوعبتش و قبل ما آخد فرصة أقول كلمه واحده كان راكب ورا واحد على موتوسيكل شكله كده كان ماشي ورا المكروباص و هوا ..فص ملح و داب


أختكوا بأه واقفه في وسط الشارع هبلااااااااااه ..زي اللي اتدلق عليه جردل مايه مش نضيف..مش عارفه أصوت والا أطلع أجري وراه والا ألطم على وشي ...فضلت واقفه يجي خمس دقايق في الشارع مش عارفه اروح فين والعربيات تقعد تزمرلي و لما تلاقيني مسهمة تقريبا اللي سايقين يقولوا في نفسهم دي يا اما طارشه يا اما مجنونة يا اما م اللي بيبيعوا مناديل ..و الناس تعدي تبصلي... و العيال الصغيرة يشدوا في هدوم أهاليهم ..بابا بابا هي الست دي عامله كده ليه؟


بعد شوية كده لفيت و دخلت المستشفى اللي باشتغل فيها ..و على وشي تعبير كده زي تعبير العمده الآلي بتاع زمان ..دخلت الصيدلية..قعدت ع المكتب ..و فجأه .....انفجرت في العياط ..و العيال زمايلي اتلموا حواليا..مالك ..فيه ايه؟...حد زعلك ..حد كلمك؟
من بين العياط و الشحتفه ما اقدرتش أقولهم غير كلمه واحده
.................................................
..................................
..................
اتسرقت
عااااااااااااااا :p :D :D

nour eljannah
12-09-2008, 03:05 PM
هههههههههههههههههههههههههههههههههههههههههههههههههه

هههههههههههههههههههههههههههههههههههههههههه

عااااااااااااااااااااااااااااااااااااااااااا

ههههههههههههههههههه


رهيبه بجد
وجون وجون وجووووووووووون
هههههههههههههههههههه

روعه بجد ي دكتوره

يلا بقي مستنيه الباقي

بلييييييييييييييييز مش تتأخري بقي



waiting.........................................

الدكتورة مها
12-09-2008, 03:25 PM
http://www.yesmeenah.com/smiles/smiles/50/e%20(107).gif

امانى
12-09-2008, 03:44 PM
بشكرك جدا جدا ومنتظرين باقيه الاجزاء الروووووووووووووعه وتعيشي وتاخدى غيرها...هههههههههههههههههههههههه تقبلى مرورى وتحياتى...:D

الدكتورة مها
12-09-2008, 03:52 PM
http://www.yesmeenah.com/smiles/smiles/50/f%20(31).gif
http://www.yesmeenah.com/smiles/smiles/50/f%20(46).gif

القيثارة
12-09-2008, 05:04 PM
اتسرقت
عاااااااااااااااااااااااا
اهو دة اجمد درس
من دروس التوعية
اللي كنت طلبتها
يا عينى
علينا
!!!!!!
شكرا يا د مها
علي الاضافات
والافادات
انا مستنية
حكاية العريس اللي جاي
ان شاء الله
ربنا يستر

الدكتورة مها
12-09-2008, 05:14 PM
http://up.jro7i.com/uploads/df3f15cf9c.gif

الدكتورة مها
12-09-2008, 05:15 PM
http://wanatalam.jeeran.com/almazed.gif

الدكتورة مها
12-09-2008, 05:22 PM
في البداية كده هديكوا سؤال وياريت تجاوبوني عليه؟؟
هاااااااااا ماشي .



افتحوا ورقة الأسئلة و امسكوا الأقلام
اذكر خمس أوجه للتشابه بين طنط شكرية و تنظيم القاعدة

ايه؟:confused::confused:
غلب حماركم

أقولكم اللي قدرت اتوصلله من اوجه التشابه دي

أولا:الإتنين سواء اختلفنا معاهم أو اتفقنا(ممكن على فكرة تتفق مع القاعدة بس طنط حشرية مستحيل) أيا كان..الإتنين نتيجة أفعالهم انفجارات و دمار و غالبا بيبقى فيه طرطشة دم كمان

ثانيا:الإتنين ممكن يغطسولهم شهر..اتنين..تلاتة و يمكن سنة و بعدين يطلعولك بقنبلة أكبر من اللي قبلها :D:D

ثالثا : انهم الإتنين ساعات يبقى التفسير الوحيد ليهم هو نظرية المؤامرة
القاعدة ساعات يتهيألنا انها من صنع امريكا..و طنط حشرية ساعات يتهيألي انها بتعمل اللي بتعمله ده عشان يمكن زمان كان عينيها من بابا و دلوقتي فرصة تنتقم منه و ترفعله الضغط :mad::mad::mad:

رابعا و خامسا : فكروا فيها انتوا بأه انا بصراحة مافيياش مخ
..........

انا بأه كنت قاعده كده فوق المقطم و قدامي كريم متشحتف و عينيه حمره زي الطماطماية من كتر الدموع

أرجوكي احنا لازم نتجوز انا مش هاقدر اعيش من غيرك
مش عارفة أقولك ايه يا كريم الموضوع خلاص خرج من ايدي
طب انا مش فاهم ليه باباكي كارهني؟
اعمل ايه بس يا كريم ..حاولت و الله حاولت كتير و مافيش فايده
طب بس خليني أقعد معاه و انا اكيد هاقنعه
تقنعه ازاي بس يا كريم انت عارف بابا ماعندوش تفاهم
طب يعني انا ذنبي ايه انه شافني و انا باحضن منة و هي لابسه القميص الأحمر؟
هو بابا بس اللي شافك دي مصر كلها شافتك
طب أعمل ايه بس؟
هو فيه حل واحد
ايه هو؟
.
.
.
ماتجيبهاش معاك في الفيلم الجاي

فجأه المقطم كله بيتهز ..انتي رحتي فين .. انتي رحتي فين؟
أيوة يا كريم أنا معاك اهه
كريم مين ؟..الله يقطع كريم عبد العزيز اللي هيجننك ده
الله ..مين اللي بيهز الجبل؟
جبل ايه يا هانم..قومي انا مامتك ..قومي يا بنت تعالي شوفي طنط حشـ..كرية..جايه عايزاكي في موضوع
قمت بتأثير الصدمة من النوم
بأه يا ربي أجي من المقطم و أسيب كريم عشان طنط حشرية دي؟
بس يا بت بلاش قلة أدب ..قومي البسي يالا و غسلي وشك بشوية ماية و تعالي قابليها
يا فتاح يا عليم يا رزاق يا كريم
.......

ازيك يا طنننط
أهلا يا أمورتي..من غير كلام كتير يا حبيبتي..جايبالك حتة عريس
عارفة عارفة ..راجل و رأيه من دماغه و أبوه تكاثر ذاتيا و جابه لوحده
هههههههه..ينيلك ..يا بنتي الكلام ده مافيهوش هزار..دا عريس قمممر مافيش في جماله اتنين
بقولك يا طنط انا مابحبش الحلوين دول من يوم الراجل بتاع لجنة السياسات
هشششششش..الله يفضحك..لجنة سياسات ايه يا حبيبتي انت لسه ماصحيتيش والا ايه؟
(دي ماما و هي بتجز على سنانها)
أ..أ..اآآه ..آآه.معلش لسه مافقتش قوي يعني..قوليلي بأه يا طنط عنده كام سنة العريس ده
32
كويس و عايش فين?
في دبي يا حبيبتشي بلد الشوبنج ههه
و هيعيش فين
هناك برده
مااشي و بيشتغل ايه باه؟
هو يا حبيبتي كان معيد في تربية رياضية و من كتر عبقريته طلبوه يدرس في هندسة

نعممممممممممم
ازاي يعني؟
ماما ..هو انا نمت أد ايه؟
هي الدنيا بتتغير كده في ساعة زمن ؟

يا حبيبتي أنا بقولك الكلام اللي قالهولي..انتوا باه لما تقعدوا مع بعض ابقي اسأليه و استفهمي منه عن اللي انتي عايزاةهما هييجوا بكرة الساعة سابعة..هو و أمه..و الله أنا حاسه بتفاؤل المرة دي يا بنتي
انتي عارفة انا بحبك زي بنتي سوسن بالظبط

الا يا طنط صحيح هو حضرتك ليه مش بتودي العرسان اللي بتجيبيهوملي دول لسوسن بنتك؟

أ..أأ...هاه..أشوفك بكرة الساعة سابعة بأه يا حبيبتشي..استنيني

مش بقولكم نظرية المؤامرة شكلها شغالة

و مشت طنط حشرية و انا بغني و ماما بترد عليا

حاسس بمصيبة جايالي
يا لطيف يا لطيف
هذا كان موجزا لأهم الأنباء و التفاصيل في النشرة القادمة

انتظروااااااااا المفاجأه؟

nour eljannah
13-09-2008, 12:40 PM
هههههههههههههههههههههه
صحيح حد يسيب كريـــــــــــــــم عبد العزيز
ويروح لطونط حشــ يييييي شكريه
ههههههههههههههههه


ميرسي ي دكتوره

وربنا يستر انا بقلق منها الست دي
هههههههههههههههههه



يلا مستنيه الباقي بسرعه جدا اوي خالص

الدكتورة مها
13-09-2008, 04:53 PM
قوليلي بقى؟

ذنبي ايه اسيب كريم واروح لطنط كشرية؟؟؟؟؟؟؟؟؟

عموما

لما تشوفي العريس ومفاجاته


هاتعذريني اكتر واكتر

امانى
13-09-2008, 05:08 PM
يا تري هيحصل ايه......................حاسس بمصيبه جايلك .................هههههههههههههههههههههه منتظرة المفاجأة تقبلى مرورى....................

الدكتورة مها
13-09-2008, 05:43 PM
استنوني

وانتوا هاتعرفوا المفاجاة اللذيذة اللى حصلت

أتمنى تكون اليويمات عجبتكم

الدكتورة مها
13-09-2008, 07:40 PM
وجاء اليوم الموعود...و دقت الساعة دقاتها المتأنية التي يختلف إيقاعها تمام الإختلاف عن إيقاع دقات قلبي المتسارعة
تن..تن..تن..تن..تن..تن..تن
دقات تهز وجداني و تزلزل كياني
يااااااااااه قد أتى الميعاد..ميعادي مع السعادة
هذا الميعاد الذي أخره القدر كثيرا
لكني صبرت و صبرت
و هاقد أثمر صبري و انتظاري

وها أنا أخطو أولى خطواتي الى مملكتي الجديدة التي لا مكان فيها للحزن ولا للبكاء
لقد ارتشفت من كأس التعاسة الكثير
و الآن لم يعد هناك الا كأس الهناء أرتوي منه الى آخر العمر
...ستووووووووووووووووووووووووووووووووووووووووووووو وب
انتوا صدقتوا والا ايه؟

الساعة سابعة اليوم الموعود قعدنا نستنى بعد كورس تنضيف البيت اللي انتوا عارفينه
استنينى كتير؟الساعة جت سبعة ..و نص..تمانية..ونص..تسعة.. و تلت
بابا قاعد على آخره بيمارس هوايته المفضله في الجز على سنانه خصوصا لما يجيلي عريس من اياهم (والله صعبان عليا سنان الراجل ده ذنبها في رقبتي) المهم عمال يبصلي و ينفخ و انا قاعده في نص هدومي

ماما خدته و طلعوا بره الأوضة و سمعت فاصل من الزعيق بالوشوشة-قال يعني عشان مايجرحوش مشاعري- آه يا بن ستين في سبعين أنا تحطني في الموقف ده؟..طب و حياة سنان بابا لو كان ليك في الطيب نصيب لاطلعهم على جتتك و جتت اللي خلفوه ..قول ان شالله

و أخيرا فيييين الساعة التاسعة و الدقيقة الرابعة و الأربعون ضرب الجرس
بابا حسيت انها هتكبر في دماغه و هيلطعهم ع الباب ..لطعه بلطعه بأه.. بس ماما بصتله و بصتلي و قلبت شفتها قدامه بصعبنه..فيظهر حركة جواة المشاعر الأبوية فحن..و اتنهد ..و قام فتح الباب
دخلو ورا بعض..طنط شكرية في فستان موديل عضة الكلب ووراها العريس عبارة عن 32 سنّة و طالعلهم بني آدم
سنة يعني تووث
آه و الله ..أعرض ابتسامة شوفتها في حياتي
عجبتني ابتسامتة جدا..بس طبعا فرست بابا قوي..جاي متأخر و كمان بيبتسم ..ال 1111 بتوع بابا بدأول يطلعوا بس ماما حطت ايدها اليمين فوق دراعه الشمال فاتنهد تاني و أذعن للامر الواقع

قعدنا كلنا في الصالون بنتكلم في أي حاجه ..أي حاجه و السلام بعيد عن الجواز ..أكنها قعدة تعارف يعني و خلاص

العريس الوسيم ..آه وسيم فعلا ..بيرد على كل الأسئلة بابتسامة واسعة أو ضحكة مجلجلة ........ ومن خلال بقه المفتوح على آخره تقدر تشوف بوضوح اللوز و البلعوم و لو دققت شوية يمكن توصل للأمعاء الغليظة ..بس بشوش كده يعني ووشه سمح...خير ..خلصت القاعده و ايه بأه ..ده كان اول عريس مايدخلش عليا ايد ورا و ايد قدام و ايد بابا على قفاه
كان جايب لفه صغيرة كده كان نفسي من اول القاعدة أعرف هي فيها ايه
هو مشي هو و طنط شكرية من هنا و انا و بابا و ماما اتلمينا ع اللفة من هنا ..عملين حواليها دايرة و مافيش حد عايز يمد ايده زي مانكون بتوع الإف بي آي و مشتبهين في شنطة واحد من تورا بورا
الفضول كان هيقتلني فمديت ايدي و فتحت اللفة الصغنتوتة دي ..لأجد فيها .....اييييييييه؟

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟؟؟؟؟؟؟؟
اصبروا اصبروا..هقولكوا في الاخر

بابا بصلي و قاللي :ايه ده؟
ماعرفش يا بابا زي مانت شايف
ماما قالتله ماحنا مانعرفش العرسان بيجيبوا ايه في المناسبات دي..يمكن هي دي الموضة
بابا وقف يبصلنا شوية و يبص للفة و وبعدين تنهد باستسلام و هز كتفه ..يمكن....
تاني مرة بأه..هتقولولي ليه ماتكلمتوش في أول مرة و خلصتوا
يا جماعة ما هو مش معقول كل اما حد يجيلي يمشي من أول مرة..الناس بدأوا يتكلموا و يقولوا مادام بيمشوا من اول مرة يبقى البت فيها عيب
قولنا بأه نقسم أي قاعده بعد كده على نصين ..كده ممكن يقتنعوا اننا ماتفقناش أو احنا اللي مشيناه و بابا دألجه ع السلم
غباء؟..هو غباء بس هنعمل ايه؟..فيه مثل بيقول ..لو نزلت بلد بيعبدوا فيها العجل ..حش و اديله..
مثل بيئة عارفه..طنط شكرية اللي قالتهولي

بس القاعده الأولى المرة دي المفروض انها مبشرة و باستثناء التأخير عدت من غير خسائر كبيرة

تاني معاد بقولكم ..احنا مانتظرناش الساعة سابعة زي المرة اللي فاتت لأننا أدركنا ان العريس باينه ماشي على توقيت دبي
فبدأنا نستنى ابتداءا من الساعة تسعة ناس مرنين أهه و مافيش بعد كده

ضرب الجرس و دخلوا الإتنين ورا بعض ..نفس المنظر بتاع المرة الأولانية باستثناء ان فستان طنط شكرية المرة دي كان موديل رفسة الحمار

قعدت ابص على ايده يمكن المرة دي جايب حاجة غير المرة اللي فاتت..بس نأبي طلع على شونة(ألا يعني ايه نأبي و يعني ايه شونة دي) ..ما علينا
قعد العريس أبو ابتسامة واسعة ده ..يا ختي أمور
بابا بيبتدي هو كمان بابتسامة ازيك يا ابني
ههههههه الله يسلمك يا عمي
و ازي الحاج و الحاجه
ههههههههههههه بخير و الحمد لله
ماما بابتسامه واسعة : ماكانش له لزوم تتعب نفسك و تجيب معاك حاجة المرة اللي فاتت
ههههههههه دي حاجه بسيطة يا طنط ..حاجة من عندنا
من عندكو ..هي دبي فيها حاجات حلوة من دي
هههههههه دبي؟..دبي ايه يا طنط؟....قصدك الرياض
الرياض؟
لفينا كلنا بصينا لطنط شكرية اللي بانت محرجة كده شوية و بعدين ابتسمت ابتسامة عصبية كده
ماهو انا أصلي باين ودني مابقتش مظبوطة زي زمان ههههه السن بأه معلش
رجعنا بصيناله و هو قاعد مبتسم
بابا:يعني حضرتك في الرياض
هههه آه .عايش و باشتغل هناك
و عامل ايه هناك مبسوط
ههههه جدا جدا
بيقولوا أهل الرياض متشددين شوية
ههههههههه لا أبدا أبدا دول طيبين جددددا
و انت علاقتك كويسه مع السعوديين هناك
هههههه سعوديين سعوديين ايه يا عمي انا ماعرفش سعوديين
ازاي يعني عايش في السعودية و ماتعرفش أي سعوديين
هههههه سعودية؟ سعودية ايه يا عمي
طنط شكرية بأه في اللحظة دي بتشيل شنطتها و ماشية..أسيبكم انا بأه طالما خدتوا على بعض..ابقوا طمنوني بأه
المرة دي بأه ماما اللي وقفتلهااستني يا حشرية اقعدي رايحة فين؟
انا ؟انا حشرية؟..يعني الحق عليا؟
استني هنا اما نشوف الحكاية ايه؟ بتقوللي ايه بأه يا حبيبي؟..عايش في الرياض و ماتعرفش السعودية؟
ههههه أيوة يا طنط يعني هاعرفها منين؟
ازاي يا بني آدم ما الرياض في السعودية
هههههههههههههههههههههه..آآآآآه انتوا فاكرينني من الرياض اللي في السعودية
امال ايه؟
لا يا جماعة أنا من الريااااض..الرياض اللي في دمياط
الرياض اللي في دمياط؟ أنا مش فاهمة حاجة
...ههههــ
و ديني لو كملت الضحكة دي لاتكون آخر ضحكة في حياتك ..فهمني بتقول ايه
طيب طيب..مش هاضحك خلاص..يا طنط الرياض دي قرية في محافظة دمياط
نعممممممم..أمال ايه دبي و شوبنج و مش عارفة ايه
بابا اتدخل:طب معلش معلش ..فهمني باه بالمرة قبل ما أولع فيك و في البني آدمه اللي جايباك ..سيادتك بتشتغل ايه بالظبط؟ معيد في تربية رياضية و الا في هندسة
العريس اللي قام من مكانه و بقه رجل جوه الصالون و رجل براه و بابا ماسكه من دراعه و ماما ماسكه طنط حشرية من قفاها
الصراحة يا عمي الصراحة..أنا كنت في تربية رياضية الأول و بعدين بقيت معيد ...يعني قعدت أعيد أعيد لحد مارفدوني م الكلية و بعدين حولت كفاءة انتاجية

بابا و ماما ماسكين الإتنين و بيقربوا عليهم زي ما مصاصين الدماء بيقربوا على ضحاياهم و طالعين بيهم بره الباب و العريس هوو طنط حشرية مرسوم على وشهم أقسى أمارات الرعب
و قفنا كلنا ع السلم و هما الإتنين بيبصوا لماما و بابا برعب
و فجأه...مديت رجلي و اديتهم هما الإتنين مقلب حرامية و بصينا عليهم احنا التلاتة و هما بيتدحرجوا مع بعض في مزيج سيريالي بديع
نفضنا ايدينا و قفلنا الباب و طفينا النور
.
.
.
.
آه نسيت أقولكم اللفة اللي العريس كان جايبها معاه في أول مرة كان فيها ايه؟...
.
.
.
قرص مشبك و نص كيلو بسبوسة على هريسة............و 3 صوابع جلاش

امانى
13-09-2008, 08:04 PM
ههههههههههههههه...جميله اووى بس انا اول مرة اعرف ان فيه رياض فى دمياط.............هى اسمها الروضه مش الرياض بس ولا يهمك..............ربنا معاكى..........انا رأيي ان المدونه دى تتعمل مسلسل ولا ايه رأيكم يا بنانيت................؟!!!!!!!!!!!!!1

الدكتورة مها
15-09-2008, 01:58 AM
والله يا امانى أكتشفت أن الرياض دي ف كفر الشيخ مش دمياط

هي معلومة جديدة للكل

المهم ان الرواية عجبتك

ويارب الحلقة الجديدة تعجبكم

الدكتورة مها
15-09-2008, 02:08 AM
أيمن جه..أيمن جه

هي دي إشارة بدأ اليوم عندنا في مكتبنا..حاجة كده زي تحيا جمهورية مصر العربية اللي كنا بنبدأ بيها طابور الصباح زمان
بعد الكلمة دي ما بتتقال الصبح ... تحسوا ان عاصفة الصحراء ضربت مكتبنا
مرايات بتتفتح ... إقلام روج من كل لون ونوع .... بودرة .... كحل ..طرح بتتفك و تتربط تاني ....شعور بتتساوى وكل الإستعدادات الأنثوية اللي بتقوم بيها ست الحسن قبل ما تقابل الشاطر عبد الحميد كانت موجودة في اللحظة دي

كل ده عشان أيمن..أيمن مين ..أيمن ده الموظف الوحيد من جنس الرجال اللي موجود في مكتبنا ..تخيلوا كده 14 صيدلانية على وش جواز(و على وش جواز دي فيها قولان) و معاهم أيمن

لأ و مش أي أيمن ..ده أيمن عريض المنكبين قوي الجبهة طويل القامة واسع الإبتسامة عميق العينين حاد الأنف..باختصار كده كل الأوصاف اللي نبيل فاروق بقاله عشرين سنة مزهقنا في وصف أدهم صبري بيها..موجودة في أيمن ده و بالتالي فهو بصراحة يستحق كل الإستعدادات دي
أههههههه-دا أنا ....باتنهد-
المهم بعد عاصفة الصحراء دي دخل أيمن المكان..ماحدش قدر يبص بطريقة مباشرة لأن كل شئ فيه كان بيلمع.. الشعر .البسمة .الجاكت الجلد والشوز الملمع كان صعب تبصله مرة واحدة..مش هاتقدر تفتح عينيك (بالغيظة في هالة زرقان) و ريحة البارفان اللي هبت على المكان..خلت اتنين يفقدوا النطق و تلاتة يفقدوا الوعي وواحدة كان عندها استعداد تفقد أكتر من كده لو كان حد اداها فرصة

صباح الخير يا جماعة
تمكتنلاربيةلالفف
دا إحنا بنرد بكلام غير مفهوم مع فاصل من الهقهقة اللي مالهاش لازمة

وقف أيمن يبص كده شوية في المكان و يلف بعنيه في المكتب و فجأه بصلي..و اتسعت ابتسامتة قوي و لمعت في الشمس لدرجة اني أصبت بعمى مؤقت و بعدين ..و بعدين .. يا دي النيلة دا جاي نحيتي..طب أروح فين و الا أعمل ايه؟
عملت نفسي مشغوله في الورق اللي قدامي بس على مين؟..برضه جاي ناجيتي و الكل بيبص و فجأه جسمي كله غرق في عرق
كمية العرق اللي عرقتها ساعتها كان ممكن تحل مشكلة الجفاف في اثيوبيا
أما وشي بأه ماحكيلكوش ..وشي بأه أحمر لدرجة اني لو كتبت عليه 22 الناس هتفتكرني أبو تريكة
ميل و سند على مكتبي و قال بصوت واطي
صباح الخير
هه؟...ايه؟..آه آه..طيب
انا ممكن أتكلم معاكي شوية؟
معايا أنا..إحلف.أ..أ..أ..قصدي ليه خير في حاجة
لأ خير ان شاء الله
قلت و انا بحاول أوقعه عشان يعترف..بخصوص ايه يعني
بخصوص حاجة كويسة ان شاء الله ..حاجة ليها علاقة بالمستقبل
فستان أبيض و زغاريط دبلة و شبكة.. سعد الصغير بيغني و نوال بترقص ..كل ده مر في خيالي في اللحظة دي
نوال مين؟..نوال دي رقاصة مهمة جدا بس انتوا جهلة ماتعرفوهاش
طيب امتى
بعد الشغل ان شاء الله ممكن
طبعا ممكن نتكلم بعد الشغل
دا أنا باعلي صوتي عشان أكيد العزال
بقيت اليوم بأه ..كان يوم تاريخي ..أكني عايشة في فيلم عربي بالظبط..أنا طول الوقت بابص في الأرض و كل البنات عاملين أحزاب و بيرموا عليا كلام
اتنين ع اليمين..هي فاكرة نفسها ايه يعني كل ده عشان عايز يكلمها و ايه يعني
اتنين ع الشمال بكرة تعملنا فيها نانسي عجرم و ماحدش يقدر يكلمها
اتنين تانيين بيصرفوا للمرضى هو لو يعرفها على حقيقتها ما يبصش في وشها ..اسأليني أنا..خد يا حاج لما تتعب ابقى نقط من دي في مناخيرك

و استمر اليوم على كده تلقيح كلام تلقيح كلام ..ده غير الزغر ..يعني لو النظرات بتعور كان زماني مرمية في مشرحة زينهم دلوقت الوحيدة اللي كانت واقفة جنبي في الموضوع ده نهى صاحبتي ..هي الوحيدة اللي كانت مقوياني و بتشد من أزري..على طول بتبتسم في وشي و تطبطب على دراعي..ربنا يكرمك يا نهى يا رب..هما دول الصحاب و الا بلاش وكل شوية أيمن يبص ناحيتي و يبتسم ابتسامة زي مايكون بيقوللي سيبك منهم و لا يهمك و كل اما عينه تيجي في عيني على طول أدير عيني في أي اتجاه.
.الله..باتكسف!!
و نهى كمان ماسابتهمش يستفردوا بيا ربنا يخليكي يا نهى يا رب

و جه ميعاد الإنصراف و لأول مرة في تاريخ وزارة الصحة منذ انشاءها ..الناس مش عايزة تروح
الساعة جت اتنين ..اتنين و عشرة اتنين و ربع و ماحدش عايز يتحتح من مكانه
نهى عايزة تنقذ الموقف
ايه يا جماعة انتم مش مروحين النهاردة و الا ايه
انا لسه قدامي شوية شغل
و انا احتمال بابا يعدي عليا
انا بأه ماليش مزاج أروح دلوقت اللي عايز يخفى يخفي....قصدي اللي عايز يمشي يمشي
أيمن يبصلي خلسة كده و باين عليه محرج قوي..و انا قاعدة هاموت ..يا ولاد ال.. هو خلاص يعني..مانتوا هتعرفوا هتعرفوا ..لازم تقفوا في زوري كده؟
فضلت مستنية لحد 2 و نص الا خمسة و برضه ماحدش عايز يتحتح..قلت مابدهاش باه

خدت شنطتي و قمت من مكاني و مش عارفة ايه الشجاعة اللي نزلت عليا بدون مناسبة دي رحت رايحة عند أيمن
دكتور أيمن
الواد اتفزع..أيوة
لوسمحت عايزاك
ورحت خارجة بره الأوضة بسرعة و هو ماصدق راح جاري ورايا

سامعة أنا بأه دربكة في الأوضة كل واحدة بتحاول تقوم من على كرسيها بسرعة و تخرج ورانا تتفرج و غالبا كلهم خبطوا في بعض او اتحشروا و هما خارجين من الباب خصوصا ان فيه كام واحدة منهم من الوزن التقيل
وصلت الكافيتريا بتاع المستشفى و بمنتهى الثقة رحت قاعدة على أول ترابيزة و انا مش مصدقة نفسي
يا حالولي يا حالولي هي دي الكافتريا بأه بتاع الرانديفوهات..يا سلام يا رب ..الحمد لله كل احلامي اتحققت ..أنا كده ممكن أموت و انا مستريحة
قعد أيمن قدامي و هو خجلان و باصص في الأرض
لا وحياتك مش وقت كسوف دلوقت زمان لو فريق البنات كله جاي على هنا و لو جم قبل ماتتكلم هاقوم أدبح فيهم كلهم و أرمي نفسي م الشباك ولا مذبحة القلعة بتاع محمد على كلاي
أيوة يا دكتور أيمن..اتكلم اتكلم ..ماتتكسفش
الحقيقة هو الموضوع محرج شوية
ياسلام أيوة كده هينطق باموت انا في المواضيع المحرجة دي..خير ان شاء الله
الحقيقة حضرتك عارفة ان انا بقالي 7 سنين متعين ده غير شغلي في الصيدلية بره و الحمدلله يعني احنا مستريحين ماديا
أيييييييوة ..هو ده اللي انا عايزة أسمعه من زمان..سيبك من بحبك و الا انا معجب..مادام قاللي انه مستريح ماديا يبقى فيه أمل الموضوع يتم
ربنا يزيدك يا دكتور بس انا ايه دخلي في الموضوع بالظبط
الحقيقة..أأ..أنا ..يعني..كنت بافكر في الإستقرار
هيييييييه...يحيا العدل ..يحيا العدل
هو حضرتك لسه ماستقرتش حقيقي..والا اعرف
لا الحقيقة لسه و من أول ما اشتغلت معاكوا في المكتب و انا الفكرة بدأت تلح على دماغي قوي
يا سلام يا سلام ..هو ده الكلام
طب وانا دخلي ايه في الموضوع ده
ازاي يعني ده حضرتك أهم شخص في الموضوع ده
الدنيا بتلف بيا يا جماعة حد يسندني لو سمحتوا
ازاي يعني
الحقيقة أنا كنت طمعان ان حضرتك
أيوة
يعني ان حضرتك
أييييوة
تكلميلي الآنسة نهى
نهى ؟..نهى مين
نهى اللي معانا في المكتب أنا لاحظت ان حضرتك أقرب واحدة ليها عشان كده فكرت إنك أنسب واحدة تكلميها في الموضوع ده
سواطير و ضرب رصاص..مشنقة زي بتاع عمكوا صدام متعلق فيه الزفت ده و جنبه البت التانية اللي اسمها نهى دي.و انا ماسكة العصاية و تك تتقطع رقبتهم هما الإتنين
نهى؟..انت جايبني هنا عشان تكلمني على نهى
الحقيقة مش انا اللي جايب حضرتك هنا ده حضرتك اللي جايباني
نعممممم
أيوة دانا حتى خايف ان الآنسة نهى تاخد على خاطرها وتزعل
انت
يا بني آدم انت مافيش عندك دم؟ والا مابتفهمش خالص ها؟
قمت ساعتها وقفت و عمال الكافتريا بيبصوا عليا كأنهم بيشوفوا مشهد من فيلم كينج كونج
خلاص البعيد غبي للدرجة دي تجيب واحدة هنا..
.حضرتك اللي جايباني.
.بس اسكت ..ماتتكلمش خالص.
.جايبني مرسال بينكم ليه ؟.
.مالاكش لسان تكلمها بيه
يا آنسة أنا كان قاصدي بس
قلت لك ماتتكلمش
في اللحظة دي خدت بالي اني واقفة و في ايدي طفاية السجاير اللي كانت على الترابيزة و الواد كاشش في مكانه و خايف مني و العمال بتوع الكافتريا رافعين سماعة التليفون و بيطلبوا الأمن يجوا يفضوا الخناقة أو جايز بيكلموا العمال بتوع المشرحة عشان يبقوا يجوا يشيلوا الميتين
لقيت شكلي مش ظريف قوي خصوصا ان المرضى بدأول يطلعوا من أوضهم عشان يتفرجوا
نزلت الطفاية من إيدي..عدلت هدومي و طرحتي ..رسمت على وشي ابتسامة كبيرة
عموما يادكتور انت ممكن تبقى تكلم الآنسة نهى وجها لوجه أحسن المواضيع دي مش عايزة واسطة
عن إذنك
و لفيت و خرجت من الكافتريا و الواد لسه قاعد متسمر زي ماهو..افتكرت حاجة فرجعت تاني الواد شافني قام جري استخبى ورا أم طارق بتاعت الكافتريا
آه على فكرة لما تتجوزوا..ماتنسوش تعزموني ع الفرح ..أوكي ..

حصل ايه بعد كده ؟..مش عارفة بالظبط
أيمن..الله يمسيه بالخير بأه ..أيمن راح ليبيا ..و بيقولوا اتجوز من هناك
قال نهى قال..نهى دي صاحبتشي و حبيبتشي...أماااال..هي الصداقة دي بالساهل
طبعا لأ

almazuona
15-09-2008, 07:59 PM
جميل جدا يادكتوره
أمتى حتكملي الحلقات الي جايه؟
بأنتظرها بفارغ الصبر

امانى
15-09-2008, 08:45 PM
معلهش .......بكره تلاقى فارس احلامك جاى على الحمار..........قصدى الحصان وجاى يخدك ...الصبر يا جماعه بس الصبر.............ههههههههههههه

almazuona
18-09-2008, 10:55 AM
يللا يادكتوره ممكن تكملي بقيه الحلقات

الدكتورة مها
18-09-2008, 10:43 PM
أسفة على التاخير يا جماعة

واتفضلوا الحلقة الجديدة

الدكتورة مها
18-09-2008, 10:48 PM
البت نهى اتخطبت....عااااااااااااااااا



لقد...نزل...علينا...الخبر....كالصااااااااااااعقة



البت السهنة ..ولا تقول و لاحسينا بيها..و لاسمعنالها لا حس و لاخبر..قال ايه نسيبها يوم نيجي التاني نلاقيها دخلالنا و واقفة في وسط الصيدلية و هووب رفعتلنا ايديها اليمين و الدبلة بتلمع فيها



مش تباركولي يا جماعة انا اتخطبت



الصيدلية اللي كانت في حالة حركة فجأة كل حاجة فيها وقفت في مكانها زي ماتكون بتتفرج على شريط فيديو و هنج فجاة عشان الهيد عايز يتمسح..كل حاجة وقفت حتى المرضى على الشباك وقفوا و بحلقوا و هما مش فاهمين" كأنهم بيقولوا"الجماعة دول ممكن حد فيهم يتخطب بجد"؟؟؟" شوية و الكل لفلها ببطء و عينيهم مبرقة و البت رجعت خطوتين لورا استعدادا للجري ..و فجأة انطلقت زغروتة مدوية كان مصدرها -طبعا- مدام سندس..ماهي مش خسرانة حاجة... و بعد ماانطلقت مدام سندس و خدت البت بالحضن و احنا بصينا لبعض على أساسا ان منظرنا هيبقى مش لطشيف لو مارحناش و هنيناها دلوقت..راحت كل واحدة فينا مطلعة من شنطتها الإبتسامة اللي شايلاها للمناسبات اللي زي دي-حلوة الحتة دي مش دي الإستعارة المكنية بتاعت النحو زمان؟-و الكل راح و هو عاصر على نفسه 12 كيلو لمون عشان نهني و نبارك بالمناسبة السعيدة..قال سعيدة قال



و البت عماله كل شوية ترفعلنا ايديها في وشنا كأنها نفسها تحط صابعها في عيننا..خلاص خلاص شفنا يا امي خلاص ..مش كده يعني مانتيش اول واحدة تتخطبي



طبعا بعد موجة التهاني اللي جاية من..القلب طبعا..عدى اليوم و كأننا في فيلم من أفلام الزميل الراحل شارلي شابلين..فيلم صاااامت مافيش غير نهى عماله توشوش مدام سندس و يضحكوا و يرجعوا يتوشوشوا و يضحكوا..آه ماهم خلاص هما الإتنين مرتبطشين زي بعض و كل واحدة ليها راجل



..بقية الصيدلية بأه..أجاركم الله..البت سماح كل شوية تقوم تقف في الشباك نقولها مالك ترد علينا
مخنوقة ..مخنوقة مش عارفة آخد نفسي


البت نيفين -ولأول مرة في تاريخ وزارة الصحة-تتعاطف مع المرضى و تكلهم بالراحة..تقريبا قالت يمكن دعاوي المرضى اللي بيدعوها عليها لما بترمي العلاج في وشهم تكون هي السبب في وقف حالها فقالت تغير الخطة و تخليها 4-2-4 يمكن ربنا يفك النحس


البت سمر بأه هي اللي قلقتنا قوي كل شوية تروح ناحية علبة سم الفران اللي في المخزن و تبصلها بصات غريبة كده و ده اللي خلانا طول اليوم مراقبينها و عمالين نبعدها عن أي كوباية شاي بتاعتها أو بتاعة نهى و ما ارتحناش غير لما بعدت عن السم و راحت تلعب بالمقص..المقص سهل ..هتعور حاجة هنقدر نلمها ..لكن سم الفران ده نعمل فيه ايه؟




أنا عن نفسي كنت فرحانة...آه فرحانة فيه حاجة؟؟...البت صحيح سهنة و غلاوية و سماوية و خبيثة ..بس زميلة كفاح يعني.
.و صحيح انا بقيت باعتبر أي حالة خطوبة او جواز على سطح كوكب الأرض إهانة شخصية في حقي..بس خلاص بأه يمكن تكون اول الطابور و الكل يكر وراها.
.وصحيح احنا قلنا كده لما مدام سندس اتجوزت من 4 سنين..لكن يمكن كل 4 سنين واحدة..بالمعدل ده هنحتاااااج
"4*13"
يعني.... 52 سنة على مانخلص لستة البنات اللي في الصيدلية ..لكن برضه أهو يبقى فيه أمل




عدى اليوم اللي كان اطول يوم في تاريخ البشرية و كل شوية ترميلنا فيه معلومة.

.أصل حسام..ده يبقى اسم المأسوف على شبابه
أصل في المستشفى بتاعته..يعني دكتور
أصل مامته الله يرحمها..و كمان مالكيش حماة ..يابنت المحظوظة




و فجاة في آخر اليوم تلتفتلنا بكل بجاحة قال و تقولنا



عن إذنكوا بأه يا جماعة أصل حسام هيجي يوصلني بالعربية بتاعته



...كام نظرة من تحت لتحت على 3-4 أصوات لمصمصة شفايف انطلقت من انحاء الصيدلية و راحت مكملة الجملة



ماتيجي يا مدام سندس نوصلك في سكتنا



طبعا ماهي دي المضمونة بقيتنا خطر على المحروس...الصراحة عندها حق أنا لو كنت أخدت خبر بالموضوع كنت بعته
بني غازي يروح يتجوز اخت مرات أيمن..الله يمسيك بالخير يا أيمن ويرجعك لأهلك بالسلامه



نزلت الهانم جري واحنا وراها بنتدألج ع لسلم و بنوقع كل حاجة في طريقنا المرضى و الموظفين حتى الشجر البلاستيك اللي قدام أوضة المدير ..عشان نلحق نتفرج ع المحروس و على عربيته



الواد مش وحش ..شغال يعني..هو صحيح رفع القلم الرصاص و كل شوية يلحق البنطلون قبل مايقع منه و ودانة واضح انهم واخدين موقف شخصي من بعض أو محترمين دماغه جدا لدرجة انهم واقفين الوقفة السودة دي..لكن خلقت ربنا يعني

صحيح لابس نضارة كعب شفشق مش كعب كوباية و كبيرة لدرجة انها مش بس بتعالج نظرة دي أكيد كمان بتعالج حواجبة و خدوده
لكن راجل ..هو حد لاقي رجالة محترمة اليومين دول



العربية صحيح مش عربية 16-اللي هي 4*4 بس انا باحب أختصر-لكن عربية فخمة برضه 128 حمرا موديل 79..و البنت قعدت جنبه في العربية ولا كإنها قاعدة جنب ابن رئيس مراجيح مولد النبي و بصتلنا بصه كلها غل و تشفي و مدام سندس ركبت وراها..الهي يشوفك الباشمهندس الشافعي و يطين عيشتك يا رب





أما روحت البيت و حكيت لماما بصت للتليفون و هي بتفكر و مدت إيديها و بدأت تطلب في رقم أنا حافظاه كويس قوي..رقم طنط حشرية


مديت ايدي و وقفتها قبل ماتكمل و بصينا في عينين بعض و انا باقولها بعمق و تأثر



لا يا ماما...لأ.. لسه ماوصلتش للدرجة دي



و بعدين مديت إيدي على نوتة التليفونات



هو.. أونكل ديسكو نمرته كام؟؟

امانى
19-09-2008, 02:13 AM
ليكى حق تقولى فى العنوان انها مالهاش حل..........بجد خرافه........عاوزين الباقى بسرعه جدا......مشكووووووووووووورة

nour eljannah
19-09-2008, 04:21 PM
اسفه اني اتأخرت ف قراءه كل الحلقاااااااااااااااااات دي

دائما متميزه ي دكتوره مها


ف انتظار الباقي


تقبلي مروري

almazuona
19-09-2008, 04:36 PM
مستنين الباقي يادكتوره
ياريت لو تحطيها بسرعه

القيثارة
19-09-2008, 07:42 PM
شكرا جدا د مها
علي عرضك الجميل
و المميز للقصص الرائعة
بجد حلوة قوووووووي
اسفة انى بقالي فترة مش متابعة
لكن كل اللي قراته حلو قوووووووى
مستنية اليوميات
الجديدة
والعريس الجديد
وربنا يستر:rolleyes:

الدكتورة مها
20-09-2008, 12:40 AM
السلام عليكم ورحمة الله وبركاته

ازيكم يا اجمل اعضاء

معلش اتاخرت عليكم النهاردة لكن انا جيت نورت الغيط ... قصدى البيت وجيبتلكم معايا الحلقة الجديدة

انا عارفة ان وحشوكوا عرساني؟؟..ماتشوفوش وحش..أنا شخصيا ماوحشونيش خاالص..أنا جاتلي منهم حالة اكتئاب كل أما أنام أحلم بكوابيس مالهاش أول من آخر..مرة أحلم بأيمن ماسك صابعين جلاش..مرة أحلم ببتاع لجنة السياسات معدي بالمكروباص على الرياض و مرة أحلم بالأخ اللي شبه عمرو موسى ده و أنا واقفة و ماسكاله الطفاية..مرتين تلاته كمان حلمت بكريم عبد العزيز بس ده مش موضوعنا دلوقتي خااااااااالص



و برضه من آثار الإكتئاب اللي بيحصل للوحدة بعد كمية محترمة من التجارب المحترمة زي اللي انا مريت بيها دي..بعدها مابتبقاش الواحدة عايزة تسمع كلمة عريس أو تشم حتى ريحته..طبعا أصلا لو له ريحة يبقى ماينفعش..يضرب جرس الباب أقوم أستخبى ورا ماما ..يرن التليفون أقوم أجري و أمسك في ايد بابا قبل مايرفع السماعة و الذعر في عينيا
لا يابابا بلاش..بلاش يا بابا..حرام عليك ..
ايه يابنتي في ايه ..جرالك ايه
لحسن تطلع طنط حشرية يا بابا و جايبالي عريس أرجوك يا حاج..بلاش ترد ع التليفون..اعتبرني زي بنتك
زي بنتي ..الحقي البت اتهطلت
ماما تيجي و تسلك ايد بابا من ايدي اللي قافشه عليها زي الكابوريا
معلش يا حبيبتي معلش و الله نصيبك هيبقى زي الفل..اهدي يا حبيبتي كده و صلي ع النبي
عاااااااااااااااااا..آه يا ماما آه..مش عايزة طنط حشرية دي تاني
خلاص يا بنتي خلاص ..يا رب يبعدها عن سكتك



و الحمد لله أبواب السما يوميها كانت مفتوحة و مش ماما تنقي دعوة حلوة كده زيي يا رب تتجوزي بكرة الصبح؟..لأ تيجي في حظ طنط حشرية بس كويس برضه أهو قضى أخف من قضى




قوم ايه ..ربنا رحمني من طنط حشرية و عوضني عنها بأونكل ديسكو..أونكل ديسكو ده -و اسمه الأصلي دسوقي- صاحب بابا من زمان بس راجل شيك كده و أمور و روش و يبان عليه العز...نعم؟..أتجوزه؟؟..أتجوزه ده ايه؟..بقولكم صاحب بابا..خلاص يعني مافيش تمييز
المهم أونكل ديسكو ده كان دايما يجي عندنا و يقعد يلعب هو وبابا..طاولة؟؟..مين جاب سيرة طاولة؟..قمار؟؟..إمشي ..قمار في عينك انت و هو..بيقعدوا يلعبوا بلاي ستيشان..أمال ماهو أونكل ديسكو مش أي كلام

يقعد يغلب في بابا يغلب في بابا لحد ماتقوم خناقة و بابا يرزع الجهاز في الأرض و يبقى صوتهم مسمع آخر واحد في عنبر الغيبوبة بتاع القصر العيني
انت راجل مالاكش فيها
انت اللي مابتفهمش
يا عم روح انت صحيح بتفهم في البلاي ستيشان بس زي ماشعبان عبد الرحيم بيقهم في الطاقة الذرية

..و نخش نسلك أنا و ماما تنوبني زغدة في جنبي أو بونية في عيني و بعدين يخلص الموقف و أونكل ديسكو متشعلق في بابا بيبوس راسه و
بابا يقوله الشيطان شاطر يا حاج ديسكو
و هو يقوله حقك عليا يا بو برايد
و تتكرر الحكاية كل خميس زي الساعة لدرجة ان الواد برررق ابن الجيران اللي قصادنا بيجيب العيال صحابه كل خميس يتفرجوا ع الخناقة ..فرقعة و مطاردات في البلاكونة و بونيات و شقلبظات ..أحسن من ميت فيلم للسقا ده اللي بيقولوا عليه




الخميس اللي فات بأه بابا مجهز البلاي ستيشان و الكراسي في البلاكونة ..و انا انتهيت من تمارين الضغط و الحديد استعدادا لدوري في التسليك و ضرب جرس الباب رحت افتح لقيت أونكل ديسكو مدخل وشه من فتحة الباب و بيقوللي بلهجة كده ماعجبتنيش ..إزيك يا حببتيييييييي..أخبارك ايييييييه
عارفينها الطريقة دي ..اللي الناس بيمطوا بيها الحروف قبل مايقولولكوا انهم جايبنلكوا باكو شيكولاته و بعد ماتحلموا بالكادبوري ..تطلع كورونا لبني من أم ربع جنيه
آآآآآآآآه ..عرفت ان الموضوع فيه إنه
بابا فيييييييييييين
مش هنا يا أونكل..سافر العراق ..جاتله إعارة سلام
و لسه هاقفل الباب الراجل الأروب حط رجله في فتحة الباب و زقه لما فعصني في الحيطة و دخل
هههههههه إعارة ايه يا بنت يا عكروتة إنتي؟..و الله دمك زي العسل من ساعة ماكنتي قد كده لغاية لما بقيتي عروسة زي القمر




آآآآآآه ..وضحت الرؤية مادام قاللي انتي عروسة ..مش بس كده ..ده من خلال خبرتي الحياتية الطويلة ..أي موضوع تجتمع فيها كلمة عروسة مع كلمة عكروتة يبقى أكيد لا يبشر بأي خير

اتجه للبلكونة اللي عارف طريقها كويس و انا من الصدمة قعدت على أول كرسي قابلني في الصالة انتظارا لوقع القضا المستعجل فوق نافوخي
شوية كده و سمعت ضحك و هقهقة و بابا بينادي ماما ماما طلعت م المطبخ اللي مقضية فيه نص حياتها و متجهه ناحية البلكونة
و انا شفتها من هنا و رحت مرمية على رجلها
بلاش يا ماما ربنا يخليكي
فيه ايه يا بنتي ايه اللي حصل
ماتدخليش يا ماما قلبي مش مطمن حاسة انه كمين
كمين ازاي يعني؟
حاسة ان أونكل ديسكو جايبلي عريس
طب يا بنتي ربنا يبعت..انتي مش كنتي هيتقلعلك عين و تتجوزي
لا يا ماما..خلاص انا عرفت حظي و نصيبي ..أنا مابيتقدمليش غير العاهات ..أنا خلاص ياماما هاقعد جنبك و هاسمع الكلام و هاغسل المواعين
ايه ده ..هتغسلي المواعين بجد
لألألأ..بلاش استغلال الظروف ده
..بس و النبي يا ماما و النبي ماتدخلي
ماتقلقيش يا حبيبتي ..انت عارفة ان اونكل ديسكو بيفهم و راجل محترم و معارفه كلهم ناس محترمين و لو جايبلك عريس أكيد هيقى محترم



بصتلها و الدموع في عينيا ..ذكية ماما دي ..عكروتة بتعمل معايا زي ماكانت بتقوللي زمان ..روحي المدرسة و انا أجيبلك صباع روج.....ايه دانا كنت في تالتة إبتدائي يعني عروسة قد الدنيا

يووووه ..برضه عكروتة و عروسة في جملة واحدة بس على رأي ماما أونكل ديسكو راجل محترم و غير طنط حشرية
خالص و لو جابلي عريس هيبقى راجل محترم
مش انتوا رأيكوا كده برضه
أما أخش أتصنت عليهم و أحكيلكوا المرة الجاية
ادعولي




http://www.yesmeenah.com/smiles/smiles/30/f%20(34).gif

امانى
20-09-2008, 12:56 AM
طب ليه كده.........عاوزة اعرف الباقى.........انام ازاى انا دلوقتى..........مش بحب التشويق ده ولكن مشكوووووووووووووووووووووووورة ومنتظرين البقيه

الدكتورة مها
20-09-2008, 01:57 PM
منورة دايما يا اخت اماني

ومتقلقيش الحلقة هاتنزل دلوقتى .... وبكدة تقدري تنامي ان شاء الله وانتى مبسوطة كمان

الدكتورة مها
20-09-2008, 02:09 PM
أختكوا بأه واقفة على باب البلاكونة بتلمع في الأوكر بكل براءة و سمعت الكلمة الموعودة..هما الصراحة حرفين إتنين

يييييس

و ده طبعا النص التاني من إسم المأسوف على شبابه العريس

عاديكم...ركبي سابت و دقات قلبي إرتفعت والدنيا لفت بيا و وشي إصفر و عينيا برقت ;)

آآآآآآآه يا نا ..عاهة تانية والا ايه؟

ماما خرجت من البلكونة و لقتني مربعة على الأرض رجلي مش شايلاني

راحت رافعاني بإيد واحدة..جامدة ماما و متأسسه::وواخدانا في حضنها

و بوسة من هنا و بوسة من هنا

مبروك مقدما يا حبيبتي

فيه إيه يا ماما بس؟

أونكل ديسكو جايبلك عريس

و فجأة ماما مالقتنيش قدامها
وقعت من وسط دراعتها و ربعت تاني ع الأرض

ياااادي النيلة

نيلة إيه بس يا بنتي يا حبيبتي

و هووب.. شالتني من ع الأرض تاني

ده عريس بأه محترم محترم و الحكومة كلها وافقت عليه قبلنا

الحكومة كلها؟؟ليه؟؟ يكونش جيمي فرقع خديجة و رجع لعقله و هيخطبني ..و النبي يا ماما ده أنا أبقى حتة سيدة أولى ؟... أوجه نشاطي الخيري كله للأطفال ضحايا التلفزيون المصري ..و الا أقولك لسواقين المكروباص ضحايا الحزام و الا أقولك..الستات ضحايا عمليات الشفط

ايه يا بنتي حيلك حيلك جيمي مين و خديجة دي تطلع إيه؟؟ده جايبلك عريس أهم من كده بكتير

أهم من كده؟؟قصدك....سيادة الـ...؟؟
يا بنتي هتودينا في داهية ..بصي طرطقيلي ودانك كده..إيه أول حاجة تخطر على بالك لما أقولك...ظابط شرطة

بوكس و قسم و عصاية مقشة

عصاية مقشة؟؟ يا بنتي باقولك ظااابط مش كناس

و النبي يا ماما انتي طيبه ماعادتش فارقة دلوقت الأدوات دي بقت بتستعمل في المهنتين

يا بت بلاش غلبة بأه..بقولك أونكل ديسكو جايبلك عريس مايترفضش..ظابط و من عيلة و متربي تربية عالية

يا سلام

و الله يا حبيبتي شكلها كده هتمشي المرة دي

ربنا يستر..و هييجي إمتى

هييجي يوم الإتنين الجاي

يشرف و يآنس..و نبتــــــــــــدي كورس التنضيف

و طبعا بعد كورس النضافة و التلميع بقى البيت بيبرق من بره و من جوه جت الساعة الموعوده

دقت الساعة و معاها جرس الباب

دقة و نظام ..أمال إيه..باحب انا الناس الملتزمة بمواعيدها دي ..كان عندي دايما أمنية دفينة إني أتجوز واحد دقيق في مواعيده ..يمكن لأن أنا مواعيدي بالظبط بالظبط زي مواعيد السكة الحديد..غير موثوق فيها على الإطلاق

دخل من الباب و قعدت أبحلق أبحلق من ورا الستارة اللي دابت من كتر ما ببحلق من وراها

عريض المنكبين رياضي قوي الشكيمة طول قي عرض في إرتفاع في عمق ..عنده كاريزما كده باينه حتى من قفاه

الله الله ..هو ده الكلام ..أبقى مرات ظابط بأه و أدخل على أي لجنة و أقول الكلمة اللي طول عمري باحلم أقولها...إنت يا بني آدم مش عارف بتكلم مين...أنا مدام اللوا فلان الفلاني ماتعرفوش


يا سلااااااااام السلطة حلوة و الله.شكلك كده سرك باتع يا أونكل ديسكو يا جميل
.واقفة انا ورا الستارة و سرحانة في اللجنة و البرستيج و باضرب بعيني كده لقيت لكوا عينه راشقه في الستارة و أنا من وراها ..يا ماما
جوز عيون إيه؟..دا غالبا بيبص للواحد كده يقر و يعترف على طول..طب كويس مش محتاج يعني أدوات الكناسين ولا السمكرية و لا حاجة من دي خالص..بس برضه مشكلة ..و انا هاخنصر مصروف البيت إزاي إن شاء الله..دا لو بصلي بصة واحدة هجيب كل اللي عندي على طول..مش مشكلة مش مشكلة مش هاغلب يعني أكيد هحلها


ماما جابت لي الصينية الموعودة و دخلت بيها قام وقف على طول ..مؤدب و الله ..و كان فاضله 3 سنتي و نص و يخبط في السقف..و ماله الطول هيبه برضه ..بعد ما قاعدنا بأه بدأت المعاينة ..أنا طبعا راسمة الهدوء و باصة في الأرض و كل شوية أضرب بجنب عيني كده و ألمحه ثانية أو إتنين ..لا والله شكله من قدام الستارة أحلى من وراها بكتير..مش حلو حلو يعني ..بس ملامح رجالي كده عليها مسحة وسامة معقولة
هو بأه راشق عينه في وشوشنا كلنا ..كل أما حد يتكلم يتعدله كده و يبصله بصة عمييييييقة أوي ..ماما جت تتكلم إدير بصلها لقيتها فصلت في وسط الكلام و قامت جري كأنها عاملة عاملة
بابا بأه جامد ..مش بقولكم بطل بلاي ستيشان..فضل و هو بيتكلم باصص للعريس و هو باصصله .ده يبص و ده يبص ..برافو يا بابا ..إديلوا نظرات خليه يخاف..بس مين بابا يا عيني ماقدرش يكمل ماتش البص الدولي ده ..شوية و فصل زي ماما..بابا صعب عليا صحيح بس برضه فرحت قوي بأخينا ده ..جامد جامد يعني ..و الله كويس هي دي الحيطة اللي كنت بادور عليها من زمان ..حاجة كده الواحدة تتسند عليها و تدخل في أي مشكلة و هيا قلبها جامد ..يا سلام هوده الكلام ..هو ده الـ..في اللحظة دي رشقت عيونه في وشي..أي..و الله حسيت إن وشي وجعني ..طب أروح فين و الا اعمل إيه..قلت أقوم أجري ورا ماما ..بس قلت عيب يا بت..لازم تثبتيله برضه إن إنتي بنت جامدة"أنا مش بتاعت الكلام ده ..أنا كنت طول عمري جامدة""..بس بس مش طالبة أغاني هو ده وقته
بصلي و فضل باصصلي ..و لأول مرة من أول ما قعد فتح بقه و إتكلم


إسمك إيه
ثلاثي
هه؟
إسمك ثلاثي مش فاكرة إسمك والا إيه؟
فاكراة فاكراة..إسمييييي..إسميييي؟..إيه؟..أونكل ديسكو..ماترد إنت
أونكل ديسكو مات على روحه من الضحك ..يا بنت يا عكروتة مش عارفة إسمك؟..إسمها يا سيدي
رفع إيده في وش أونكل ديسكو و خلاه بلع بقيت الكلام
أنا سألتها هيا..و المفروض هيا اللي ترد عليا


يا دي النيلة ..إيه الدهولة اللي أنا فيها دي..مش عارفة أتكلم ..و لسه هافتح بقي لقيته مطلع حاجة بتلمع كده من جيبه ..يا حلولي يا حلولي ..خاتم ده والا إسورة ..يا سلام راجل ذوق برضه الناس الشيك دايما لازم تدخل في إيديها حاجة دهب..مسكها بطراطيف صوابعة و إدهالي
..إيه رأيك؟
مديت إيدي ألحقها قبل مايغير رأيه و يرجعها في جيبه تاني
أول مامسكتها في إيدي إتذهلت
إيه ده..دي ولاعة
آه ..حلوة؟..
عجبتك؟
بس أنا مابادخنش
عارف عارف ..أنا بس بافرجهالك ..عجبتك؟..شوف كده يا عمي؟
بابا بص من بعيد ..آه كويسة
لأ إمسكها كده شوف تقيلة و الا خفيفة دي دهب 24 قيراط
بابا مسكها و قلبها في إيده شوية و قاله
يس أنا برضه مابادخنش
كويس و الله أحسن حاجة عملتها ..ممكن تنادي طنط تتفرج عليها
خلاص يا إبني و الله مصدقين إنها دهب
معلش معلش ناديلها برضه
خلاص يا إبني قلنا
من فضضضضلك ناديلللها
الجملة الأخيرة دي قالها بأسلوب خللا الدم يتجمد في عروقي ..معلش..بكره تبقي تعلميه يبقى حنين شوية في الكلام..مش عايزين نفركش الموضوع من أول قاعدة..معلش يا بابا ماهو بكرة يبقى نسيبك و ماحادش هيقدر يكلمك
ماما جت بعد ما بابا نده عليها و دخلت و ..شكلها كانت خايفة و بصت على الولاعة
حلوة قوي تعيش و تجيب
قام جري و أخدها من إيدها
لا ..دي بتاعتي..أنا بس كنت عايزكم تتفرجوا عليها
أونكل ديسكو قام و قاله
..ممكن أشوفها
لأ..مش لازم إنت يا أونكل


و مسك الولاعة بطراطيف صوابعة و حطها جوه جيبه و إتجه ناحية الباب
أنا هاستأذن بأه ..أنا سعيد جدا إن أنا إتعرفت بيكم..إن شاء الله هابقى أتفق مع أونكل و هو هيقولكم على الميعاد الجاي..عن إذنكم
و هوب لف و خرج من الصالون و فتح الباب و مشي..و أحنا واقفين مش فاهمين حاجة خالص
بابا بص لأونكل ديسكو


حاج ديسكو..إيه النظام ده؟
أونكل ديسكو و هو بيضحك
هههه..خير خير..ده راجل ليه هيبه و مالوش في الدلع..و مادام قال انه هيتفق معايا يبقى ماتقلقش مبروك مقدما
و هوب لف هو كمان و خرج



ماما ياعيني أعصابها ماستحملتش و إترمت على الكرسي و هيا بتنهج
أنا لا يمكن أوافق على الجوازة دي أبدا..يا لهوي ..ده إيه الرعب ده
جرى إيه يا ماما و إنتي خايفة من إيه..تكونيش هربانه من حاجة و خايفة تتقفشي؟
إمشي يا مهروشة إنتي ..يعني بتدافعي عنه..يا بنتي ده ممكن في أي خناقة يجرك ع المعتقل إنتي ماشفتيش كان بيبصلنا إزاي
يا ماما حمش شوية بس
حمش ؟؟..بكرة لو إتجوزك ده يكسر دماغك..يا بنتي ده بيفكرني بأحمد زكي في زوجة رجل مهم
ياستي أدينا هانستنا لما نشوف أخرته إيه ..بلاش نوقف إحنا المراكب السايرة و خلينا ورا الكداب لباب الدار
هو ده الكلام يا بابا...شكله مش عاهة قوي..مش كل يوم هامشي عريس ..أنا عايزة أخلص بأه
يا سلام ياختي؟؟..أما نشوف أخرتها معاكي إيه



طبعا أنا ليلتها ماجاليش نوم عماله أحلم بالظابط و اللجنة و النجوم اللي علي كتفه و أنا و انا بمرمط في خلق الله وانا مسنودة بأه..و من كتر التفكير مانمتش غير بعد الفجر بعد ماقمت صليت الفجر و استغفرت ربنا و قلت خلاص يا رب مش هامرمط في حد و لا هاكسر أي إشارة و هاكون مواطنة مثالية تلتزم بالقانون..بس طبعا نتيجة السهر ماقدرتش أروح الشغل تاني يوم و قعدت في البيت و طول النهار ماما تبصلي و تتنهد ..زي ماتكون بتقوللي اما نشوف هاتودينا فين وراكي


عدى اليوم على كده و تاني يوم رحت الشغل ..أول مادخلت من باب المستشفى عم محمد الأشكيف البواب بتاعنا اللي كل يوم بيستقبلني بتلات أربع دعوات أول ماشافني دير وشه الواحده التانية..خير اللهم أجعلة خير ..يظهر المدام صبحته بخناقة أو مسته على أنغام الشبشب أبو وردة..ماعلينا مانا مش هاقف أقرره و يشكيلي حاله
قلت أطلع على شغلي أحسن قابلتني مدام عواطف على السلم
يادكتورة
أيوة يا مدام عواطف فيه حاجة
أيوة يا دكتورة لو سمحتي عايزاكي في مكتبي شوية
دلوقت؟
يا ريت
رحت معاها على مكتبها في شؤون العاملين و كل أما أعدي على موظف يبصلي و يهز راسه
فيه إيه يا جماعة ؟..كلكم نايمين على أنغام الشبشب أبو وردة والا إيه؟
أيوة يا مدام عواطف خير
أستاذ حسين ..أستاذ فتوح ..لو سمحتوا شوية كده
إيه القلق ده بأاااه ..ده الموضوع خطير بأه..طب لو إختلست حاجة كانوا حولوني الشؤون القانونية لكن شؤون العاملين
قوليلي يا دكتورة..إنتي عندك مشاكل في حياتك و الا حاجة؟
مشاكل زي إيه يعني؟
يعني حالتكوا المادية كويسة ..باباكي بيصرف عليكوا كويس
في إيه يا مدام عواطف إيه الأسئلة العجيبة دي..مانتي عندك ملفي و عارفة بابايا بيشتغل إيه
طب معلش ..أنا زي والدتك ..صارحيني..حد من صاحباتك مشيها بطال و حبت تجر رجلك معاها
إيه أنتي إتجنيتي يا ست إنتي والا إيه؟
أمال بس المخبر بتاع الآداب ده كان ماشي يسأل عليكي في المستشفى إمبارح ليه
آداب؟..آداب؟..آداب إيه يا ست إنتي ..أنا ماعرفش حد بتاع آداب
أمال يا دكتورة يعني بيسأل عليكي ليه
مخبر ؟..آداب؟...يخرب بيييييييتك ياللي في بالي



ماقدرتش أستحمل و الا أفكر جالي شلل في مخي أخدت شنطتي و طيران ع البيت
إلحقيني يا ماما..شوفي المصيبة ..أنا ضعت ..،أنا إتدمرت...أنا إتبهدلت بهدلة الزمالك في الدوري يا ماما
عاااااااااااااااااااااااااااااااااااااا




طبعا ماما لما عرفت رقعت بالصوت و اتصلت ببابا و جابته على ملى وشه و لما حكتله نزل عشان يجيب أونكل ديسكو من قفاه وأونكل ديسكو بعد ماخد دش محترم من بابا قرر عمل مؤتمر قمة و بعت جاب سيادة وزير الداخلية مستقبلا
الحديث كله بيدور بيننا و احنا مولعين و بينه و هو أسقع من أطول لوح تلج قابلتوه في حياتكم



إيه يا بني آدم اللي انت عملته ده
إيه عملت إيه
إنت باعت واحد من الآداب يسأل على بنتي في شغلها
عادي أمال يعني هانزل أسأل بنفسي أمال المخبرين دول لازمتهم إيه
هو انت بتتحرى عن مجرم دي عروسة ..و بعدين مالاقيتش غير مخبر من الآداب يسأل عليها و في شغلها
طبعا ماهم مخبرين الآداب دول خبرة في السؤال عن البنات..المخبر بتاع حضرتك بأه من قسم المخدرات
يا سلام سلم إنت كمان بعت مخبر يسأل عليا شوية شوية تقوللي إنك بعت مخبر يسأل على مراتي
طبعا..بس ده بأه تبع التموين
إنت يا بني آدم إنت بتستهبل ..إنت فضحتنا كلنا
يا عمي النار ماتحرقش مؤمن
يا عيني يا عيني ع العقل و الحكمة و ان شاء الله التحريات اللي انت جمعتها دي أثبتتلك إن إحنا مجرمين يعني هتيجي تجرنا ع القسم إمتى إن شاء الله
لا يا عمي لا.. التحريات أثبتت إنكم ماشاء الله لا غبار عليكم خالص و الفيش كمان جاي نضيف خالص
أفندم؟..فيش؟؟..إنت إستخرجت الفيش بتاعنا و فتشت عليه
لا يا فندم و دي تيجي..أنت عارف ان الفيش لازم يتجدد كل 3 شهور..أنا عملتلكم واحد جديد
يا سلام و ان شاء الله أخدتنا نعمل فيش و احنا مانعرفش ..خدرتنا يعني
لا يا عمي مانا عندي بصامتكم




بصينا لبعض
بصامتنا؟
أه..من ع الولاعة




يا خراااااااااااااااااااااابي
دا أنا بصوت ..مافيش داعي أقولكم ع الباقي كفايا تعرفوا إن لولا وساطة أونكل ديسكو كنا إترمينا كلنا في المعتقل بتهمة إهانة ظابط أثناء تأدية وظيفتة
كانت إيه وظيفته؟



جمع تحريات عن خلية إرهابية مكونة من 4 أشخاص..إحنا التلاتة.....و أونكل ديسكو

nour eljannah
20-09-2008, 02:28 PM
أنا إتبهدلت بهدلة الزمالك في الدوري يا ماما

لا كدا انتي اتبهدلتي جامد اووووووووووووووي
هههههههههههههه

بجد روعه ي دكتوره
بجد بقيت بستناها بفارغ الصبر
بضحك عليها موووووووووووووووووت


ميرسي جدا جدا بجد
تقبلي مروري

الدكتورة مها
20-09-2008, 03:45 PM
انا كمان بقيت باستنى ردك ومرورك بفارغ الصبر

نورتيني يا قمر

ويارب باقي الحلقات تعجبك

امانى
20-09-2008, 08:02 PM
هههههههههه ههههههههههههه هههههههههههه ايه يا جماعه ده احنا كده هنفقد الامل ولا ايه؟؟؟هههههههه هههههههههه بجد مش قادرة ابطل ضحك دا انتى تتجوزى حرامى احسن.............................على الاقل هيخاف لتبلغى عنه مش هيرميكى فى السجن لو زعلتيه........تقبلى مرورى وشكرا ليكى يا دكتورة

القيثارة
20-09-2008, 08:10 PM
يا خبر
ايه اللي بيحصل ده؟
لا اونكل ديسكو نافع
ولا طنط حشرية
بس الازمة كده
كبيرة

هو انا عندى سؤال؟
هما كل العرسان مالهم كده؟
ايه اللي حصل


ربنا يستر
ونشوف العريس الجاي
الامل في ربنا كبير
لا يأس مع الحياة
ولا حياة مع اليأس

الدكتورة مها
21-09-2008, 03:44 PM
السابع

أسوأ جزء من أجزاء يومي..لأ ..من أسوأ الأجزاء-لأن المنافسة مشتعلة و مش قادرة احدد أي جزء أسوأ من التاني- المهم و بفارق ضئيل يتصدر القائمة ...رحلتي من باب الشقة الى بوابة العمارة .و بالعكس
لأني في الرحلة اليومية دي غالبا بقابل كل فرد من أفراد جيراني الأعزاء



الجيران عموما ممكن يشكلوا جزء كبير من حياتك و ممكن يكونوا مالهمش أي أهمية






أنا بأه جيراني من النوع ..العشري..الحنين..المهتم..المواسي..باختصار يعني..ناس لا تطاق

..


بيحبوا يعرفوا و يتدخلوا في كل تفاصيل حياتي و بيحققولي توازن كبير في حياتي اليومية-ايه ده مين اللي فتح التلفزيون؟-لأن مافيش انسان طبيعي بيعيش حياته في حالة مستمرة من التفاؤل و السرور-ايه؟..أيوة أنا متفاءلة ..فيه حاجة؟
- لازم يبقى فيه جزء كده نكد مطعم بحرق الدم و لازم يبقى فيه نص كباية فاضي يوازن نص الكباية المليان و الا الكباية ممكن تتدلق عليك وتغرقك و الناس تفتكرك عملت...والا بلاش..نرجع لموضوعنا






الرحلة اللي ممكن تستغرق دقيقة واحدة من باب الشقة للسلم ممكن تمتد كل يوم لحد ربع ساعة كاملة..و تمر الدقايق ببطء و أحس ان فيه حاجة تقيلة كابسة على مراوحي و مش قادرة أتنفس زي ماكون باتفرج على معتز الدمرداش والا تامر أمين...الستات يوقفوني و يفضلوا يبوسوا فيا و يمصمصوا شفايفهم



ربنا يعدلهالك يا حبيبتشي
معلش مابيقعدش غير بنات الناس
هو انتي لسه
لسه برضه
مافيش أخبار؟
لسه؟
لسه؟






طبعا مفهوم ان أكتر 3 حروف باكرههم في اللغة العربية- اللي مش فاكرة فيها كام حرف- هما اللام و السين و الهاء



الرجالة بأه بيصمموا يوقفوني و يدععععوا ..و انا أأمن...و يدعععععوا..و انا أأمن




يارب يرزقك بالزوج الصالح
آآآآآآمييييين
يارب يفرح أهلك بيكي
آآآآآآآآميييييييييين
يارب تلاقيلنا للواد علبتين لبن من المدعم
منننننيييييين؟؟








أسوأ أيام حياتي بأه هو يوم مابقابل أماني..فاكرينها؟..أفكركوا..أماني اللي هي أصغر مني ب 3سنين و اللي تبقى أم هند اللي عندها 6 سنيت..أيوة أيوة ..اتجوزت و هي عندها 19 سنة..و انا كنت عمالة أضضضضحك عليها و أقول عبيطة دي والا ايه؟..تفهم ايه دي في جواز والا مسؤولية في السن ده و الا حتى تعرف تختار ازاي...و مرت الأيام و ثبتت الحكمة اللي بتقول..لولاك يا لساني مانسكيت يا قفايا..مش انا اللي باقول ..دي طنط مامة أماني كانت بتقوله مرة وانا نازلة من ع السلم ..بتتشفى فيا عشان قلت لأ على أخو جوز أماني و بعبعت كده يعني بكلمتين مالهومش لازمة عن الإختيار الصحيح و السن المناسب و الكلام الفارغ ده..
ودارت الأيام و الشهور و السنين و ثبت بالدليل القاطع ان كلامي يصنف تحت فئة الخيال العلمي و أماني أهيه عندها هند و في بطنها مؤمن متوقع وصوله بين أي لحظة و التانية


و عشان الأمور تبقى واضحة أكتر لازم تفهموا ان اماني و جوزها الأستاذ فوفو"تقريبا اسمه عبد الفتاح" يعتبروا فولة و انقسمت نصين و لو معيار التوافق من 1 لـ10 دول ياخدوا 12و نص..مشكلة حياتهم بس هي الخناقة على المصروف ..مصروف البيت. مصروف مدرسة البنت. مصروف الماكياج-مصروف لماكياجه و مصروف لماكياجها-بالنسبة لشخصياتهم فهي واضحة جدا..هيا عاملة زي الربع جنيه المخروم بتلمع لكن فاضية من جوة..و هو عامل زي العشرة صاغ الورق..,موجود آه بس زي قلته و ماحادش بيديله أي أهميه






يوميها لسه بانزل على طراطيف صوابعي عشان ماحدش يحس بيا و هوووب ..اتفتح باب شقتهم و عقلي قاللي يا بتت اركبي الدرابزين و اعملي "سكي" لغاية البوابة..بس ..لأ..لأ..لأ..أنا دكتورة محترمة و لو حد شافني أعمل ايه ان شاء الله..المهم حصل اللي كنت خايفة منه و لقيت أماني جره في ايدها هند و قدامها بطنها فيها مؤمن واضح انه نايم جوه باطنها على ضهرة و حاطت رجل على رجل لأن بطنها كانت واخده شكل شبه المنحرف




امشي يا بنت بأه جننتيني..هلاقيها منك والا من اخوكي..الله ؟؟؟ ازيك يا حبيبتي
أهلا يا أماني عاملة ايه
البنت مجنناني و الواد محجر و مش راضي ينزل..على سيرة التحجير..مافيش عندك أخبار جديدة؟
بلعت الإهانة بمزاجي..ماعنديش وقت أخش في حوارات
ربنا يسهل يا أماني..عن إذنك
استني بس..ماهو لو ماكنتيش نشفتي راسك و كنت وافقتي على أخو فوفو..مش كان زمانك زيي كده دلوقت
نصيب يا اماني بأه ..هنعمل ايه؟
على رأيك خيرها في غيرها فوفو لسه مكلمني على واحد انما ايه..زي مانتي عايزاه بالظبط
ماظنش
يا بنتي بس خليكي متفاءلة..ده ايه أخلاق و دين و مابيفوتش فرض..هو فوفو ماكانش موافق في الأول عشان موضوع زمان..بس أنا ضغطت عليه
بصيت لمنظرها
..ضغطتي عليه؟ و لسه عايش
ههههههه..يوه دمك خفيف يا مضروبة..ايه رأيك الخميس كويس ؟..كويس أنا هاجيبه هو و العيلة ..و انتي ابقي البسي حاجة حلوة كده و بلاش مكياج..أنا قلت لك ده متدين
ياريت برضه لو انتي و الأستاذ فوفو جايين انتوا الإتنين كمان تخللوا بالكوا من موضوع الماكياج ده
هه؟..ماشي ماشي..بس باقوك ايه مشي أمورك بأي يا حبيبتي مش عايزين حد يشمت فيكي أكتر من كده
أكتر من ايه؟
ماتشغليش بالك..ههههه..الناس مابترحامش
على سيرة الناس اللي مابترحمش ..ازي مامتك؟
هه؟..حلوة حلوة..بتسلم عليكي
الله بيسلمها و يديها على أد نيتها
ان شاء الله..وربنا يقدملك الخير يا حبيبتي..باقوللك ايه شيليلي بأه البنت لحد البوابة
آآآه..هانبتدي حاجة قصاد حاجة
حاضضضضر..يا أماني..و ماتنسيش تبقي تسلميلي ع الأستاذ فوفو..و تقولي لأخوة ياريت مايبقاش لسه زعلان
لولو؟..ده لولو ده عسل و قلبه أبيييض مابيشلش جوه قلبه خالص
ده انتي لو كنت اتجوزتيه كان زمانك عايشة في سعادة مابعدها سعادة
و هو صحيح عمل ايه في قضية الشيكات بتاعته؟
خير ان شاء الله
و محضر السكر؟
ربنا يسهل
وقضية التحرش؟
ربنا يزيح عنه
وقضية الخلع اللي مراته رافعاها
ربنا ينصره ..بس باقوللك ايه ماهو ممكن برضه لو خلعته يبقى فيه نصيب و ربنا بأه يبقى قاسمكم لبعض

تفتكري؟
آه و الله ممكن.و ليه لأ



سؤال وجيه فعلا







عموما من خبرتي الحياتية الطويلة ماحكمش على العريس من خلال الواسطة ..مانا طول عمري بيجيلي عرسان عاهات عن طريق ناس زي الفل..طنط حشرية و أونكل ديسكو و غيرهم

ما تقاطعيش يا بت..مش هتخسري حاجة...

.....

..




يمكن

bloadbaby69
21-09-2008, 03:52 PM
ما شاء الله ايه الاسامي دي فوفو و لولو دول رجاله و لا كلاب رومي
و عاجبني المثل بتاعلولاك يا لساني مانسكيت يا قفايا
شكرا علي اليوميات الجميله يا دوك

nour eljannah
21-09-2008, 03:55 PM
ههههههههههههههههههههههه


يمكن
الله عليكي وانتي متفائله ههههههههههههههه

ميرسي بجد علي اليوميات
بجد دمها خفيف موووووووووووووت

يارب بقي اشوفك عروسه هههههههههههههههه

ميرسي ليكي
تقبلي مروري

الدكتورة مها
21-09-2008, 03:59 PM
تابع العريس السابع

يا أرضنا العطشااااانة نرويها بدماااااانا..شقااااانا..تصبح بالخير ماليانة

لقيت نفسي اليوم الموعود بادندن الأغنية الرومانسية دي في دماغي..هي أغنية رومانسية و حنونة جدا بس اللي ضايقني إني ناسية كلماتها.و ده خلاني أتشائم..حاولت أدور جوه مخي على مطلع أغنية تانية رومانسية من بتوع مطربتي المفضلة الساحرة الرقيقة شفيقة..ما أسعفتنيش الذاكرة
المهم في الآخر استقرت في خلايا المخ الرمادية بتاعتي أغنية رومانسية رقيقة

دقيقة حداد..دقيقة حداد..دقيقة حداااااااد

ارتحت للريتم الشجي ده و ابتديت أستعد لليوم الموعود
خرجت هدومي كلها من الدولاب و بدأت أدور على حاجة ألبسها

أنا مش منافقة..لايمممممممممكن أغير نظامي عشان خاطر حد..ده يبقى اسمه غش تدليس نفاق كذب..بس يعععععني.مش هنخسر حاجة لو وقفنا على أرض محايدة ..شديييت الطقم الأحمر..إخصصص أحمر و العياذ بالله لالالا..و بعدين لحسن يطلع زمالكاوي زي البيه الأولاني و بعدين دول بدأوا يكتروا في البلد اليومين دول

طب الطقم الفوشيا...لا والا فوشية ايه ..ده اسمه لوحده ممكن يخليه يقيم عليا الحد

طب نخليه الأصفر..لالالا..لون خليع الأصفر ده..بلاشه
و فضلت أطلع لون ورا لون و طقم ورا طقم بس مارتحتش نفسيا لأي حاجة منهم

آآآآه..و أخيرا..لقيت في أرضية الدولاب حاجة كده بيضه منفوشة..آآه..دي يا إما النموسية بتاعة جدتي يا إما الباراشوت اللي عمي نط بيه في حرب أكتوبر..مين اللي بيقول ماكانش فيه باراشوتات في حرب أكتوبر؟..انتوا هتفهموا أكتر من عمي؟..هو بنفسه أكدلي انه نزل بالباراشوت في سينا في 6 أكتوبر 74 و مادام قاللي كده يبقى لازم أصدقه أمال هيشتغلني يعني؟..مرت عليا لحظة من الفخر بعمي و بطولاته اللي واحدة منهم اتعملت فيديو جيم بيلعب بيها بابا وأونكل ديسكو كل أسبوع..و قررت اني بشوية دبابيس على حبة غرز هيكون ده هو الزي المناسب اللي أدخل بيه ع العريس المنتظر أبيض في أبيض..لون حيادي و بعدين فيه فرصة كبيرة ان الموضوع يمشي لأن الباراشوت ده زي ماعمي قاللي جالب للحظ و اللي يلبسه لا يمكن يجراله حاجه وحشة زي ماحصله و هو نازل ع الحدود و 4 اسرائيلين كانوا بينشنوا عليه و قعد يرقص في الرصاص يرقص في الرصاص و نزل سالم غانم فوق السطوح

مديت إيدي على علبة الماكياج و بعدين سحبتها أسرع ماباسحب المرتب من إيد الأستاذ رزق أول كل شهر..و قررت أعمل بنصيحة أماني و ماحطش ماكياج .. ده قرار صعب جدا لواحدة زيي لا يمكن تخرج من أوضتها من غيرالتظبيط اليومي
زي ماقلت أنا لا يممممممممكن أغير نظامي..بس يعععععني يوم واحد من غير ماكياج على الأقل هيريح بشرتي شوية
خرجت من أوضتي عشان أبدأ في موال التنضيف بتاع كل مرة..و في نص الصالة لقيت بابا اللي كان شايل في ايده كباية شاي و جرنال

صباح الخير
صباح النور
فيه حاجة جديدة في الجرايد؟
أكيد فيه..انتي مستنية حد؟
لأ عادي
أمال رايحة فين ؟
رايحة أنضف مع ماما
إيه ده هي مامتك هناكمان؟
أمال هتروح فين؟
و ناويين تقعدوا معانا كتير
بابا..فيه ايه؟..دي مبادئ الزهايمر والا ايه؟
بابا..بابا مين؟
و قربلي و دقق قوي في وشي
انتي مين؟
بابا..انا بنتك..مش عارفني
بنتي؟..بنتي؟..آآه بنتي..ايه اللي انتي عاملاه في نفسك ده؟..انتي حاطه ماكياج والا ايه؟..شكلك غريب قوي
آه معلش أصلي باجرب نوع جديد

الحمد لله ان العريس ده ماشافنيش قبل كده ربنا بس يستر و أماني و فوفو مايفتحوش بقهم

و بعد كورس التنضيف و تظبيط الباراشوت البطولي على مقاسي مع ترك خطوطه الأساسية ووسعه زي ماهو..ضرب جرس الباب..بابا فتح الباب و لقا قدامه شخصين مايعرفهومش
بعد شوية مقاومة و انكار و محاولات إقناع ..اقتنع بابا أخيرا ان دول اماني و فوفو و هز راسه و هو بيقول
مش عارف الناس شكلها بيتغير كده ليه؟..انا لازم أغير النضارة

دخلت الصالون معايا صينية الجاتوه المعتاده و قعدت أبص ع اللي قاعدين

اماني و فوفو دول؟..غالبا آه أنا عرفتهم من الهدوم هما كانوا مستغربين شكلي بس مش أد استغرابي لشكلهم و خصوصا فوفو
يا حلاوة..ده طلع شبه الرجالة أهه ده حتى فيه مبادئ شنب يحاول جاهدا إثبات ذاته..لكنه للأسف الشنب المناسب في المكان غير المناسب..و بين فوفو و أماني لمحت هند الصغيرة بتنقل عينيها في رعب بين مامتها و باباها بنظرة عجيبة كأنها طائر من طيور البطريق نام في القطب الشمالي و صحي لقه نفسه في بنها.مسكينة البنت أكيد جاتلها صدمة عصبية و تلاقيها فاكرة انها مخطوفة..صعبت عليا المضروبة

مش وقته ..خلينا في المهم وطيت راسي و بصيت في الأرض..و هي الحركة اللي بقالي 3 ساعات باتدرب عليها.انا عمري ماوطيت راسي لحد ..أولا لأني..عمري مادخلت قسم ..ثانيا لأني أحب أبص في عين اللي قدامي وانا باكلمه..أنا ماباغيرش نظامي.. بس يععععني كان نفسي من زمان أدقق في لون السجادة بتاعنا

طب و الله سجادة حلوة ياجماعة فيها أزرق و أحمر و..ص.ب.48...لأ ده مش عنوانا البريدي مكتوب على السجادة ..ده اللي العريس كان لابسه في رجله..صندل بني شكله مقاس 48..آآآآه..جاتلي قفلة في النفسية متمركزه في العمق العاطفي...صندل؟..هي حصلت؟..تتجوزي واحد لابس صندل..بس لأ..مش حنهبكها بأه..أنا في المرحلة دي مستعدة أتجوز أي كائن متعدد الخلايا مادام هينشلني من فترينة الجواز..مش مششششكلة الصندل ..نبقى نغيرهوله مش مشكلة هما صحيح بيقولوا الراجل بيبان من جزمته ..لكن ده طبعا كله كلام قديم وأنا لايمكن أعمله اعتبار خصوصا في هذه المرحله الإنتقالية الحرجة..طلعت بنظري لفوق لفوق لفوق..كويس لابس بدلة و كرافته..بس فين راسه؟؟؟؟..راسه فين؟؟..انا مممكن اتغاضى عن أشياء كتير..لكن ياربي أتجوز عريس من غير راس.قعدت أدقق قوي أدقق قوي و فجأه لمحت حاجة بتلعب كده...ياسلااام دي عنين شخص...آه و الله عنين شخص بتلعب أهه؟..بس فين بقيت الأجزاء..الفم و المناخير مش شايفاهم...دماغ العريس كانت عبارة عن كورة كبيرة من الشعر طالعلها عينين..شعره بحواجبه بدقنه بشنبه كلها عبارة عن شريط واحد سميك من الشعر ملفوف باحكام عجيب حوالين دماغه..يفكرك بالإنسان البدائي اللي كانوا بيدرسهولنا في التاريخ..لدرجة اني تخيلت انه هيقوم يشدني من شعري و يسحبني منه وراه ع الكهف...بسسسسس ..اهمدي و اتهدي..دقن ايه و شنب ايه اللي هيبوظوا جوازه؟..اعقلي كده وارسي و بعدين و مالوا يعني الشعر الغزير مش أحسن من العكس؟..بس بس ماتبقيش خايبة مانتي قدامك أماني أهه مثل عظيم عن التنازل عن كل حاجة من اجل تكوين شركة لتربية العيال..هي دي قمة التضحية من أجل الأجيال القادمة

على جانبي العريس لقيته جايب اتنين من اخواته واحده منشكحة ع الآخر صفين اسنان طالعلهم واحده ست و التانية واضح انها جاية غصب عنها..بتبصلي بغل كأني لسه مسلماها فاتورة التليفون..آآآه أنا عارفة النوعية دي..يا إما لسه ماتجوزتش و شايفه ان أي جوازة بتحصل على وجه الخليقة إهانة شخصية في حقها-بتفكرني بحد بس مش مركزة مين- يا إما متجوزة جوازة تعيسة و مستخسره أخوها الحيلة في أي واحدة يسعدها
أنا مالي و مالها..دع الخلق للخالق..أنا لا يمممكن أسمح لأي حاجة تبوظ الجوازة دي..كفاية بأه

العريس ابتدى يتكلم من مكان ما في منتصف نص وشه اللي تحت

بص يا عمي..احنا ناس نحب ندخل البيوت من أبوابها ..و احنا سمعنا كلام كتير كويس عنكم من الأستاذ عبد الفتاح
من مين؟
الأستاذ عبد الفتاح
مين الأستاذ عبد الفتاح
ده
و شاور على فوفو اللي للحظة بص وراه
مين ؟آه..أنا..أنا
أحنا طبعا مانعرفوش بطريقة مباشرة لكن الأخ عماد صديقه يبقى ابن عمي و سمعه بيشكر فيكوا جدا..و انا عن نفسي مستعد لكل طلباتكم ان شاء الله

ماما اتدخلت
على طول كده..مش الأول تقعد معاها و تعرفها
إييييييييه؟
ده الثنائي المرح بيصرخ في صوت واحد و هما بيخبطوا على قفصهم الصدري اللي قرب يتكسر
أ..أ..أنا قصدي يعني عشان التعارف وكده

يا حاجة احنا مانعرفش الحاجات دي احنا اهم حاجة عندنا الأصل

اتكيفت انا من الكلمتين دول..من غير قعاد بأه و كلام مالوش لازمة و بص تاني في الأرض لما رقبتي هتتكسر
عمياني كده ..يمكن هو ده اللي يجيب فايده

أيوه بس الأول نتعرف أكتر على شخصية حضرتك..يعني احنا مش من الناس اللي بتحب التزمت قوي
و مين يحبه؟
يعني من ناحية شغلها
دي مهنة سامية مافيهاش أي مشكلة
(والا كنت اعرف)
زيارتها لأهلها
طبعا دي صلة رحم
خروج وفسح
طبعا أنا عن نفسي أحب الخروج طالما في اماكن محترمة
التلفزيون و النت
طالما أنا واثق في عقلها اللي سمعت عنه كتير يبقى أكيد هاثق في اختياراتها
( ايه الحلاوة دي ..ده عريس فول أوبشان يا جدعان)
طب و بالنسبة يعني للماديات
أنا و الحمدلله عندي شقة كبيرة 4 أوض وريسيبشان كبير و جاهزة من كل شئ
ده شئ كويس جدا..يعني ان شاء الله لو فيه قبول.. يعني حاجات بسيطة بس اللي هتتشرى
لا لا القبول مضمون ان شاء الله
(ياواد يا ثقة)
و ان شاء الله مافيش أي شئ هنحتاج نشتريه
أيوة بس يعني العفش و الأجهزة
لااااا..و لا حتى دول..الشقة فيها كل شئ

ماخلاص بأه يا أمي..الأستاذ واضح انه شاري كل حاجة جديد في جديد ..هنطلب ايه أكتر من كده..بعد القبول ان شاء الله
لا لا..القبول مضمون ان شاء الله
(ثقة لا تزعزع)
و الأجهزة مش جديدة قوي يعني

ماما ابتدت تزوم

آه عادي ..يعني عازب بأه و كده و استعمل حاجات بسيطة استعمال بسيط
لا ..الحقيقة المسأله مش كده
أمال ايه يعني..انت شاري كل حاجة مستعمله
لا لا ..حاشى الله..انا برضه اعمل في بنات الناس كده؟
أمال ايه يعني الموضوع
في اللحظة دي سمعنا صوت انذار عربية
دي تقريبا عربيتي ممكن أطلع البلكونة أطفي الإنذار
آه طبعا اتفضل

و طلع العريس و معاه بابا وراه جري فوفو و أماني جريين وراهم هند عايزين يطقسوا و يشوفوا نوع العربية ماما قامت تجيب حاجة ساقعة و فضلت أنا و الأختين الحلوين في الصالون لوحدنا

و فجأه أخته اللي كانت منشكحة قوي دي ابتسامتها راحت في لمح البصر و بصتلي نفس البصة بتاع أختها التانيه..انا كشيت في مكاني و ارتعدت فرائصي-الجماعة بتوع النحوي لو سمحتوا يبقوا يقولولي فرائصي دي اللي هي ايه- قاموا الأتنين و جم نحيتي

يا ماماااااا..قاموا قعدوا جنبي زي أسدين قصر النيل واحدة ع اليمين و التانية ع الشمال وكل واحدة استلمتلها ودن و وطت على ودني عشان تقرمها

لأ لأ ماعضونيش بس همسو في ودني بصوت واطيييييي
بلاش الجوازة دي أحسن لك
مش هاترتاحي إحنا عايزين مصلحتك
تيبه مش زي تيبك و مش هتتفقوا
ده غير ان احنا لا يمكن نسمحله يتجوز دكتورة
انتي عايزة تيجي تعمليلنا فيها بنت بارم ديله
بص أنا بابايا مالوش ديل
هش..وطي صوتك
مخك في راسك تعرفي خلاصك
في اللحظة دي دخلوا الباقيين و انقلب الهمس لأحضان و بوس
يا حبيبتش أنا حبيتك قوي
و الله دانتي هتبقي عروسة تجنن
داحنا هنشيلك على كفوف الراحة

الكلمة الأخرانية دي ماعجبيتش ماما اللي كانت شايفاني باستغيث بيها عن طريق التخاطر العقلي الأثيري

ايه ده ؟..هو انت شقة حضرتك في بيت العيلة؟
لا لا لا..أنا شقتي بعيدة عن بيت العيلة انا عارف الموضوع ده حساس لناس كتير
يا أم العروسة و ايه يعني حتى لو في بيت العيلة..ده الراجل شكله من عيلة محترمة و أصل طيب حتى باين ع الآنسات
آنسات..آنسات مين دي كل واحده فيهم عندها 3 عيال
آه انا آسف ياسيدي قصدي المدامات
ان شاء الله مع الأيام نتعرف بيهم والا ايه؟
طبعا ماحنا لازم نتعرف مش احنا و بنتكوا هنعيش في شقة واحدة
نعمممممممم..ازاي يعني..انت مش قلت شقتك بعيد عن بيت العيلة..أمال ازاي اخواتك يعيشوا معاك
انتوا فاكرين دول إخواتي؟
أمال ؟
لااااااا..دي تهاني مراتي الأولانية..و دي أمل مراتي التانية أنا ماشي حسب الشرع لا يمممكن أتجوز واحدة غير لما يكونوا اللي قبلها موافقين عليها..أماااال كله حسب الشرع

عارفين شعور تيتانك لما خبطت في جبل الجليد..لأ طبعا ماتعرفوش و هي تيتانك كان ليها شعور؟..بس يعني تخيلوا حاجة زي كده

حتى ماقدرناش نزعق ولا نعترض ولا ندألج حد من ع السلم

امشي يابني ..امشي ..روح في حالك .. احنا ماعندناش بنات للجواز

يعني مافيش جواز؟
لأ
و النبي صحيح
قلت لك مافيش
لولولولولولولولولولولولولولولي
لولولولولولولولولولولولولولولي


و دي كانت أول مرة تدوي فيها الزغاريط في صالوننا المتواضع




و العاقبة عندكم في المسرات

nour eljannah
21-09-2008, 04:25 PM
..آآآآه..جاتلي قفلة في النفسية متمركزه في العمق العاطفي...صندل؟..هي حصلت؟

لا صندل لا بصي علشان انتي اتنازلتي ف الاول هههههههههه


وبعدين عجبتني اوي وانتي بدوري علي وشه
ههههههههههههههههههههههههه


ب بجد ايه الناس دي

دا انتي بتشوفي بلاوي ي بنتي والله ومستحمله هههههههههههههههههه


ميرسي بجد ي دكتوره بجد تحفه
ف انتظار بااااااااقي اليوميات

امانى
22-09-2008, 01:42 AM
يا خبر ابيض ومهبب.............انتى يا بنتى حد باصص ليكى فى الجوازة الوحيده اللى المفروض هتتجوزيها ولا ايه؟؟؟ابقى قولى اذكار الصباح والمساء...............هههههههههههههههههههههههههههههههه
شكرا يا دكتورة مها على الحلقه دى

eng_emmo
22-09-2008, 02:45 AM
هههههههههههههههههههههههههههههههه
انا اسفة على التأخير بس انا لسه شايفة القصة حالا
بجد روعة و جميلة و مضحكة جدا و انت دمك خفيف و عسل و الله يا رييت تكمليها انا مستنية اقرا الباقى بجد

الدكتورة مها
23-09-2008, 12:35 AM
طبعا نورتوني كلكن بردودكن الجميلة

بس اجب اقولكم ان اليوميات دي من كتاب عاوزة اتجوز

للكاتبة غادة عبد العال

ونزلتها ليكم بس بطريقة مختصرة

ويارب باقي اليوميات اللى هانقلها تعجبكم

الدكتورة مها
23-09-2008, 12:41 AM
كيف تصطادين عريسا


يا سلام يا سلام..انتي و هي و هو جايين جري عايزين تاخدوا نصايح..طب منيين..و انا لو كان عندي معلومات قيمة زي دي مش كنت عملت أنا بيها؟؟حاجة غريبة و الله




المهم عنوان البوست ده هو نفسه عنوان كتاب بيقولوا موجود في السوق دلوقت و مكسر الدنيا...أنا طبعا سمعت اسم الكتاب من واحدة زميلتي من هنا و كنت في ثواني واخدة القرار طيران على المديرة



لو سمحتي يا دكتورة ابتهال..عايزة آخد إذن
ماينفعش النهاردة فيه تفتيش و مافيش أذونات
هو انا باطلب حاجة غير قانونية ده حقي الي بيكفله ليا لدستور
رفعت عينيها و برقتلي زي ما أي مدير متدرب ان جهازة العصبي كله ينتفض اذا سمع أي موظف عنده بيقول أي كلمة فيها ريحة سياسة
نعم؟..دستور..ايش عرفك بالكلمة دي
أ..أ..قصدي القانون..حقي اللي بيكلفله ليا القانون
قلت مافيش


مابدهاش بأه الموضوع عايز استخراج الأسلحة الذكية قعدت أثقلب في مخي على مشهد حزين ..أكتر ذكرى حزينة في دماغي ليوناردو دي كابريو و هو بيموت في تيتانك... أول ما عرفت انا هاقبض كام من شغلي كل شهر..صورة جواز كريم عبد العزيزأيواااه ..صورة جواز كريم

إهئ أهئ إهئ..ماهو لو حضرتك تعرفي ظروفي
ظروفك ..ايه يا بنتي فيه ايه؟ قوليلي أنا زي والدتك فيه حد عندكوا عيان .حالة وفاه كفالله الشر ايه قوليلي
مش عارفة..قصدي مش هاقدر أقولك ..كل اللي أقدر أقولهولك اني لا يمكن كنت طلبت الإذن ده الا في ظروف قهرية زي اللي عندي
طب بس أصل التفتيش
عااااااااااااااااااااااااااااااااا
طب خلاص خلاص..هاقولك نظرا لظروفك اللي واضح انها قهرية ..ممكن تمشي و انا هابقى أسوي موضوع الإذن ده مع مدام أمل بتاعة الإمضا




و قبل ماتكمل آخر حرف من آخر كلمة كنت اختفيت من المكتب طيران على بره المستشفى ..دي فرصة لازم أقتنصها..و أنتوا عارفين الحالة ايه يعني فرصتي في شرا الكتاب ده زي فرصة سعد الصغير في الحصول على جايزة نوبل

لازم اتحرك ... بسرعة المعركة على أشدها و يوم بعد يوم العداد بيعد و ماعادش فيه وقت نضيعه.و اذا كان في الكتاب ده الحل..فلايمكن أضيعه من ايدي أبدا





جريت على عم صبحي بتاع الجرايد اللي جنب المستشفى لكن اول مارحت لقيت 2-3 دكاترة من اللي شغالين معايا في المستشفى طب و ايه الإحراج ده بأاااه؟



خدت عم صبحي اللي يعرفني عشان باشتري منه الجرايد كل يوم على جنب

بقولك ايه يا عم صبحي
أيوة يا داكتورة
فيه كتاب كده شفت إعلانه في الجرنال امبارح
كتاب ايه
كتاب كده الظاهر انه كوميدي يعني فيه نكت..اسمه كيف
تصـطادين عريسا( بصوت عالي سمعه الإتنين اللي كانوا واقفين)
جرى ايه يا عم صبحي انت هتسيحلي والا ايه
لا يا دكتورة أصل حضرتك اتأخرتي قوي..أنا كان عندي نسختين و بعدين من كتر ماتسأل عليه بعدت جبت 25
طب كويس اديني بأه واحدة منهم
مانا يا دكتورة بقول لحضرتك اتأخرتي ده الخمسة و عشرين نسخه خلصوا قبل ماينزلوا من على عربية الجرايد
ايه ده و مين اللي خادهم..
ال12 اللي مع حضرتك في الصيدلية و تشكيلة ممرضات كده
يا لهوي حتى المرضات عندهم أزمة في الجواز..ده كده يبقى القيامة قامت يا جماعة


سيبت عم صبحي و مشيت بعد مالمحت الإتنين الدكاترة بيسألوه على نسختين من الكتاب لإخوتهم البنات
طب ماكل واحد يتجوز أخت التاني و خلاص و ايه يعني الإتنين متجوزين..المفروض صحاب يساعدوا بعض..ناس غريبة مابيفكروش بأي منطق




افتكرت مكان صاحب مكتبة بعد المستشفى بيجي 3 شوارع كان دايما بيبقى عنده كميات كبيرة من أي كتاب موجود في السوق و اي كتاب ناقص في السوق دايما أبقى عارفة انه أكيد عنده نسخة والا نسختين




لو سمحت كنت عايزة أسأل عن كتاب ..مش ليا يعني ..ده لواحدة صاحبتي
ليكي يا أبلة والا لصاحبتك هو انا هاحقق معاكي؟..اسمه ايه الكتاب
اسمه..هيا قالتلي بس مش فاكره قوي..تقريبا كيف توقعين..كيف تحصلين..كيف
كيف تصطادين عريسا
آه تقريبا كان اسمه حاجة زي كده

لقيته طلع أجندة صغيرة كده و بدأ يكتب
6/2009
نعم؟
دور حضرتك أنا هاحجزلك نسخة بس معلش الطلبات كتير كان ممكن المعاد يبقى بعد كده بس حظك ان واحدة ربنا عدلهالها و اتخطبت و جات لغت الحجز
يا سلام وانا هاستنى سنة بحالها
يا أبلة مانتوا كده كده مستنيين مش هتفرق يعني




لميت كرامتي المتبعترة و قررت اني مش هاشتري الكتاب..ما هي مش طالبة تهزيئ كمان من بتوع الجرايد..و بعدين مانا على رأيه كده كده مستنيه يومين تلاته بأه سنة مش فارقة خلاص خلاص ولا كتاب ولا بتاع هو يعني فيه ايه الكتاب ده؟
خدت بعضي و قررت أروح قبل البيت بشوية شفت مكتبة صغيرة كده و عارضه كتب كتيرة في الواجهة رجع عقلي يوزني..يا بنتي ماتجربي مش هتخسري حاجة يوضع سره ..قاومت الرغبة المتوحشة جوايا و كالعادة فشلت رحت ع المكتبة رجل تودي و رجل تجيب




لو سمحت فيه كتاب كده عايزة أسأل عليه..من الآخر اسمه كيف تصطادين عريسا
موجود
ايه؟..بجد؟ موجود؟
خرجت 3 جنيه من شنطتي..رخيص آه بس جايز يكون فيه الحل
30
هو ايه اللي تلاتين؟..تلاتين جنيه ؟ايه التهريج ده هتضرب سعره في 10 أضعاف؟..ايه الإستغلال ده

بصلي بصه كأنه بيقوللي صرخي للصبح ولااااا هاعبرك..بصيت صاغرة جوا شنطتي..الله يلعن أبو الذل..طلعت التلاتين جنيه و اديتهومله

دولار
أفندم؟
دولاااار 30 دولار
دانا هاطلبلك البوليس تلاقيك حتى ماعندكش الكتاب انتوا نصابين والا ايه



مد ايده تحت المكتب و طلع نسخة من الكتاب ملفوفة بحذر بالغ في طبقات من السلوفان
الكلام وقف في زوري وانبهرت و اذبهليت ..أهه ..الحل أهه..مين كان يصدق ان الحل لمشكلة الجواز يبقى في كتاب ..طب مش كانوا نزلوهولنا في مشروع القراءة للجميع كان على الأقل يبقى أفيد من أي حاجة تانية نزلوها ..ده هيحل مشكلة المجتمع المصري كله و مديت إيدي على الكتاب و فجأه سمعت فرملة عربية جامدة بره المكتبه و لقيت واحدة ست نازله منها و سايباها في وسط الشارع..الست كانت بتجري زي ماتكون في الماراثون و نطت نطة لقيتها جوا المحل و ماسكة ايد الراجل بالكتاب




ايه ده انت كنت هتبيعه أنا جبتلك العشرين دولار مش قلتلك هاغير فلوس و اجيلك
الهانم هنا هتدفع تلاتين
الست لفتلي مذعورة تلاتين
انتي هتدفعي تلاتين؟
أنااا
لفت تاني
أنا كنت عارفة انك هتعمل كده عشان كده عملت حسابي التلاتين دولار أهم
بس الآنسة متهيألي ممكن تدفع أكتر

الست لفت و مسكت في ايدي

أرجوكي أرجوكي انتي ماتعرفيش حالتي أنا عندي 4 بنات لو ماجوزتهمش قبل ما يوصلوا التلاتين هاموت أرجوكي انتي مالكيش أم أرجوكي سيبيلي النسخة دي و ديني تليفونك وانا لما أخلص جواز الأربع بنات أكلمك و أبعتلك الكتاب





يا نهار أبيض لسه هاستنى أرررربع بنات..ده 6/2009 كان أقرب..بس تلاتين دولار ايه اللي هادفعهم طب و انا أجيب تاجر عمله منين دلوقت ..الست دي فعلا بتفكرني بماما و في ظل الظروف الراهنة و أزمة الدولارات اللي في البلد ماكانش فيه مفر من اني أتنازل عن الكتاب و جرت الست بيه لعربيتها و هي بتطلق صيحات الإنتصار


ويل يا ويل ويل يا ويل

..الأمهات كلهم لسعوا يا جدعان




و من هنا من موقعي هذا..قررت إني أسأل أولوا الخبرة من نساء العائلة و هي خطوة الكل مستنيها خصوصا من نساء العائلة الي انا واقفالهم في أول الطابور و قاطعة عن بعض بناتهم مايه و نور..و كمان هتبقى مناسبة هايلة للستات في فرع العيلة من ناحية بابا عشان يثبتوا ان مامتي خايبة و انهم هما اللي جابوا الديب من ديله




فقبل ما أقدم على الخطوة دي و أعمل فركيشة بين العيلتين اللي أساسا مش ناقصين...فلو سمحتوا يا جماعة اللي قرا حاجة من الكتاب يشاركنا بمعلوماته و اللي عنده موهبة طبيعية و مهارة فطرية و ذاكرة فوتوغرافية و نفذ أي طريقة ممكن تنفع في الموضوع ده ..فياريت مايبخلش عليا و على الحبايب و القرايب و حتى الأغراب..





..و هنيالك يا فاعل الخير و الثواب

الدكتورة مها
23-09-2008, 12:50 AM
هيا بنا نصطاد (http://wanna-b-a-bride.blogspot.com/2007/07/blog-post.html)





أزيكم يا جماعة ...بأه انا بأه ايييه..بعد ماقلتلكم على موضوع الكتاب ده أكيد هلاقي فيكم..اللي مش مصدق..و اللي فاكرني باهرج ..و اللي بيتريق...

المهم


أنا عن نفسي كان شاغلني قوي الموضوع ده و كنت مستغرقة فيه بكل جوارحي ...اللي أعرفها و اللي ماعرفهاش و عملت جولة تانية للبحث عن الكتاب ..لكن بدون أدنى بارقة امل ..تقدروا تقولواكده اني رجعت بخفي حنين -الناس المثقفة اللي بتبقى مستعدة كل مرة أسأل سؤال غبي زي ده يبقوا برضه يقولولي ايه موضوعة الأخ حنين ده- وكنت خلاص على آخر شعرة قبل ما يجيلي حالة احباط مزمنة و اكتئاب موسمي حاد ..ماهو واضح جدا ان انا فاشلة في موضوع الجواز ده.لكن كمان أبأة فاشلة في البحث عن الكتاب اللي بيشرح طريقة الجواز..لأ ده كتير قوي...


أنا كل اللي محتاجاه حد بس يقوللي يا جماعة ..إعملي يا دكتورة و انا هاعمل على طول..دانا حتى شاطرة و نبيهة و بافهمها و هي طايرة في كل حاجة..مخي بس اللي مصدي و مابيشتغلش في موضوع الجواز ده.محتاج بس شوية صنفرة .و كل شوية يقولولي شدي حيلك شدي حيلك..و انا مش عارفة أشده إزاي...طب بس قولولي و انا أشده على طول

أنا قلت خلاص مافيش غير اولوا الخبرة و الأقربون أولى بالمعروف ..خليني أبدأ بعيلتنا.. يمكن.



أتاريني كنت باقوم بالحوار ده كله بصوت عالي و قدام جدتي

يا دي النايبة ...انتي اتهبلتي يا بت والا ايه؟
لا يا تيتة ماتهبلتش ولا حاجة
لأ قولي قولي ماتخافيش..ماهو أنا قلت من زمان من أول ابني ماحب يتجوز الست دي اللي هي أمك...قلتله دي شكلها ضاربة و هتجيبلك عيال كلهم مجانين

ماما مش مجنونة يا تيتة دي ست الكل..هو فيه زيها
أيوة أيوة يا ختى ..مين يشهد للعروسة

لا يا تيتة لا ..ماتقوليش الكلمة دي في وشي أنا خلاص اتعقدت منها
اتعقدتي...أنا قلت من زمان لإبني لما جه يتجوز الست دي اللي هي أمك قلتله دي مكلكعة و هتطلعلك عيال كلهم مكلكعين
أوووه يا تيتة ..قلت لك مامتي زي الفل و بعدين دي جدعة جدا على الأقل عرفت تطلعلها بعريس زي الفل زي بابا ...والا ايه
طبعا أبوكي ده زي الفل ده ابني انما أمك
هاااه
حلوة برضه حلوة ..أهي خلفتكوا و خلاص...لكن قوليلي انتي اتعقدتي خلاص...لأيه يا بنتي..ده النصيب بيجي في ثانيه
ما هو مش راضي يجي يا تيتة ..مش عارفة جاي ماشي من حلايب و الا ايه اللي معطله ...قوليلي يا تيتة انتي اتجوزتي ازاي..يعني كانت ليكي طريقة كده وقعتي بيها جدي والا ايه؟
بس يا بنت اختشي

لا و النبي يا تيتة اديني من خبرتك ..أصلي خايبة قوي في المواضيع دي

مع ان أمك بالذات استنصحت في الموضوع ده.نهايته.يا بنتي مافيش راجل بيتجوز كده بمزاجه لازم حد يزقه ..أمه بأه إخواته...و لو لا دول ولا دول يبقى العروسة نفسها
يا سلام ع الخبرة يا تيتة ..الدهن في العتاقي صحيح
أمال ايه..إسأليني أنا..دانا كنت زمان ايه..يا سلام ع الأيام..دانا كنت مبهدلة الدنيا
أيواااه مبهدلاها ازاي بأه اشرحيلي ربنا يخليكي

بصي انا هاديكي خبرتي ..بس ده ايه يبقى بيني و بينك ماتحكيش لحد و تضيعي هيبتي قدام العيلة
(آه دا واضح ان الموضوع خطير ..اديني خبرتك يا تيتة( أنا شكلي هانصدم في العيلة دي
أنا كنت بأه حلوة أحلى بنت في المنطقة
مش باين يعني
ايه؟..بتقولي ايه علي صوتك
لا مافيش حاجة ..بقول ماهو واضح
آه كنت أطلع بس في المشربية أملى القله و اطول شوية يكون الشارع انقلب و ليلتها يكون عند أبويا 4 عرسان
بس كده تطلعي تدلعي و تملي القلل
و هي دي كانت شوية مانا كنت باطول شوية و أدلدل الضفاير اللي لون الدهب من الشباك و يهفهفوا مع كل هبة هوا و احنا الصراحة كان عندنا قلل كتير
طب و اللي ماعندوش قلل زي حالتنا يعمل ايه
يعمل ايه يعمل ايه؟..مش عارفة يا بنتي و الله صحيح مانتو جيل غلبان ماعندوش قلل



عمتي فادية و بسبب هوايتها المفضلة في تلميع الأكر سمعت الحوار

قلل ايه يا ماما اللي انتي بتعلميها للبنت؟..بصي يا حبيبتشي أنا بأه كانت عندي طريقة ماتخرش الماية
خير
كان عندي حتة جيبة ميكرو كده حمرا و معاها بوت طويل و انتي عارفة الرجالة بأه و اللون الأحمر..أمشي بيها بس خطوتين في شارعنا بهدوء كده وواحدة واحدة أشتري حاجة من هنا ..حاجة من هنا ..أركب تاكس أنزل منه ..أتلحلح شوية يعني ...يكون باليل عند أبويا 5 عرسان
مرة واحدة
مرة واحدة...هو جاب جوز عمتك الا هيا
طب و يا طنط واللي مابيلبسش ميكرو جيب ولا حمرا ولا خضرا يعمل ايه
يعمل ايه يعمل ايه...و الله مانا عارفة...صحيح دانتوا جيل غلبان ماعندكوش ميني جيب


كويس جدا...ماطلعتش أنا منكم بحاجة مفيدة يعني أروح دلوقتي لهند بنت اماني يمكن أطلع منها بخطة تنفعني
اسمعي بس استني انتي رايحة فين ..مافيش غير عمتك راقية دي بالذات أكيد عندها والا مليون خطة انتي عارفة دي اتقدملها كام عريس
مش المهم الكوانتتي المهم الكواليتي و بعدين الأهم ان حاجة تتم
ماتقلقيش هيا دي اللي هتجيب المفيد


و طلبنا طنط راقية في التليفون ..اتأخرت شوية عشان ابنها كان بالع مسمار و جوزها كان متجبس بعد ما كسرتله ضلعين و هي بتهزر معاه بعد خناقة بسيطة كده بينهم و بنتها كانت واقفة على سور البلكونة و مصممة تنط زي ثبايدر مان..جوازة ناجحه جدا جوازة طنط راقية هي دي اللي هاتجيب النصايح التمام

و جت طنط راقية

بصي يا حبيبتي انا كان نفسي أقعد معاكي من زمان خدي مني بأه النصيحة التمام..الرجالة دول عاملين زي الطبلة فاضيين من جوه و لازم تسكيها عشان صوتها يطلع
يعني ايه؟

بصي انتي تعمل زي ماعملت مع عمك محسن..تنقي الراجل اللي يعجبك و تقومي ماشية وراه في الشارع
أعاكسه يعني
يا بنت انتي مخك فين لا تخليه هو يعاكسك
بالعافية يعني
يا دي الغباء ..لا يا ستي تطلعي قدامه و بعدين تلفي و طاخ
طاخ؟
تديله حتة قلم يخلي ودانه تصفر أسبوع
طب ماهو يمكن يردهولي ..أتهزق انا بأه و أنضرب في الشارع
لا يمكن..الراجل أول مايشوف كف ايد واحدة ست و هو نازل يطرقع على خده بتتغير حياته تمااااما
يا سلام

أمال ايه..العبط يقولولك الطريق لقلب الراجل معدته ..كلام فارغ الطريق لقلب الراجل بيبدأ بخطوة واحدة..كف ايدك و هو معلم على خده..أمال أنا عايشه أنا و جوز عمتك في سعادة بقالنا 9 سنين ازاي
و هو ازي دراعه هيفك الجبس إمتى
قريب ان شاء الله..انا عارفة ايه ده ؟...رجاله خرعه
طب و بعدين يا طنط يعني أطرقعله يخطبني
لا يا خايبة انتي بعد ماتطرقعيله تديري تنادي أمين الشرطة و تقوليله الراجل ده بيعاكسني جره ع القسم ..يقوم العريس يخاف و يفضل يتجوز بدل ما يتسجن
يعني أبتزة و أتجوزة بالإكراه
يوووه ..هتعمليلي فيها أم ضمير..هيا الرجالة مابينفعش معاها غير كده..اسألي مجرب
طب و يا طنط لومفيش أمين؟..هو أصلا الأمين ده شكله ايه؟ أنا عمري ماشفت واحد طول حياتي
لو مافيش أمين ؟..لو مافيش أمين؟..أهي دي بأه ماعملتش حسابها زمان كان دايما بيبقى فيه أمين..ربنا معاكو دانتوا جيل غلبان ماعندكوش امين





حاولت قدر الإمكان أنفذ النصايح على أد ما قدرت


مالقيتش قلل ..بس لميت كل قصاري الزرع و قعدت أسقي فيها في البلكونة ماحصلش حاجة
ما قدرتش ألبس ميكرو بس جيبت بوت أحمر و قعدت اتمش في شارعنا من صباحية ربنا لآخر اليوم لغاية ما رجلي فقفقت و بررررضه ماحصلش حاجة
مشيت في الشارع و اتديرت عشان أضرب اللي ورايا بالقلم و قبل ما أرفع ايدي كان رافع عليا مطواه و سارق الموبايل..آآآآه لو كان بس فيه أمين شرطة..لكن نعمل ايه نصيبنا...جيل غلبان ماعندوش أمين


باختصار كل النصايح طلعت فاشوش ..أو يمكن انا اللي حظي فاشوش

ده مش يمكن ..ده أكيد

حقيقي المنحوس منحوش ولو شبكوه فى الجواز بدبوس

امانى
23-09-2008, 02:03 AM
هههههههههه الصبر يا جماعه فيه فى مصر9مليون بنت فوق سن التلاتين...وانتى لسه قدامك سنتين تتقلب فيهم الدنيا وتقعد...الصبر بس...........ههههههههههه...شكرا دكتورة مها وانا عارفه ان دى مدونه عاوزة اتجوز بتاعت غادة عبد العال اللى دار الشروق عملتها كتاب ومع ذلك لا احب الا ان اقرأها هنا....تقبلى مرورى وتحياتى

bloadbaby69
23-09-2008, 04:05 AM
http://sl.glitter-graphics.net/pub/978/978375zl8q1vg37h.gif

nour eljannah
23-09-2008, 11:48 PM
حقيقي المنحوس منحوش ولو شبكوه فى الجواز بدبوس


ههههههههههه
اول مره اسمه دي
بجد هايله ي دكتوره
بجد بموت من الضحك عليها

ف انتظار باااقي اليوميات

يااااااااااااااارب هههههههههههههههههههه

تقبلي مروري

نور ساره
24-09-2008, 02:40 AM
مذكرات رائعه د. أمانى
أنا شيفاها من بدرى بس حبيت أرد عليكى بعد ما أخلص قرأتها
أختيار موفق جدا ليوميات تضحك بجد
و الله يكون فى عون البنات لو كانت حلتهم زى البطله كدا
شكرا يا قمر على الموضوع الرائع و بجد ضحكتينا و متهيألى كلنا محتجين للضحك دا

نور ساره
24-09-2008, 02:42 AM
أه نسيت
كلنا مستنين الباقى
يمكن ربنا يوفقها لعريس
و لو محصلش ليكى عليا أجبلها عريس بنفسى
:D:D

almazuona
25-09-2008, 02:04 PM
دكتور مها ياريت تنزلي الحلقات الجايه
وفعلا ملهاش حل
تأخرت في قراتها بس احسن كده قريت 3 حلقات مع بعض
ميرسي وياريت تكمليها

EL Magico
07-10-2008, 12:42 AM
يعنى ايه بصارة؟

mohmmedmns
07-10-2008, 08:17 AM
نييييياههههههههههههههههههههههههههههههههههههه..............بس خلاص
انا مش قادر اقول حاجة تانى من كتر الضحك

nour eljannah
07-10-2008, 11:01 PM
ي دكتوره انتي مش كملتيها ليييييييييييييييييه
انا زعلانه يرضيكي كدا اهئ اهئ بلييييييييييز كمليها لينا يلاااااااااااااااااااااااااا

مستنييييييييييييييييييييييييييييييييين

almazuona
09-10-2008, 01:53 PM
يللا يادكتوره مش حتكمليها

الدكتورة مها
09-10-2008, 02:34 PM
هههههههههه الصبر يا جماعه فيه فى مصر9مليون بنت فوق سن التلاتين...وانتى لسه قدامك سنتين تتقلب فيهم الدنيا وتقعد...الصبر بس...........ههههههههههه...شكرا دكتورة مها وانا عارفه ان دى مدونه عاوزة اتجوز بتاعت غادة عبد العال اللى دار الشروق عملتها كتاب ومع ذلك لا احب الا ان اقرأها هنا....تقبلى مرورى وتحياتى

http://pic.piczo.com/img/i122125099_3094.gif

الدكتورة مها
09-10-2008, 02:35 PM
انا متاسفة جدا على التاخير يا جماعة

واتفضلوا الحلقة الجديدة

الدكتورة مها
09-10-2008, 02:50 PM
التامن


هييييييييييييه جالي عريس...غريبة؟...مش ان جالي عريس طبعا انتوا عارفين انهم إكوام إكوام عندي في الفسحة..الغريب اني فرحانة انه جالي عريس بعد ماكان هيجيلي صدمة وجدانية و انهيار نفساوي من آخر عريسين تلاتة أربعة...بس أعمل ايه يا جماعة..قلبي طيب و مابشلش و ماما بالذات بتحاول تستغل موضوع قلبي الأبيض ده

و ايه يعني لما طنط حشرية يوم جابتلك عريس وحش ..جايز تنشن صح المرة اللي جاية

و جرى ايه لما أماني بدل ما تجيبلك عريس جابتلك عيلة متكاملة متحابة تخطبك..الله أعلم المرة اللي بعدها ممكن يحصل ايه؟

اعزمي طنط حشرية على الغدا..اخطفي رجلك و روحي زوري أماني..افتحي نور السلم لجوزها فوفو عشان بيخاف من الضلمة و ياريت تهشيله القطط اللي على السلم ..ساعدي أماني اللي كل يوم تنزل تاخده من قدام البوابة

وانا رغم قلبي الأبيض لكن دماغي ناشفة و كرامتي بتنقح عليا قوي و مش بالساهل أعزم طنط حشرية على الغدا الا اذا كنا طابخين يوميها رز بالخلطة مرشوش بالمكسرات و بودرة أبيدو بتاعة الصراصير
بس بقول حاضر..ان شاء الله..ربنا يسهل

اللي دايسين فى موضوع جواز الصالونات ده و عندهم خبرة يعرفوا ان العرسان بيجوا حسب الشرع "جماعة" في اسبوع واحد هوب هوب هوب 5 عرسان مرة واحدة ..و يجي واحد ورا التاني. فشنك..أونطة..ماتلاقيش..و ده من ايه..و دي حادثة و الا هو مخه كده طبيعي
و يخلص المولد على كده و بعدين يعدي كتيييييييييييييييييييييييييييير..مافيش حد يهوب ناحيتنا لدرجة ان بابا كل اسبوع يجيب كهربائي يتأكد ان جرس الشقة شغال..يمكن بييجوا و مابنسمعهمش...و في الفترة دي بتنشط الحواس التلاتة اللي بتستخدمهم أي بنت عشان تعرف جايلها عريس والا لأ

حاسة السمع..تطرطق ودانها لما يجي لأمها أي تليفونات خصوصا بعد جملة..الحمدلله هي كويسة..و بعد كلمة..لسه..و بعد الأكلاشيه المعتاد..بيجيلها كتير بس لسه النصيب ماجاش..لأن اللي بيفتح موضوع زي ده في التليفون فيه احتمال مش بطال انه يكون بيمهد لحاجة..الا ان في احتمال تاني انه يبقى نوع من التباتة و خلاص

حاسة النظر..تمسح بعينيها أي مكان موجوده فيه خصوصا مكان شغلها..اول ماتشوف واحدة ست و معاها واحد شكله ابنها بيزغرولها من بعيد..تقلب على القناة التانية و تحط فيشة الرقة و توطي مؤشر الصوت و تجبر عضلات الرقبة على وضع الرأس في زاوية 90 درجة مع بقية اجزاء الجسم دليلا على الأدب و التربية

حاسة الشم..برضه في مكان شغلها أو و هي داخله او خارجة من العمارة..حيث أن من المعتاد ان العرسان الراغبين في الزواج..لازم يستحموا بنص إزازة كولونيا أو أفترشيف و هما رايحين يشوفوا العروسة...و موضوع البارفان ده بيحل محل الجزمة اللي بتزيق بتاع زمان اللي كانت برضه بتنبه العروسة ان حد ماشي وراها و تخلي المسافة اللي بتقطعها كل يوم في 5 دقايق تقطعها يوميها في ساعة الا ربع


المهم بعد ماشحنت كل الحواس دي..مافيش..مافيش أي حاجة بتحصل..سلمت أمري لله ..مافيش في ايدي حاجة غير كده..و بدأت افكر جديا اني أعزم طنط حشرية على الغدا وإني أساعد أماني و فوفو في موضوع السلم و القطط..لكن ربنا يعتلي النجدة الإلاهية في صورة أم محروس

أم محروس دي تبقى المورد الرئيسي لللبن و القشطة في المنطقة بتاعتنا.....و الست تحس انها نزيهة كده رغم انها بعين واحدة و دايما بتلبس جلابية سودة و فيها تاتش كده من نجمة ابراهيم..لكنها دايما بتقول انها واخدة موضوع الللبن ده هواية عشان تضيع بيها وقت خصوصا بعد جوزها ماشترى 3 تكاتك شغالين ليل و نهار...(تكاتك اللي هي جمع توك توك على فكرة)..لكن أم محروس بتعتبر مهمتها الحقيقية في التقريب بين الناس..تعرف الشقة دي اخبار الشقة دي و العمارة دي فضايح العمارة دي..و من أول ما اتعرفت على ماما و ماما بتعتبرها أحسن اختراع عرفته البشرية بعد الإنترنت..و يمكن أحسن على الأقل الإنترنت مش هيساعدك تعمل رز بلبن


في يوم راجعة من شغلي شفت منظر أثر فيا جدا..ماما حاضنة أم محروس و الإتنين منخرطين في بكاء يقطع نياط القلوب-ايه نياط القلوب دي؟_ماما بتتشحتف على آخرها و ام محروس واضح انها ماسكة في ايديها كمية من الفلوس اللي ماما بتخبيها من بابا ورا عداد النور

فيه ايه يا ماما بتعيطي ليه

أصل..أأصل..أاااه

و شدتني ماما معاهم في جروب هج ولا بتاع الست الأروبة بتاعة برنامج أوبرا

جوه الشقة اتفتحت في ماما

أم محروس هي حصلت أم محروس

مالها أم محروس ..ماحنا جربنا الجيران و الصحاب مانفعوش..يمكن يوضع سره

آدي انتي قولتيها الناس المحترمة المثقفة كلهم طلعوا زي أعضاء مجلس الشعب في الأول وعود و في الآخر مصايب..يبقى أم محروس اللي هتجيب الفايدة ..يا ماما

و مشيت علشان أدخل أوضتي و في منتصف المسافة اتسمرت لما اتهيألي اني سمعت كلمة غريبة

ايه ..انا اتهيألي سمعتك بتقولي حاجة

و الله دلوقتي وقفتي..لما سمعتي انها جايبالك دكتور و عنده عيادة

مش النظرية يعني يا ماما المهم الشخص نفسه هو أنا كنت يعني هتجوز العيادة

و تتجوزي صالون حلاقة كمان..باقولك ايه أنا تعبت تعبت

خلاص خلاص ,,هاتجوز العيادة..قصدي هاشوف العريس..هوانا ورايا ايه يعني

أيوة كده اتعدلي


المهم بعد ما ماما قامت بجولة استخباراتية عشان تجمع أكبر قدر من المعلومات عن العريس قبل مايشرف صالوننا المحترم عشان مانفاجأش انه متجوز اتنين أو من الرياض أو بيقلد فنانين....جمعت ماما المعلومات اللي قدرت عليها لكن برضه ماقتنعتش ..و بعد الفضايح اللي حصلت في صالوننا قبل كده وخصوصا موضوع الزغاريط بتاع عائلة الصندل البني بتوع آخر مرة ..ماما طلعت بفكرة كيفتني قوي الصراحة..احنا اللي هنروح نشوف العريس
و يادوب ماما أخدت عنوان العيادة من ام محروس و تاني يوم ام محروس بلغتها انه مستنينا في العيادة

..ليه يا ستي تعملي كده؟؟

ماهو برضه عشان يستعد لمقابلتكم

يحيا العدل يحيا العدل
أخيرا هابقى على الشط التاني و هو اللي هيبقى مستنينا..يا سلام عليه بأه و هو قالب العيادة رأسا على عقب و مشمر البنطلون و نازل مسح هو و التمرجي و ينضف السجاد و ينفض الستاير و يقف محتار قدام الدولاب ألبس القميص ده بأه و الا ده طب أعمل شعري سابايكي والا أفرق على جنب؟ و يبعت يجيب ساقع و دستة جاتوة...يا سلااااام أخيرا هاكل جاتوه بابا مش غرمان فيه و بعدين يحسسني بالذنب انه جابه على مافيش


ياللا يا بت ..لازم تتقمصي الدور صح..لبست بدلة شيك كده و عليها حتة صندل بني(اشمعنى انا يعني) و ماما لبست طقم شيك و لبست كل الدهب اللي عندها اللي نعرف انه عندها و اللي مستخبي في الخزنة السرية تحت رف الهدوم بتاعها للطوارئ و لغرض في نفس يعقوب..و تقمصت الدور فعلا

لازم يبقى أبيض و عينيه صفرا و شعره أخضر و ملفوف كده وصوتي واطي و يقدس الحياة الزوجية و يشارك في الأثاث..و كامل من كله و حصوة في عين اللي مايصلي ع النبي..رحنا العمارة اللي فيها العيادة ..يافطة كبيييييرة و البواب اول ماشافنا قام اتنطر في سيمفونية احترام وصلت لحد باب العيادة ..ماما اللي كانت عاملة حسابها حتى لو العيادة بتنش و مابيدخلش للأخ المواطن العريس أكتر من 50 جنيه في الشهر ..برضه هتجوزهولي و تصرف علينا احنا الإتنين مادام ده هيشيل من على ضهرها الأتب الدائم المتمثل في حضرتي..شفتوا الأصل..ماما كانت مستعدة تضحي بالأم و الجنين عشان أنا و الدكتور نعيش


أول مادخلنا و قلنا اسمنا للتمرجي اتنطر نفس النطرة بتاعة البواب و دخل يدي للعريس خبر و العيانين- اللي كانوا ماليين العيادة- كلهم قعدوا يكلموا بعض و يهمسوا..هي دي هي دي...ايه يا جماعة الموضوع ده..انا لقطة آه..بس مش لدرجة دي
التمرجي دخلنا رغم ان ماما كانت مصرة نستنا لحد ما الكشوفات تخلص-واهو كله من تمن الشبكة-لكن الراجل أصر اننا ندخل الأول و ماحدش من العيانين اعترض...يا سلاااام ناس طيبين و الله..لو ماكنتوش انتوا اللي هتأكلونا كل شهر كنت قلت ربنا يديكوا الصحة


المهم دخلنا على المكتب...مكتب شيك و الجدران ماليانه بشهادات يتهيألي محتاجة 20 سنة عشان حد ياخدها كلها..انا صحيح نسيت أسأل سنة أد ايه.هو اكيد اكبر بس مش عارفة بأد ايه؟..دخلن و انا مغمضة عين و مفتحة عين ..خايفة آخد صدمة تانية ...بس المره دي أنا مستعدة ..كنت عايزة اجيب شوية بندق على شوية لوز و أخليه يكسرهم عشان أتأكد من قوة أسنانه و بعدين افتكرت ان البندق و اللوز دول بيجيبوهم للبنات ...يعني حاجة حريمي قوي...و عشان كده جبتله معايا دوم...هو ده الإختبار الحقيقي لأسنان الرجالة ..ولو طلع زي اللي قبله هابطحة بيها في نفوخة و ماحدش يلومني ساعتها آه....أنا مش ملطشة بأه


ماما لقيتها وقفت ومدت إيديها و بتسلم و بتزغني عشان أسلم انا كمان..رفعت عيني و انا ببسمل..ألاقيلكم حتة عريس..كل المواصفات اللي أنا قايلاها من كام سطر دي ..عيون خضرا و شعر بني فاتح طول بعرض بارتفاع ابتسم كده ابتسامه بينتلوا غمازتين...إخيييييه...ايه ده؟...أنا هاتجوز واحد أحلى مني والا ايه..و أقعد كده في الكوشة الناس تقول اتجوزها على ايه...يوووه بأه..انتي لازم تتغاضي عن العيوب دي ..مش هنعاير الناس بشكلها كمان.مش ذنبه انه حلو و فاضله فولت و ينور على رأي اللمبي..خلاص خلاص..اتجوزه و أمري لله..و بعدين هو فيه عيب برضه..عنده علامة كده في قورته على شكل نجمة..شكلوا كان شقي و هو صغير..كويس يعني على الأقل مش خيخة

قعدنا و طلبلنا حاجة ساقعة ..ايه ده فين الجاتوة..هو مكتوب على اهل العروسة بس والا ايه. هتجوز ..أنا ماباحبش نظام التسبيل ده..أنا لازم أطلع الدوم..هو ده اللي هيحسم الموقف صحيح قعد هو و ماما يتكلموا و طول ما هو بيكلم ماما يبصلي و يركز قوي ..لدرجة ان حرارتي ارتفعت و أعصابي سابت و حرارة ايدي اللي ماسكة كوباية الحاجة الساقعة مع التلج اللي جواها عملوا طبقة بخار أضفت على الجو تاتش رومانسي فظيع ورغم اني من الموديل الجديد النازل في السوق سنتر لوك و حزام أمان و ضد التسبيل لكن أعصابي ماقدرتش تستحمل ده كله بسسسسسسس..ستووووب..هو ده..خلاص..ده مافيهوش غلطه...صبرتي و نولتي يا بت...يا حلوللي ..ده العيال في الصيدلية هيموتوا..دكتور و عيادة و بغمازات يا سلام عليا وانا قاعده في الكوشة و كل صحابي هيطقوا من جنابهم
لا لا مابلاش الأفكار السودة دي ..خلي الشماتة و التشفي لواحدة تانية...لواحدة في ايديها الشمال دبلة دكتور..هيهيهيهي


خلصنا القاعدة اللي كانت مدتها ساعتين ماما اتقصت فيها على كل المعلومات المطلوبة و انا ماسمعتش ولا كلمة من الإتنين كنت كأني بأتفرج على فيلم صامت مبقلله عينيه و لاغيه باقي الحواس ..و خرجنا من العيادة و احنا طايرين ..كنا طولنا قوي لدرجة ان العيادة كانت فاضية و احنا خارجين..ماما اتحرجت قوي و اعتذرلته بشده

يظهر اننا طولنا قوي و زهقنا العيانين

لا حضرتك ولا يهمك هييجوا تاني

ازاي؟

أصلهم مابيثقوش في حد غيري..هيروحوا فين هيلفوا يلفوا و يرجعولي..و حتى لو ماجوش مش مهم..المهم اني اتعرفت على حضرتك ده شئ أهم من ميت فيزيته و متين عيان

و انتوا عارفين تأثير موضوع حضرتك ده في عيلتنا..ماما مشيت و هي مش مصدقه..أنا كنت مسنداها لأنها كانت دايخة من كتر السعادة..أنا كمان ماكنتش مصدقه نفسي

واحنا نازلين شفنا عربيته تحت العمارة لانسر فضي شكلها جديدة لانج...يا سلام يا بابا مرتبك هيفضلك ..فلوسك حلال و الله


ماما في فورة سعادتها خدتني و خلصت كل فلوسها عليااشترينا طقم جديد و شوز و شنطة و كل اما ندخل محل من المحلات تقوله

عايزين أحسن حاجة أصلها هتتخطب قريب

ادينا أغلي حاجة حاجة تليق بواحدة خطوبتها قريب

ماما ماتقاطعيش

لا من غير مقاطعة ان شاء الله ان شاء الله

امانى
09-10-2008, 06:19 PM
ههههههههههههههه.........يا جماعه سمحونى اصلى عارفه باقى القصه...........شكرا دكتورة مها وننتظر المزيد

mido_a_s
18-10-2008, 02:28 AM
قصة اكتر من رائعة وبها كمية من خفة الدم لا توصف سعيد جدا بقرائتها واتمنى ان اقرأ بقية هذه القصة الرائعة قريبا
تفضلى بقبول خالص شكرى يا دكتورة مها

هدى
18-10-2008, 02:07 PM
مشكورة يا دكتورة مها

فعلا قصة من الواقع بكل تفاصيلها

لكن هناك كلمات كثيرة لا أفهمها :p

ممكن أسأل ما معنى "حازي" أصلا ؟؟؟

و هل القصة حقيقية ؟؟ أم من تأليفك ؟؟

و تقبلي مني خالص الود و المحبة :o

mido_a_s
19-10-2008, 02:09 AM
هاى يا هدى اسمحيلى ارحب بيكى باين عليكى بنت عز بجد زى صاحبتنا نيفين اللى فى اول حلقة -فاكراها- حد ما يعرفش يعنى ايه حازى
بصى ياستى حازى دى معناها عقبال عندك الناس لما بتخش الجيش وعايزينهم يترصو فى صف واحد بيستعملو كلمة حازى يعنى اعملو صف
والكاتبة هنا تقصد بيها العدد الكبير بتاع البنات الى وصلت لسن الجواز بس الجواز لسه ما وصلهمش - الظاهر انهم جم بدرى شوية:D- فمن كبر هذا العدد البنات بقت بتترص فى طابور زى طابور العرض بتاع الجيش عشان العريس المحظوظ يختار اللى العروسة اللى هتسودها عليه وعلى اللى خلفوه بس هو ينقيها
بص يا ستى واى خدمة

الدكتورة مها
19-10-2008, 04:38 PM
ههههههههههههههه.........يا جماعه سمحونى اصلى عارفه باقى القصه...........شكرا دكتورة مها وننتظر المزيد

منورة يا أماني

وعلى الله اسمع صوتك فى باقي اليوميات ولو اتنفستي ...... هاعورك

الدكتورة مها
19-10-2008, 04:41 PM
قصة اكتر من رائعة وبها كمية من خفة الدم لا توصف سعيد جدا بقرائتها واتمنى ان اقرأ بقية هذه القصة الرائعة قريبا
تفضلى بقبول خالص شكرى يا دكتورة مها



أهلا وسهلا بيك يا اخي الكريم

ويارب باقي اليوميات تعجبك

الدكتورة مها
19-10-2008, 04:44 PM
مشكورة يا دكتورة مها

فعلا قصة من الواقع بكل تفاصيلها

لكن هناك كلمات كثيرة لا أفهمها :p

ممكن أسأل ما معنى "حازي" أصلا ؟؟؟

و هل القصة حقيقية ؟؟ أم من تأليفك ؟؟

و تقبلي مني خالص الود و المحبة :o

منورة يا غالية

وعوزاكي تسالي عن اى كلمة مش تعرفي معناها

والقصة للكاتبة غادة عبد العال

وكلمة حازى جاية من المحازاة يعنى الكل يقف فى صف واحد ومحازين لبعض ودي موجودة فى الجيش

نورتيني يا هدي وعوزاكي تسالي عن كل اللى عاوزة تعرفيه

الدكتورة مها
19-10-2008, 04:46 PM
هاى يا هدى اسمحيلى ارحب بيكى باين عليكى بنت عز بجد زى صاحبتنا نيفين اللى فى اول حلقة -فاكراها- حد ما يعرفش يعنى ايه حازى
بصى ياستى حازى دى معناها عقبال عندك الناس لما بتخش الجيش وعايزينهم يترصو فى صف واحد بيستعملو كلمة حازى يعنى اعملو صف
والكاتبة هنا تقصد بيها العدد الكبير بتاع البنات الى وصلت لسن الجواز بس الجواز لسه ما وصلهمش - الظاهر انهم جم بدرى شوية:D- فمن كبر هذا العدد البنات بقت بتترص فى طابور زى طابور العرض بتاع الجيش عشان العريس المحظوظ يختار اللى العروسة اللى هتسودها عليه وعلى اللى خلفوه بس هو ينقيها
بص يا ستى واى خدمة


الله يفتح عليك يا ميدو

بس عاوزة انبه ان الطابور دة مش موجود فى مصر طبعا :mad::mad:

هي الكاتبة بتتخيله مش اكتر

عشان انت نسيت توضح الحتة دى :cool::cool:

الدكتورة مها
19-10-2008, 05:00 PM
تابع الثامن


كنا وصلنا لحد فييين؟..آه
ماما جابتلي الطقم الجديد و الشنطة و الشوز وروحنا على البيت
بعد مارجعنا البيت بساعتين رن الجرس و كانت أم محروس بترقص من الفرح و بتتنطط زي الضفدعة اللي محطوطة في طاسة على النار- والله الست دي بترقص كويس..فيها شبه من نادية الجندي في فيلم ..اضرب و اجري في تل أبيب -كانت جاية تبلغ ماما بالأخبار الحلوة العريس بيستأذن يجي يوم التلات الجاي يعني كمان أسبوع و بيقول انه جاهز لكل الطلبات و اننا عيله محترمة و عمره ماهيلاقي زينا

ابتدت ماما تمسك التليفون و تقوم بمهمتها المقدسة كأم العروسة المقبلة ..وتغيظ في كل ستات العيلة الكريمة اللي ماعرفوش حاجة عن الموضوع
ان شاء الله بكره تسمعوا أخبار كويسة...هنشوفكوا قريب ان شاء الله ..خير خير كتير ان شاء الله...والله شكلي هاحتاجك قريب معايا في ايه ..بكره تعرفي ..لا لا مش هاقولك خليها مفاجئه

طب و اشمعنى انا بأه أنا عايزة اغيظ قصدي أفضفض لحد أنا كمان
اتغدينا و دخلت أنام شوية ..بس مش قادرة باتقلب على جمر النار على رأي فايزة أحمد ...والا كانت أسمهان..أديني باتقلب وخلاص .... الله .... طب و ايه فايدة الخطوبة اذا كان الواحدة مش قادرة تغيظ ..قصدي تفضفض لحد عليها ...لا لا لا دي حاجة لا تطاق نفسي أطلع في البلكونة وأصرخ في اللي رايح و اللي جاي
هاتجااااااووواااااااااز
بس بس بلاش مقاطعه بأه
مانا لازم أقول لحد مش قادرة أمسك لساني..هموت طب أروح أقول لأماني؟...لا لا دي عينها وحشة و هتقعد تقوللي و ده يطلع ايه في لولو أخو فوفو وساعتها ممكن أتهور و أقولها رأيي بصراحة في جوزها و اخوه و عيلتهم كلها و يمكن مشاعرها تتعور والا حاجة طب أنزل أقول لعبد ربه البواب و أكبسه زي مابيكبسني بأخبار مراته الليدي سها في الرايحة و الجايه..لا لا أنا مش أد سها لتطلع تباركلي و تاكل دراعي والا حاجة ..مرة كانت فرحانة لما محمود سلوع جارنا خد الثانوية العامة و دخل كلية الطب و شكلها جاعت شوية لأن كان فيه شجرة جوافة بتنام تحتها قطتين مالقناش ليهم هما التلاتة أي أثر تاني يوم

طب أقول للعيال في المستشفى؟..لأ لأ لحسن يقعدوا يشمشموا و يطقسوا و يعرفوا مكان العيادة و يمكن يروحوا و يحاولوا يخطفوه لا لا لا لازم أبقى أنصح من كده..طب أقول لمين لمين؟
قمت جري و لبست هدومي و صممت اني لازم أنزل لنهى ...مش هاينفع أأجل الغيظ ..قصدي الفضفضة ليوم تاني مش هاقدر
وانا راكبة في التاكس قلت أما أجرب الكلمة في بقي..
بسرعة يا أسطى لو سمحت عشان خطيبي مستنيني
حاضر يا عروسة
يا سلاااام حلوة قوي الكلمة دي ..مع اني في أي ظروف تانية كنت شخطت فيها و قلت له دكتورة لو سمحت ...لكن دلوقتي اللقب ده أجمل لقب في الدنيا..فليسقط مكتب التنسيق
وصلت للصيدلية اللي بتشتغل فيها نهى بعد الضهر .أول ماشافتني اتبرجلت و وشها اصفر باضرب بعيني كده لقيت الصيدلية بتبرق و كل الإزاز ممسوح ببص على لبسها ..قلبي وقع في رجليا
ايه الطقم ده ..الطقم ده انتي مابتلبسيهوش الا اذا..الا اذا ...انتي جايلك عريس
لا مش مظبوط
لا انتي لايمكن تضحكي عليا انا عارفة الطقم ده كويس
الطقم.. الطقم..يوووه ..كنت عارفه انك هتعرفيه..أيوه جايلي عريس دلوقت
اوعي يكون دكتور و عنده عيادة..احنا مش هنكرر موضوع أيمن تاني
لا لا لا ..ده طيار..هاييجي يشوفني النهارده ..و بعدين ايه حكاية أيمن هو عمل ايه؟
أيمن ..أأأأ..لا ..الله يمسيه بالخير و يسعده هناك في بني غازي..المهم عشان الطيار ده كنت بتوزعيني
مش مسألة توزيع ..بس يعني لو جه و شافك هنا...إفرضي يعني انتي عجبتيه أكتر و الا حاجة..تقطعي على أختك حبيبتك

آآآه ..فكرة كويسة والله ..هو يجي هنا وفجأه أطلعله و يقع فيا ويسيب البنت نهى الخبيثة دي اللي كانت عايزة تقرطسني..و طبعا معروف ان مافيش أي وجه للمقارنة بيني و بينها..أيمن ؟...أيمن ده كان عنده حالة استجماتيزم متقدم و بعد نظر متأصل ..يا سلام بأه على فرحة ماما وانا راجعالها بعريس كمان...يا سلام يا بت الفقي لما يسعد ..دكتور و طيار و أسبوع واحد ..يا فرحتك يا ماما
..البنت نهى شكلها فهمت اللي بيدور في دماغي
باقولك ايه؟..انا صاحبتك و حبيبتك مش معقول تعملي فيا كده ..انتي عارفة انا حظي كان عامل ازاي
وانا يعني اللي حظي كان عدل قوي
معلش يا حبيبتي..عشان خاطري ..انا عارفة انك مش هيجيلك قلب و تعملي فيا كده ..و انا أوعدك اني أبقى اخليه يشوفلك حد من أصحابه

بعد ماكنت خلاص هاتعاطف معاها الجملة الأخيرة جننتني...هيا حصلت ..أنا اللي كنت هاقولك البقين دول بعد مافحمك بخبر عريسي..بس لأ برضه انا ماعملش كده في صاحبتي أبدا ..احاول أخطف عريسها ...لا لآ لآ...و بعدين آخر مرة أيمن كان هيجيله انهيار عصبي و انا كنت غالبا هادخل سجن القناطر في قضية ضرب أفضى طفاية السجاير على دماغه...قدر و لطف...بعد ماتحايلت نهى شوية عليا قررت اني أدخل المعمل و أستنى جوه ..ياللا بأه صحبتي و ماتهونش عليا و بعدين انا عندي عريسي و عيادته ..هو أنا يعني ناقصة عرسان
بعد ماكنت ناوية أصدمها صدمة عمرها بالخبر اللي عندي..بعد ما أمهدلها طبعا نهى دي حبيبتشي ولايمكن أصدمها من غير تمهيد..أهي دلوقتي هي اللي صدمتني و خلتني واقفة وحاسة باحساس العربة المفخخة نفسي أنفجر فيها وفي الصيدلية وفي العريس لو شفته..آه و على رأي المثل..على الباغي تدور الدوائر..منك له يا نهى و كمان خلتيني أتكلم بالنحوي

بعد شوية واحدة اقتحمت الصيدلية وشها هيشقق من كتر الفرح..و أول ماشافتني قطمت الضحكة..انا فهمت على طول انها الواسطة..أنا عارفاهم بيبتدوا كده و أخرهم مقلب حرامية و يتدألجوا ع السلم
ماشي ماشي..ماتقلبوش وشكوا أوي كده..انا ماشية

مشيت في الشارع و الصدمة بادية الأثر على وجهى الذي كان بشوشا-يووه نحوي تاني-..يعني كمان مش هاعرف أتأنتك على حد بالعريس يعني لو كبرت في دماغي و رحت قولت للعيال في المستشفى و نهى كمان قالتلهم كفة مين اللي تطب..الطيار طبعا..و احنا في شهر أكتوبر و ده موسم..أول طلعة جوية الساعة اتنين الضهر و الحركات دي..دي ايه الخطوبة اللي باينة من أولها دي..ايه فايدة الخطوبة لو مافضلوش الناس يحسدوا و يقروا ع الواحدة و يرتفع ضغطهم كل أما تجيب سيرة خطيبها قدامهم..يارب هو انا دايما فرحتي ناقصة كده؟؟

الإسبوع عدى عادي ..طول الوقت في الشغل انا و نهى بنبص لبعض من تحت لتحت..مافيش واحدة عايزة تقول جرى ايه في موضوعها وكل واحدة خايفة تسأل التانية ايه الأخبار؟..الموضوع دلوقتي بأه مسابقة و هانشوف مين فينا اللي هيسبق
عدى الأسبوع على خير وجه اليوم الموعود

دخل العريس صالوننا المتواضع اللي ماما جددت كل حاجة فيه تقريبا في الأسبوع ده ستاير جديدة وفازة جديدة وكاسات جديدة كله جديد في جديد..الواد الدكتور ده أول مادخل الصالون تحس اننا بقينا الضهر..ايه ده ..أحب أنا جدا الناس اللي بتبان كأنها لسه مستحمية من تلات دقايق دي..قاعدنا قاعدة طويلة و اتكلمنا وضحكنا والعريس قالنا انه مستعجل جدا على الخطوبة و مافيش داعي للتأخير كل شئ جاهز..و لما ماما وبابا سألوه على عيلته اللي كان جاي من غيرهم..قالهم انهم في الإمارات و ان شاء الله هيبقوا يجوا على وقت الخطوبة و لو ماعرفوش ينزلوا عادي يعني مش لازم نأخر المراكب السايرة عشان حاجة بسيطة زي دي..لا طبعا ونتأخر ليه..ده كده ممكن البت الخبيثة اللي اسمها نهى دي تخطب قبلي و تاكل الجو

بعد القاعدة دي حسيت في عينين ماما انها مارتاحتش و عبثا -و اكرر- عبثا حاولت أقنعها تشيل الوساوس دي من دماغها لكن ماما من طول خبرتها معايا كان عندها احساس غير مبرر ان انا لازم يطلعلي في كل خرابه عفريت
و تااااني مسكت ماما التليفون و قررت القيام بجولة من المحادثات مش عشان تغيظ المرة دي ..لكن عشان توصل لمصدر الخبر و تسكت النحل اللي بيزن في دماغها من ناحية العريس اللميع
تاني يوم رحت الشغل ..لسه نهى ماقالتش حاجة خير ..ربنا يستر بس على موضوعي و ماما ماتبوظهوش..الأمهات دول..لو مالقيوش مشكلة يعملوها هما
روحت البيت و باضرب بعيني في الصالة لقيت ماما ماسكة سماعة اتليفون زي ماسيبتها بالظبط من 14ساعة و نص بس فيه تعبير غريب كده باين على وشها
فيه ايه يا ماما خير؟
لا أبدا ..فيه حاجة كده طنط فتنة قالتلي عليهاوانا باغيظها..قصدي باكلمها على موضوع العريس ده
حاجة ايه يا ماما؟..انتي شاكلك كده اتعودتي على قعدتي جنبك واللاوعي بتاعك عايز يبوظلي الموضوع و خلاص
انتي مش فاهمة ..طنط فتنة قالتلي انها عارفاه و انه متجوز و مخلف ... خشي البسي هنروحله العيادة
ايه؟..لا بأه حرام..هنعيد قصة عائلة الصندل البني تاني؟
عشان كده باقولك البسي بسرعة انا مش هاقدر استنى ثانية واحدة غير لما أتأكد

رجعنا تااااني للعيادة ..العربية اللانسر في مكانها..البواب نايم جنب الباب ..طلعنا العيادة..التمرجي..لا ده كان واحد تاني..عادي يعني دي كانت فترة مسائية و أكيد الطقم بيتغير..العيانين مارحبوش بينا زي المرة اللي فاتت..خلاص ضميري مش هيوجعني لما مادعيلهمش يخفوا..ازاي مايرحبوش بينا زي المرة اللي فاتت..قطعنا كشف و دخلنا للدكتور
وقعدنا نستناه..نستناه...نستناه..لحد ما الراجل الغريب اللي قاعد جوه أوضة الكشف شكله هو كمان زهق
هو مين فيكوا اللي مريضة
احنا مافيش حد منا مريض
أمال حضراتكم مشرفينا ليه
دي مسائل عائلية
ازاي يعني؟
حاجة بيننا و بين الدكتور
طب مانا الدكتور
ياسلام يا سلام ..سمعني بأه و اشجيني
لا حضرتك الدكتور(...) دي عيادته
مانا عارف ..ده أنا
إزاي ده الدكتور(..)صغير في السن و عينيه خضرا و عنده
غمازات..مش كده
أيوة مظبوط..ماتقوليش انه بيتدرب مع حضرتك و انه لسه تلميذ ولا انه

الراجل سابنا و خرج من الأوضة جري
ماما..فيه ايه هو هايجبلنا البوليس والا ايه
بوليس ايه؟..هو احنا سرقنا حاجة

رجع الراجل الكبارة و هو جارر في ايده الدكتور الصغنون من قفاه لابس تريننج سوت و شكله كده كان نايم
هو ده مش كده؟
أيوة ..أيوة هو ده الدكتور(..) انت خاطفه والا ايه؟
و فجأة الراجل الكبير نزل ضرب في الدكتور الصغنن
خاطفه دانا نفسي أحرقه..اقطعه..نفسي أرميه من فوق البرج و اخلص منه

واحنا من طيابة قلبنا و لأننا مش فاهمين قاعدنا نسلك ونصوت.
نسلك و نصوت .
وفي الآخر الدكتور الصغنن طلع يجري و الدكتور الكبير قعد قدامنا منهار...جبناله لمون و مشينا العيانين و روحنا التمرجي و قعد يشكيلنا همه

خدوا عندكوا..البيه أبو غمازات..ابنه...البيه ماجابش مجموع في الثانوية العامة خلاه يعيد برضه ماجابش دخله جامعة خاصة قعد فيها 6 سنين و ماعرفش يتخرج ..حول تجارة..و بقاله فيها 5 سنين ولسه في سنة تانية..و عشان هو ابن دكتور كبير و عشان حليوة و عنده فلوس ..خدها غية يتسلى بخلق الله..نفس المسلسل اللي عملوا علينا عملوا على كتير قبلنا ..دكاترة و صيادلة و أسنان..يدخل عليهم نفس الداخلة و العيادة اهه و العربية كمان و بابا و ماما في الإمارات بس هما مبسوطين قوي و آدي جواب منهم بيقولوا على بركة الله..و يخطب و يدخل و يخرج و يتفسح و يتعزم و بعدين ينكشف او يزهق و ياخدله علقة أو يجوا الناس يبهدلوا أبوه ..و يغطس شهرين و يعييد الكره
عشان كده الشهادات الكتير اللي كانت متعلقة اللي تاخد عشرين سنة على ماتتاخد...بتاعة باباه
عشان كده العيانين اللي عرفونا أول مادخلنا....كانوا صحابه
عشان كده لجأ لأم محروس..الكل كان عارف سمعته من قرايبة و معارفه و هي كانت لسه داخلة المنطقة جديد و مالحقتش تتعرف على كل مصايبه
عشان كده عنده علامه في قورته..حد متفاهم من اهل العرايس سابله تذكار يفكره ان بنات الناس مش بلاي ستيشان

هدينا الدكتور الكبير..عشرة برضه ولازم نقف جنبه..و نزلنا الشارع عادي..عاادي..باقولكم عااااادي..احنا اتعودنا على كده..ولا كنا ماسكين نفسنا من العياط ولا صعبت علينا نفسنا ولا كنا كارهين الدنيا ومافيها ولا انا كنت بافكر في نهى اللي زمانها دلوقتي بتلبس الدبل ولا حاجة...عااااادي

تاني يوم رحت الشغل و التعبير اياه مرسوم على وشي..تعبير واحدة واخدة مقلب سخن طالع من عينيها..على الأقل دلوقتي أقدر افضفض للبنات و واحدة تطبطب عليا و التانية تاخدني في حضنها و واحدة تدعي على اللي كان السبب و تقولي ضفرك برقبته و بكره يجيلك اللي يقدرك و يخلص و يشيل..أدخل الصيدلية ألاقي كل المشاهد اللي فاتت دي جاري تنفيذها على الهوا..و البطلة...نهى..الموضوع بتاعها طلع فشنك عشان العريس بتاعها اكتشف انها عندها 28 سنة و تلات أشهر و هو عايز واحدة عندها 28 سنة و شهرين..عنده حق..ايه 28 سنة وتلات أشهر دول..ده حتى سن مش عاطشفي خالص..الدم غلي في عروقي...لا بأه ..حتى في دي مش سايباني في حالي..حتى شوية الطبطبه واقفالي فيهم

مدام سندس واقفة جنبها و عماله تطبطب عليها
ولا تزعلي نفسك يا حبيبتشي بكره يجيلك اللي يعرف قيمتك
وطت صوتها شوية و هي مش عارفة اني واقفة وراها و سامعاها
أنا ماكنتش عايزة أقولك هنا قدام البنات ..بس انتي ليكي عندي عريس مايستاهلش غيرك
بجد يا مدام سندس
آه و الله أم هبه بتاعت الفراخ هي اللي قالتلي عليه..دكتور و عنده عيادة و عينه خضرا و بغمازات
و لأول مرة من ساعة ما موضوعي طلع فشينك أرتسمت ابتسامة واسعة على وشي
طب أقولها بأه والا لأ؟..هاتقول كنت باتصنت..هاتقول أنا غيرانه..هاتقول طول عمري حاطاها في دماغي و مش بعيد تقرر ام طارق بتاعة الكافتريا و تعرف حكاية أيمن
طب أسيبها ..لأ حرام..صاحبتشي برضه
لقيتها بتهمس لمدام سندس وانا لسه وراهم
طب اوعي تجيبي سيرة لصاحبتنا ( عليا انا).... لحسن عينها وحشة


كده ه ه ه ه ه ..طب إستلقي وعدك بأه

منى توفيق
19-10-2008, 09:09 PM
حقيقة لا أجد كلام أوصف به مدى حلاوة هذه القصة الروعة ..

قد تكونين نقلتيها فقط لنا يا د / مها ولكن كم كان الاختيار موفق جداً وبغاية الجمال ..

وبالفعل المشكلة زادت جداً هذه الأيام والسوق نايم من الآخر ومش عايزين نوضح أكتر من كده ..

وبعد كم العاهات التى صادفتها فى حياتى - وأه من زواج الصالونات أه وأسألينى أنا عنه وعن البلاوى اللى شوفتها منه - توصلت أنا وصديقاتى إلي استنتاج خطيييييييير ..

ألا وهو أن فى خيانة عظمى بتحصل اليومين دول من قِبل جهات أعلي منا ( ومش عاوزين نتكلم فى السياسة ) تتلخص فى أنهم يَصدرون وش القفص لبره ويتركوا لنا مش قاع القفص .. لأ .. يمكن اللى بيقع من القفص كمان .. وبيتحط جنب الحيط ..

عارفة لما تلاقى لقمة ناشفة ومقددة - إيه مقددة دى بس ما علينا - واقعة تقومى تاخديها وتبوسيها وتحطيها جنب الحيط .. اعرفى ساعتها أن المال الحلال لا يضيع وأن شغلك بجد من عرق جبينك .. لأن اللقمة دى هاتلف تلف وترجعلك زى القرش البرانى اللى سمعنا عنه كتير من أهالينا .. وده فى صورة عاهة .. أسفة .. أقصد عريس ..

إهئ إهئ إهئ إهئ إهئ إهئ إهئ

ولا أراكم الله مكروه فى عزيز عليكم ..

mido_a_s
20-10-2008, 03:53 AM
انتى شايلة قوى يا منى يا توفيق!!!!!!!!!!!!!!!!!!!!!!!!!!!!!
متهيالى لو سابوكى ممكن تكملى الحلقات دى بكل اقتدار
عموما ربنا يبارك فى بناتنا ولهم ويرزقهم الزوج الصالح قولو امين
الى الدكتورة مها انا صرت معجب اصيل بكافة كتاباتك وصار اسم الدكتورة مها رمزا للجودة بالنسبة لى-حاجه زى الايزو كده-
لاتزالى مستمرة فى اضحاكى كما لم يحدث لى من قبل
وبالنسبة للطابور اياه بتاع العرايس وهل هو موجود فى مصر او مش موجود؟؟؟؟؟؟؟؟؟
انا مش هارد عليكى:D:rolleyes:

EL Magico
20-10-2008, 07:12 AM
انا لما رديت الأول مخدتش بالى ان فى كذا صفحة لانه كانت اول مرة اشوف الموضوع بس دلوقتى خدت بالى و قريت الموضوع كله و هو موضوع جامد و انا اقترح انك تنزليه فى كتاب او تشوفيلك عمود فى اى جرنال و ربنا يوفقك

MR. PrESIdEnt
20-10-2008, 01:43 PM
مش فاهمه حاجة آه..لكن مش هابقى أنا الكلوب المطفي وسطيهم يعني

ههههههههههههههههههههههههههههههههههههههههههههههههههههههه

لا بجد روعة
حاجة تحفة
بحب انا اوي اليوميات دي

لا وكله كوم وبعد الرقة دي كلها وجزمة امه
يطلع بانتييير
" حلوة بانتيير دي على فكرة :D "
بس تصدقي وحياتك لو مكنتيش قلتي معناها وربنا ما كنت هعرف
ههههههههههههههههه

بس برضه هي عاملة فيها مش عارف ايه ليه
بانتشير بانتشير
ده شغال في فرنصه برضه
ههههههههههههههههههههههه

كملي كملي

MR. PrESIdEnt
20-10-2008, 01:44 PM
اوبس
برضه رديت على اساس انه في اول صفحة وبس
هروح اكمل وابقى ارجع بعدين

MR. PrESIdEnt
20-10-2008, 03:15 PM
ياه انا اخيرا خلصت كله

بصراحة مش عارف اقولك ايه
مقلب وشربته
ولا اتبسط ان الحوار طلع كتاب انتي بتنقليه
وان مفيش حاجة من البلاوي دي كلها حصلت لك :D

عموما رأيي المتواضع في الكتاب نفسه بقى واللي قريته
مش معقول الناس كلها وحشة
لازم يبقى في حد كويس
والنظرة صعبة اوي من كاتبة الرواية
اي نعم الجواز صعب بس مش لان الناس وحشة
بالعكس لان الناس مش عارفة تتجوز
والاسباب كتير والناس كلها عارفاها

بس بصراحة انا ضحكت كتير وانا بقرأ الكوارث اللي بتحصل دي

بس عاوز اسالك في حاجة
ياترى هل في حاجة متعلقة بيكي في الموضوع ده
ولا مجرد نقل للكتاب
لاني حسيت بصدق في كلامك كانه حصل معاكي فعلا

وبالتالي لو مجرد نقل للكتاب احييكي بشدة على طريقة النقل الصادقة 100%
يعني بتخلي الواحد يحس فعلا ان الكلام ده موجود وحصل

على فكرة مش هرتاح الا لما تقولي لي الكلام ده كله مجرد نقل ولا في حاجة منها حصل
هي رزالة انا عارف :D
بس نفسيا مش مرتاح

ومرة تانية بشكرك على الموضوع
وبحييكي عليه وفي انتظار الباقي

الدكتورة مها
23-10-2008, 09:56 PM
حقيقة لا أجد كلام أوصف به مدى حلاوة هذه القصة الروعة ..


قد تكونين نقلتيها فقط لنا يا د / مها ولكن كم كان الاختيار موفق جداً وبغاية الجمال ..

وبالفعل المشكلة زادت جداً هذه الأيام والسوق نايم من الآخر ومش عايزين نوضح أكتر من كده ..

وبعد كم العاهات التى صادفتها فى حياتى - وأه من زواج الصالونات أه وأسألينى أنا عنه وعن البلاوى اللى شوفتها منه - توصلت أنا وصديقاتى إلي استنتاج خطيييييييير ..

ألا وهو أن فى خيانة عظمى بتحصل اليومين دول من قِبل جهات أعلي منا ( ومش عاوزين نتكلم فى السياسة ) تتلخص فى أنهم يَصدرون وش القفص لبره ويتركوا لنا مش قاع القفص .. لأ .. يمكن اللى بيقع من القفص كمان .. وبيتحط جنب الحيط ..

عارفة لما تلاقى لقمة ناشفة ومقددة - إيه مقددة دى بس ما علينا - واقعة تقومى تاخديها وتبوسيها وتحطيها جنب الحيط .. اعرفى ساعتها أن المال الحلال لا يضيع وأن شغلك بجد من عرق جبينك .. لأن اللقمة دى هاتلف تلف وترجعلك زى القرش البرانى اللى سمعنا عنه كتير من أهالينا .. وده فى صورة عاهة .. أسفة .. أقصد عريس ..

إهئ إهئ إهئ إهئ إهئ إهئ إهئ


ولا أراكم الله مكروه فى عزيز عليكم ..



ليه بس بتقلبي عليا المواجع يا منى؟

دة انتى كمان طلعتي شايلة فى قلبك

بس اوعى تسكتي

عوزاكي بعلو حسك تقولى كل اللى جواكي ......

وانا معاكي

والخمسة مليون اللى زي حالاتنا معانا

ونعمل مظاهرات - بس من غير اضراب - عشان الموضوع مش ناقص

وباقولك ايه يا منى؟

ما تيجي نشوفلنا حيطة ونعيط عليها

اهي اهي اهيء

الدكتورة مها
23-10-2008, 10:00 PM
انتى شايلة قوى يا منى يا توفيق!!!!!!!!!!!!!!!!!!!!!!!!!!!!!
متهيالى لو سابوكى ممكن تكملى الحلقات دى بكل اقتدار
عموما ربنا يبارك فى بناتنا ولهم ويرزقهم الزوج الصالح قولو امين
الى الدكتورة مها انا صرت معجب اصيل بكافة كتاباتك وصار اسم الدكتورة مها رمزا للجودة بالنسبة لى-حاجه زى الايزو كده-
لاتزالى مستمرة فى اضحاكى كما لم يحدث لى من قبل
وبالنسبة للطابور اياه بتاع العرايس وهل هو موجود فى مصر او مش موجود؟؟؟؟؟؟؟؟؟
انا مش هارد عليكى:D:rolleyes:

وانا باضم صوتي لصوتك

وباتمنى ان منى تكمل الحلقات .... او عندي فكرة تانية وباذن الله هانفذها قريب بالتعاون معاها

وسعيدة انى قدرت ارسم بسمة على وجوهكم

وياريت محدش يجيب سيرة الطوابير تاني

لان البلد دي بلد طوابير صحيح

سواء فى العرسان او العيش ......... حاجة ..... :mad::mad::mad:

الدكتورة مها
23-10-2008, 10:01 PM
انا لما رديت الأول مخدتش بالى ان فى كذا صفحة لانه كانت اول مرة اشوف الموضوع بس دلوقتى خدت بالى و قريت الموضوع كله و هو موضوع جامد و انا اقترح انك تنزليه فى كتاب او تشوفيلك عمود فى اى جرنال و ربنا يوفقك


منور يا سكر

وفعلا اليوميات دي نزلت فى كتاب

والكتاب نجح بصورة رهيبة

وربنا يوفقنا جميعا

الدكتورة مها
23-10-2008, 10:04 PM
ياه انا اخيرا خلصت كله


بصراحة مش عارف اقولك ايه
مقلب وشربته
ولا اتبسط ان الحوار طلع كتاب انتي بتنقليه
وان مفيش حاجة من البلاوي دي كلها حصلت لك :D

عموما رأيي المتواضع في الكتاب نفسه بقى واللي قريته
مش معقول الناس كلها وحشة
لازم يبقى في حد كويس
والنظرة صعبة اوي من كاتبة الرواية
اي نعم الجواز صعب بس مش لان الناس وحشة
بالعكس لان الناس مش عارفة تتجوز
والاسباب كتير والناس كلها عارفاها

بس بصراحة انا ضحكت كتير وانا بقرأ الكوارث اللي بتحصل دي

بس عاوز اسالك في حاجة
ياترى هل في حاجة متعلقة بيكي في الموضوع ده
ولا مجرد نقل للكتاب
لاني حسيت بصدق في كلامك كانه حصل معاكي فعلا

وبالتالي لو مجرد نقل للكتاب احييكي بشدة على طريقة النقل الصادقة 100%
يعني بتخلي الواحد يحس فعلا ان الكلام ده موجود وحصل

على فكرة مش هرتاح الا لما تقولي لي الكلام ده كله مجرد نقل ولا في حاجة منها حصل
هي رزالة انا عارف :D
بس نفسيا مش مرتاح

ومرة تانية بشكرك على الموضوع

وبحييكي عليه وفي انتظار الباقي



اهلا بجدو مصطفي

وميرسي على ردك الجميل اللى ضحكني واسعدني جدا

وبصراحة كلنا فرحانين بالكتاب دة جدا

وبنتمني افكار تانية تظهر من شبابنا

وهارد على سؤالك الرزل فى توبيك تاني

الدكتورة مها
23-10-2008, 10:09 PM
زغروتة حلوة رنت في بيتنا


يوووه..مش بيتنا احنا ..ماتقاطعوش...دي رنت في بيت العرايس و العرسان...اللي هو طبعا بيتنا...


رغم اني لسه مصدومة من خبر جواز أحمد عز الدخيلة من غير ماحد يقوللي انه بيدور على عروسة ..طيب مش كان حد قاللي دانا كنت نغنغتكوا و اديت لكل واحد منكم 10 -15 ربع جنيه مخروم تتشبرقوا بيهم ..ياللا مالكوش في الطيب نصيب... لكني هاقولكم اخبار حلوة قوي عن أحد أهم أعمدة منتدى روايات 2..طبعا عرفتوها..قلب الامة..و رغم اني كنت حالفة ان لو حد بعت قاللي اتخطبت والا خطبت والا اتجوزت هابهدله..لكن الا حبيبتنا قلب الامة..ده معزة خاصة ..خصوصا واني انا عضوة جديدة فى المنتدى..
ألف مبروك يا قلب الامة..من قلبي و الله ..

و عقبااااااااااااااااااااالي
:mad::p

الدكتورة مها
23-10-2008, 10:14 PM
البت نهى اتخطبت....عااااااااااااااااا


لقد...نزل...علينا...الخبر....كالصااااااااااااعقة



البت السهنة ..ولا تقول و لاحسينا بيها..و لاسمعنالها لا حس و لاخبر..قال ايه نسيبها يوم نيجي التاني نلاقيها دخلالنا و واقفة في وسط الصيدلية و هووب رفعتلنا ايديها اليمين و الدبلة بتلمع فيها



مش تباركولي يا جماعة انا اتخطبت



الصيدلية اللي كانت في حالة حركة فجأة كل حاجة فيها وقفت في مكانها زي ماتكون بتتفرج على شريط فيديو و هنج فجاة عشان الهيد عايز يتمسح..كل حاجة وقفت حتى المرضى على الشباك وقفوا و بحلقوا و هما مش فاهمين" كأنهم بيقولوا"الجماعة دول ممكن حد فيهم يتخطب بجد"؟؟؟" شوية والكل لفلها ببطء و عينيهم مبرقة و البت رجعت خطوتين لورا استعدادا للجري ..و فجأة انطلقت زغروتة مدوية كان مصدرها -طبعا- مدام سندس..ماهي مش خسرانة حاجة... و بعد ماانطلقت مدام سندس و خدت البت بالحضن و احنا بصينا لبعض على أساسا ان منظرنا هيبقى مش لطشيف لو مارحناش و هنيناها دلوقت..راحت كل واحدة فينا مطلعة من شنطتها الإبتسامة اللي شايلاها للمناسبات اللي زي دي-حلوة الحتة دي مش دي الإستعارة المكنية بتاعت النحو زمان؟-و الكل راح و هو عاصر على نفسه 12 كيلو لمون عشان نهني و نبارك بالمناسبة السعيدة..قال سعيدة قال



و البت عماله كل شوية ترفعلنا ايديها في وشنا كأنها نفسها تحط صابعها في عيننا..خلاص خلاص شفنا يا امي خلاص ..مش كده يعني مانتيش اول واحدة تتخطبي



طبعا بعد موجة التهاني اللي جاية من..القلب طبعا..عدى اليوم و كأننا في فيلم من أفلام الزميل الراحل شارلي شابلين..فيلم صاااامت مافيش غير نهى عماله توشوش مدام سندس و يضحكوا و يرجعوا يتوشوشوا و يضحكوا..آه ماهم خلاص هما الإتنين مرتبطشين زي بعض و كل واحدة ليها راجل



..بقية الصيدلية بأه..أجاركم الله..البت سماح كل شوية تقوم تقف في الشباك نقولها مالك ترد علينا
مخنوقة ..مخنوقة مش عارفة آخد نفسي


البت نيفين -ولأول مرة في تاريخ وزارة الصحة-تتعاطف مع المرضى و تكلهم بالراحة..تقريبا قالت يمكن دعاوي المرضى اللي بيدعوها عليها لما بترمي العلاج في وشهم تكون هي السبب في وقف حالها فقالت تغير الخطة و تخليها 4-2-4 يمكن ربنا يفك النحس


البت سمر بأه هي اللي قلقتنا قوي كل شوية تروح ناحية علبة سم الفران اللي في المخزن و تبصلها بصات غريبة كده و ده اللي خلانا طول اليوم مراقبينها و عمالين نبعدها عن أي كوباية شاي بتاعتها أو بتاعة نهى و ما ارتحناش غير لما بعدت عن السم و راحت تلعب بالمقص..المقص سهل ..هتعور حاجة هنقدر نلمها ..لكن سم الفران ده نعمل فيه ايه؟




أنا عن نفسي كنت فرحانة...آه فرحانة فيه حاجة؟؟...البت صحيح سهنة و غلاوية و سماوية و خبيثة ..بس زميلة كفاح يعني.
.و صحيح انا بقيت باعتبر أي حالة خطوبة او جواز على سطح كوكب الأرض إهانة شخصية في حقي..بس خلاص بأه يمكن تكون اول الطابور و الكل يكر وراها.
.وصحيح احنا قلنا كده لما مدام سندس اتجوزت من 4 سنين..لكن يمكن كل 4 سنين واحدة..بالمعدل ده هنحتاااااج
"4*13"
يعني.... 52 سنة على مانخلص لستة البنات اللي في الصيدلية ..لكن برضه أهو يبقى فيه أمل




عدى اليوم اللي كان اطول يوم في تاريخ البشرية و كل شوية ترميلنا فيه معلومة.

.أصل حسام..ده يبقى اسم المأسوف على شبابه
أصل في المستشفى بتاعته..يعني دكتور
أصل مامته الله يرحمها..و كمان مالكيش حماة ..يابنت المحظوظة




و فجاة في آخر اليوم تلتفتلنا بكل بجاحة قال و تقولنا



عن إذنكوا بأه يا جماعة أصل حسام هيجي يوصلني بالعربية بتاعته



...كام نظرة من تحت لتحت على 3-4 أصوات لمصمصة شفايف انطلقت من انحاء الصيدلية و راحت مكملة الجملة



ماتيجي يا مدام سندس نوصلك في سكتنا



طبعا ماهي دي المضمونة بقيتنا خطر على المحروس...الصراحة عندها حق أنا لو كنت أخدت خبر بالموضوع كنت بعته
بني غازي يروح يتجوز اخت مرات أيمن..الله يمسيك بالخير يا أيمن ويرجعك لأهلك بالسلامه



نزلت الهانم جري واحنا وراها بنتدألج ع لسلم و بنوقع كل حاجة في طريقنا المرضى و الموظفين حتى الشجر البلاستيك اللي قدام أوضة المدير ..عشان نلحق نتفرج ع المحروس و على عربيته



الواد مش وحش ..شغال يعني..هو صحيح رفع القلم الرصاص و كل شوية يلحق البنطلون قبل مايقع منه و ودانة واضح انهم واخدين موقف شخصي من بعض أو محترمين دماغه جدا لدرجة انهم واقفين الوقفة السودة دي..لكن خلقت ربنا يعني

صحيح لابس نضارة كعب شفشق مش كعب كوباية و كبيرة لدرجة انها مش بس بتعالج نظرة دي أكيد كمان بتعالج حواجبة و خدوده
لكن راجل ..هو حد لاقي رجالة محترمة اليومين دول



العربية صحيح مش عربية 16-اللي هي 4*4 بس انا باحب أختصر-لكن عربية فخمة برضه 128 حمرا موديل 79..و البنت قعدت جنبه في العربية ولا كإنها قاعدة جنب ابن رئيس مراجيح مولد النبي و بصتلنا بصه كلها غل و تشفي و مدام سندس ركبت وراها..الهي يشوفك الباشمهندس الشافعي و يطين عيشتك يا رب





أما روحت البيت و حكيت لماما بصت للتليفون و هي بتفكر و مدت إيديها و بدأت تطلب في رقم أنا حافظاه كويس قوي..رقم طنط حشرية


مديت ايدي و وقفتها قبل ماتكمل و بصينا في عينين بعض و انا باقولها بعمق و تأثر



لا يا ماما...لأ.. لسه ماوصلتش للدرجة دي



و بعدين مديت إيدي على نوتة التليفونات



هو.. أونكل ديسكو نمرته كام؟؟

MR. PrESIdEnt
24-10-2008, 03:13 AM
ههههههههههههههههههههه
ايه يا بنتي
يعني تغيبي تغيبي وترجعي لنا بحلقة مكررة

ولا دي الاعادة ولا ايه :D
ماهو الواحد بقى ممكن يشوف الحلقة بتاع 5 مرات في اليوم
هههههههههههههههههههه

almazuona
24-10-2008, 05:45 PM
شكرا دكتوره أنا كل اسبوع كل خميس يللا بفتح نت وكده بلاقي حلقتين بس حلقة البت نهى اتخطبت موجوده سابقا اووكي
ميرسي

الدكتورة مها
24-10-2008, 08:09 PM
معلش يا جماعة

الظاهر من كتر ما الواحد بيتفرج على التليفزيون اتعدي منه

ونزلت الحلقة تاني عشان تحفظوها كويس

:D:D:D

سوريييييييييييييييييييييي

واتفضلوا الحلقة الجديدة

الدكتورة مها
24-10-2008, 08:19 PM
بس يا جماعة..داخلة أنا بأه الشقة و ألاقيلكم منظر يقطع القلب ..ماما محاصرة بين طنط حشرية و زوزن و عينيها زايغة و نفسها مقطوع ..وطنط حشرية بتبصلي و وشها مشرق كده و متفاءله..الست دي احنا مش لسه مدألجنها و قاطعين معاها العلاقات و ساحبين السفير من كام أسبوع..ده حتى شعبولا لسه عامل عن الموقف التاريخي ده أغنية بتتذاع في قناة مولتي كل نص ساعة..إيه مافيش عندها من الاحمر ده خالص؟..شيء غريب و الله..بس مش ده اللي استغربتله اللي استغربته بجد هي البت زوزن..البت قاعدة و حاطة رجل على رجل و على وشها ابتسامة و في عينيها فرحة ماطمنتلهاش..الفرحة اللي في العيون دي بتجيبلي حساسية..فرحانين على إيه دول؟..فيه إيه اللي يفرح يعني..إلا إذا..إلا إذا..و كانت الكلمات القاسية و ضربة القدر العنيفة فوق أم رأسي ..و أم رأس أمي كمان..



مش تيجي يا حبيبتي تباركي لسوسن..سوسن خلاص هتتخطب



تاراتا تارارا..تاراتا تارارااااا...

أتاري ماما قاعدة زي أم هنادي اللي خدها الوبا يا خال



و دي كانت أول مرة أعرف معنى كلمة رقبتها بقت أد السمسمة..ماما يا عيني رقبتها إختفت ..دماغها كأنها متركبة قلاووظ بين كتافها على طول و دقنها قربت تلتحم بقفصها الصدري خلاص..و عشان تقدروا وقع الصدمة على ماما لازم تعرفوا حالتها النفسية في الكام شهر اللي فاتوا..الست خلاص بقت على شعرة و ماشية تكلم نفسها في البيت.. و بتستشير أي حد في المشكلة العويصة دي..اللي بقت أصعب من مشكلة طوابير العيش ..أي حد أو أي حاجة


مرة لقيتها فاتحة التلاجة وبتتكلم مع علبة اللبن

يعني لو جه عريس دلوقت نقبله و خلاص و الا نستنى حد كويس..طب لو استنينى نستنى أد إيه؟



شوية و ألاقيها فاتحة فرن البوتاجاز

يعني رأيك كده؟...نستنى؟..و الله إنت نصايحك كلها محروقة و رأيك ناقص سوى



بس اللي قلقني فعلا يوم ماقالتلي هننفض السجادة و بعد ماشلتها على قلبي و طلعتها فوق السطوح ونزلت أشوف إتأخرت ليه و لقيتها ماسكة المنفضة و نازلة هبد في البلاط

طب ماقلتش كده من زمان لييييه..كنا خلصنا من بدري



و ده كله نتيجة منطقية و حتمية و طبيعية لحملات الضغط النفسي و المعنوي اللي بتمارس علينا أنا و هي و احنا طالعين سلالم العمارة اللي بقت مناطق حظر تجول و بقينا بنعدي فيها على طراطيف صوابعنا ولا اجدع راقصات في بالية بحيرة البرلس الشهير




خلاص الناس أكلت وشنا و داخلين على قفانا ..كل يومين عريس يتدألج على السلم و الأخ تويتي ده اللي وقف و فضحنا في وسط السلم (أنظر العريس التاسع في الكتاب اللي لسه ماشتريتهوش لحد دلوقتي يا بيه)..حتى التعاطف اللي كنت باحسه منهم زمان ذهب أدراج الرياح (عادي بتحصل)..ماهو لما كل واحد من جيرانك ال13 يجيبلك عريس و ترفضيه بيتحول السلم كله لحقل ألغام .وواحدة واحدة اتحولت "لسه؟" اللي كانوا بيقولوهالي من كلمة لسه..لكلمة ..لس..لكلمة ..إلللللل..اللي هو حرف اللام مع إخراج اللسان بأطوال تتراوح بين 5 سنتي و نص متر و كل واحد حسب مقدار خنقته و طول لسانة



حتى اللي لسه بيمثل انه متعاطف لازم يختم الحديث بجملة من الفن الشعبي غالبا بتخلينا عايزين نولع في روحنا

هو انتي يا حبيبتي خلاص..ماعادش بيجيلك عرسان؟
لأ يا طنط بيجوا بس معظمهم مش كويسين
آااه..ماهي اللي ما تعرفش ترقص ..تقول الأرض عوجة



انتي يا حبيبتي خلاص؟
خلاص إيه تاني يا طنط؟
خلاص بقوا العرسان يرفضوكي والا لسه بترفضي؟
لأ يا طنط من ده على ده ..بارفض و اترفض يعني عادي
آااه..ما اللى يعمل نفسه رده تنكشه الفراخ



حتى آخر مرة و أنا رايحة الشغل و واحدة فيهم كانت مشغولة و بتدي الزبالة ل "هيثم"الزبال بتاع المنطقة ..لقيتها بتمصمص شفايفها و هي بتقول
ربنا يعدل المعووج
قام هيثم و إيمانا منه بضرورة تكاتف قوى الشعب العاملة و بالأصالة عن نفسه و بالنيابة عن فئة الزبالين المتعلمين قرر إنه يشارك في الحملة الوطنية لتعريف برايد بمقامها و راح قايل
بكرة اللي فى الحلة تطلعه المغرفة



(إيه العمارة البيئة اللي انا عايشة فيها دي؟)


بس أنا مازعلتش من "هيثم" عشان عارفة انه مجروح من ساعة ما رفضته لما اتقدملي بعد ماشاف فيلم "إنتبهوا أيها السادة مصر ترجع إلى الخلف" و افتكر نفسه محمود يس و افتكرني ناهد شريف (فيه الخير برضه بس ربنا يستر و مايتفرجش قريب على الرصاصة لا تزال في جيبي و يفتكرني محيي إسماعيل)..و أنا رغم إعجابي بشياكته (بييجي ياخد الزبالة و هو لابس فيرساتشي و عامل شعرة سابايكي و دايما إيده في جيبه) و رغم إن الواد كسيب (عنده عربية بيئة مصرية
اللي هي
B.M
(بس موديل قديم



لكن عرق الليبرالية و البروليتارية اللي جوايا اتخانق مع عرق البرجوازية و السفسطائية و الإمبريالية الحرة المتشددة و في الآخر اضطريت آسفة إني أرفضه (إفتحوا أي قاموس و ترجموا إنتم ..مش فاضية أشرحلكم)..فالواد إتقهر و حز في نفسيته..عشان كده كل اما ييجي ياخد الزبالة من عندنا و كنت أعدي قدام الباب كان بيبصلي و بياخد نفس عميق و يصرخ بأعلى صوته



زباااااااااالاااااااااااااه



أنا طبعا ماكنتش باخدها على نفسي خااالص مانتوا عارفين قلبي طيب أد إيه و قعدت أدعيله أدعيله لغاية ربنا مارزقه بخطيبته الباشمهندسة نيرمين

نرجع بأة من ذكريات معركة السلم مارس 2008 لطنط حشرية و زوزن

..حصلت؟...حصلت؟...حتى زوزن؟..يعني الأول نهى ..و دلوقتي زوزن؟...رجلي مابقتش شايلاني و اترميت على أول كرسي لقيته و ماما إنطلقت ناحيتي من آخر الصالة و هي بتطوح..ميت مرة أقولها بلاش تشرب حاجة أصفره..بس بتموت في الحلبة أعملها إيه؟
حطت إيديها على كتفي و راسها على راسي و اتفتحنا في العياط


عاااااااااااااااا زوزن يا ماما؟..زوزن؟
عارفة يا حبيبتي ..عارفة
دي شكلها..دي طولها...دي عرضها..دي ..دي..دي بنت طنط حشرية..هو فيه حد يتجوز بنت طنط حشرية؟
يبقى عبيط و مابيفهمش..و ده بأه مانزعلش عليه



طنط حشرية قال إيه جت تحضنا هي كمان..الست دي بقت ولا جمهور الزمالك مابتتأثرش بأي صدمات
شوفتي يا زوزن شوفتي مش قلتلك هيفرحولك ..شوفي دموع الفرح

شوفت يا ماما شوفت..عرفتي بأه يا حبي إن كل شيء نصيب ..مع إني ماكنتش ناوية أتجوز دلوقتي خااالص..بس ..تخيلي ان العريس ده كان مصمم ..مصمم يتجوز دكتورة و تكون فوق ال25..لكن إيه ماما قدرت تقنعه و الحمدلله قرينا الفاتحة إمبارح



سيبيني سيبيني

و احاول أفلفص عشان أبطحها و ماما ماسكة فيا و طنط حشرية عاملالي لمس أكتاف في الحيطة ..لغاية أخيرا ما تحررت من قبضتهم
لأ بأه هو انا خيخة والا إيه
بس يا بنتي بلاش فضايح
فضايح إيه يا ماما الناس دول لازم..لازم
ماقلتكيش إحنا جايين ليه ..ده أخوه بيدور على عروسة
لازم يتغدوا معانا النهاردة ..امال إيه..يا للا يا ماما قومي اسلقي دكر البط اللي جوه هي طنط حشرية دي شوية والا زوزن بتيجي عندنا كل يوم؟ ياللا يا ماما إعمليلك همه أمال
لأ و شوفي النصيب ..هنبقى سلايف
يادي النيلة..كمان هابقى أنا و زوزن سلايف؟ طب و حياة عقل ماما اللي قرب يفوت ليكون ليكي نصيب من قبضة سلايف النينجا..يا دي الهم ..ياللا أديني هاسد مناخيري و اغمض عينيا و ابلعه و خلاص..على الأقل إتقاءا لشماتة هيثم فيا

ماما يا عيني فاقت من الإغماءة اللي كانت فيها
يعني يا حشرية يعني..هو كويس؟

كويس؟..ده طول و عرض و مافيهوش غلطة ده حتى فيه شبه من توفيق جوزي الله يرحمه..و النبي لو كان صغير شوية كنت إتجوزته أنا

الله يرحمك يا أونكل توفيق..و الله كنت راجل..فديت الجيل بتاعك كله ..الجنة و نعيمها يا اونكل و الله

بصي ياحبيبتي هما كانوا عايزين يشوفوكي في البيت هنا بس أنا قلتلهم نتقابل بره
إيه رأييييك؟



أجيبها يمين أجيبها شمال..مش لاقية سبب للي طنط حشرية هي و زوزن بيعملوه
طب لو هو زي اللي قبله يبقى هتجوز زوزن أخوه ليه؟
طب لو هو كويس..يبقى تجيبهولي ليه؟
تفتكروا ظلمتها..تفتكروا الست بتحاول و انا اللي بافتري عليها؟؟




تفتكروا؟







بكره نشوف

mido_a_s
25-10-2008, 05:10 AM
تكررى ما تكرريش
هقراها هقراها
كفاية اسمك عليها يا دكتورة:D

MR. PrESIdEnt
25-10-2008, 09:26 AM
آااه..ماهي اللي ما تعرفش ترقص ..تقول الأرض عوجة

ههههههههههههههههه
اول مرة اسمع المثل ده
وايه كومة الايالية اللي جت في الاخر دي :D

الله يقطع الجواز وسنينه ياختي
شكلي هبدأ افكر اتجوز علشان خاطركم والله مش اكتر
بعد ما كنت خلاص قررت اكبر وبلا جواز بلا نيلة :D

منى توفيق
25-10-2008, 06:18 PM
ولنا هنا وقققققققققققققفة ( علي رأى محمد صبحى فى وجهة نظر ) ..

الحداية مش بتحدف كتاكيت وأكيد طنط حشرية مش هتحدف عرسان ..

خلللللللللي بالك .. اللى اتلسع من الشوربة لازم ينفخ فى الزبادى يا حبيبتشى ..

أكيد هناك مكيدة ..

وربنا معاكى ..

mido_a_s
25-10-2008, 07:27 PM
;) عموما ياللا مش فارقة ومش خسران .... علشان اعرف ده دلوقتي انا الكسبان :rolleyes:

tosoro
25-10-2008, 11:24 PM
عاوزة اعرف اللى حصل يا بنات
اصل الحاجة حشرية دى انا مش مرتاحة لأهلة من الاول ومش نازلالي من زور من ساعت ما بدأت قراية

يلا بسرعة يا مها نزلي الجزء الجديد
بالمناسبة يا مها ... أقطع دراعي ان ما كنتى حاجة من التلاته او قريبه منهم
1- متجوزة وبتشتغلينا
2-لسه فى كليه
3- لسه فى اااااااول قطر الجواز يعنى من 20 الى 23

ابقى اكتبى وقوليلى ;)

سلام

الدكتورة مها
26-10-2008, 12:32 PM
تكررى ما تكرريش
هقراها هقراها
كفاية اسمك عليها يا دكتورة:D


ربنا ميحرمنيش منكم ومن تشجيعكم الرائع دة

http://www.aldohafiles.com/up/20080914_1364207870.gif

الدكتورة مها
26-10-2008, 12:35 PM
آااه..ماهي اللي ما تعرفش ترقص ..تقول الأرض عوجة

ههههههههههههههههه
اول مرة اسمع المثل ده
وايه كومة الايالية اللي جت في الاخر دي :D

الله يقطع الجواز وسنينه ياختي
شكلي هبدأ افكر اتجوز علشان خاطركم والله مش اكتر

بعد ما كنت خلاص قررت اكبر وبلا جواز بلا نيلة :D



وجاى على نفسك ليه بس؟

دة انت كدة هاتعمل تضحية كبيرة جدااااااااااااا

انا بس خايفة انك بعد ما تتنازل وتضحي وتفكر تتجوز

متلاقيش الانتحارية اللى تقبل انها تتنازل وتضحي هي كمان :D:D:D

وعلى راي المثل

ال رضينا بالهم والهم مش راضي بينا :cool::cool:

الدكتورة مها
26-10-2008, 12:36 PM
ولنا هنا وقققققققققققققفة ( علي رأى محمد صبحى فى وجهة نظر ) ..


الحداية مش بتحدف كتاكيت وأكيد طنط حشرية مش هتحدف عرسان ..

خلللللللللي بالك .. اللى اتلسع من الشوربة لازم ينفخ فى الزبادى يا حبيبتشى ..

أكيد هناك مكيدة ..

وربنا معاكى ..



شوفتى بقي يا منى يا أوختشي؟

ال طنط حشرية جايبة عريس

ولسسسسسسسسسسسسسسة

المهم ادعيلي

الدكتورة مها
26-10-2008, 12:40 PM
;) عموما ياللا مش فارقة ومش خسران .... علشان اعرف ده دلوقتي انا الكسبان :rolleyes:



ممكن ترجمة؟
:rolleyes::rolleyes::rolleyes:

الدكتورة مها
26-10-2008, 12:42 PM
عاوزة اعرف اللى حصل يا بنات
اصل الحاجة حشرية دى انا مش مرتاحة لأهلة من الاول ومش نازلالي من زور من ساعت ما بدأت قراية

يلا بسرعة يا مها نزلي الجزء الجديد


باذن الله الحلقة الجديدة هاتنزل قريب جدااااااا

ونورتني بوجودك ومرورك الرقيق

الدكتورة مها
27-10-2008, 04:42 PM
و أخييييرا جاء...موووعد اللقاء


زي ماقلتلكم المرة اللي فاتت ..اللي هي من زمان دي..اتفقنا على اللقاء في أرض محايدة ..أولا عشان الصالون بتاعنا إتملى بالأشلاء و ماعادش فيه كنبه ولا كرسي ولا سنتي في السجادة إلا وعليه آثار المعارك المتلاحقة اللي خضناها من أجل التحرر من .. مش عارفة من إيه بالظبط :rolleyes::rolleyes: لكن أكيد إتحررنا من حاجة..و كمان عشان صاحب البيت هددنا إن لو حصل مننا أي استعمال عنيف للسلم مرة تانية هيضطر آسفا إنه يشيل السلم.. :D:D ولأن أسعار البراشوت اليومين دول كل يوم في الطالع فقررنا ناخدها من قاصرها ونسمع كلام طونط حشرية و زوزن ونتقابل في كافيتريا أو مطعم.
طنط حشرية طبقا لذوقها الراقي عرضت إننا نتقابل في كافيتيريا "عبده الدهل" اللي هو من أرقى المطاعم من وجهة نظر طنط حشرية ..

بالعافية قدرنا نغير مكان اللقاء لمكان أقل شوية في الإعاقة الذهنية .... ورحنا أنا و ماما في الميعاد واحنا في حالة يرثى لها..رجل ورا و رجلين قدام و رجل على جنب عشان جزمتي كانت جديدة و الفردة الشمال ضيقة حبتين..و بنتلفت حوالينا زي اللي عاملين عاملة..طنط حشرية كانت واصفالنا مكان الترابيزة عشان مانتوهش فاتجهنا من فورنا لمكانها


و أنا عمالة أسمع كل اللي أنا عمالة أحفظ نفسي فيه و انا جاية في السكة
انت واكلة و شبعانة في البيت ..مش أي حد يديكي حاجة تاكليها
لو عزموا عليكي قوي خدي كوباية ماية و بس
أكيد طنط حشرية عاملة الواجب ومدياهم صورة عنك زي الطين فلمي الليلة بأة المشرحة مش ناقصة قتلى
اعقلي يا بت كده و خلي ليلتك تعدي على خير
..
لكن
لكن

و خدوا بالكم من ال3 حروف دول كويس عشان مهمين


في اللحظة دي إكتشفت سبب قعاد نص بنات مصر بدون جواز..لأن بمنتهى البساطة ..نص رجالة مصر كانوا قاعدين قدامي..والمشكلة إنهم متدبسين في بعض..او مضروبين في الخلاط..لأ و مش أي خلاط..دول مضروبين في خلاط أسمنت سعة 12 طن
تخين؟..لكن ومالهم التخان؟..يحيى الفخراني ..عمرو أديب..كمال الشاذلي ..حد طايل؟.


يا حلاوته..عسسسل..و مادام مبطن كده و مالي مركزه..آااكل براحتشي بأة...لكن المشكلة اللي واجهتنا انا وماما إننا قعدنا حوالي 6 دقايق مش عارفين نوجه كلامنا لأي منطقة بالظبط..كل ما نفتكر إن دي دماغه تطلع رقبته..ندور على عينيه تطلع فتحة مناخيره ..لكن اللي عمللي قفلة في النفسية بجد..كانت كمية الهياكل العظمية اللي بتوحي بوجود مقبرة فراخ جماعية داخل..تجويفه ..مانا مش عارفاله أي أعضاء جسم خالص

فين جمعيات الرفق بالحيوان.. فين وزارة التموين ..طب فين الأمم المتحدة طيب..هي الفراخ دي مالهاش أهل؟ :eek::eek::eek:

ماما عينيها رغرغت بالدموع و بصتلي و طبطبت على دراعي و على وشها ملامح الإحساس بالذنب..أكيد مر في خيالها إني لو اتجوزته ممكن مرة يجوع يقوم يتسلى في قصبة رجلي والا حاجة :cool::cool:

لكن أنا لأه..ثابتة على موقفي..هاتجوزه و لو كان الرجل بتاع موزمبيق ده اللي صحيوا الصبح لقوه واكل دراع مراته


ماما سألته بصوت مرتجف مرعوب

هو..حضرتك الأستاذ حسين؟
فيه رجه بسيطة حصلت في الكتلة اللي قدامنا ففهمنا إنه لأ
فتنفست ماما الصعداء


(من بين الأكل و المصمصة)
أنا ممدوح خطيب سوسن

أمال هي فين؟

ببص على الترابيزة فلقيت شنطتها


الله امال زوزن فين :eek::eek: ..دي لا يمكن تمشي في حتة من غير شنطتها دي مرة دراعها اتكسر جبسوهولها و الشنطة في حضنها
سهمت شوية و بعدين بصتله و الرعب في عينيا و ايدي بتتمد ع السكينة اللي موجودة على الترابيزة
زوزن.. فين زوزن؟..إنت كلتها والا إيه


فيه حاجات بدأت تتحرك و تلعب في بطنه فتأكدت إن دي زوزن بنحاول تستغيث من جوه

زوزن إستني يا حبيبتي..جايالك

و رفعت السكينة لفوووق و ضربتها ضربة واحدة في بطنه وقبل ماتوصل لبطنه ماما لحقتني على آخر لحظة و هي بتصرخ

يا بنت استني هتعملي إيه؟
زوزن يا ماما ..أكلها و لازم أنقذها..لازم
أكلها إيه بس؟..ده شبعان انتي مش شايفة مزرعة الفراخ اللي واكلها..الفصيلة دي مش بتاكل غير لما بتجوع
لأ يا ماما لأ..هي صحيح غلسة وتلمة هي وعيلتها كلها لكن لأ..ده مش معناه إني أسبها تتاكل ..لأ

مد إيده على إزازة البيبسي ال 2 و شفطها مرة واحدة
و انا بحاول أفلفص من ماما عشان أنقذ البنت و يتهيألي إني سامعاها بتتكلم
بلاش البيبسي العادي خليها بيبسي دايت عشان الريجيم
يا ساااااتر.. تلمة حتى و هي بتتهضم؟

لكن بالف ورايا لقيتها واقفة هي وطنط حشرية كانوا واقفين بيسلكوا في سنانهم
آاااااااااه و انا اللي كنت ظالمة العريس أتاريهم مشتركين في مذبحة الفراخ و يمكن كمان هما اللي قاموا بيها لوحدهم..و إيه حركات الخيانة دي بأااااة..و انا اللي كنت ممنية نفسي إني هاكل على حساب ناس تانيين..من المرات القليلة اللي أقابل فيها عريس من غير ماكلف أهلي و يقعدوا يذلوني بعدها..ماشي بس و ديني لو حصل نصيب و عزمناكوا مرة ع الغدا ماهأكلكوا غير عيش الحكومة أبو مسامير اللي محيطة 3 سنتي و نص ده



فضلنا قاعدين شوية أنا و ماما نبصلهم و نبص لبعض و هو مستمر في الأكل و تعداد الفراخ في دول حوض البحر المتوسط كلها مستمر في التناقص و هما مستمرين في التسليك..شوية كده و فاض بيا بأة
انتوا جايبيننا تفرجونا عريس زوزن والا إيه يا طنط؟..فين العريس التاني؟
هه؟..جاي يا حبيبتي جاي هو إتأخر ليه يا ممدوح؟
(برضه من بين الأكل و المصمصة )
جاي في السكة يا طنط
طب طنط يا طنط هو أمور كده زي خطيب زوزن نفس المقاس يعني؟
و الله يا بنتي مانا عارفة..أصلي ماشفتوش قبل كده ممدوح قال عايز عروسة عشان عندي عريس ..فقولنا نعمل فيكي ثواب ..واجب برضه

دي في حد ذاتها ميزة..ماشافتوش يبقى مش على ذوقها ..يبقى فيه أمل ..موضوع الثواب و الواجب ده نتناقش فيه بعدين


نستنى نستنى ..مش راضي يجي العريس لدرجة ان الكافتريا فضيت و بدأ الجرسونات يقلقوا ..شوية و لقينا الأستاذ ممدوح اتنطر من مكانه


بابا





يا سلام.. حمايا
حبك عليا العياط..من زمان نفسي أقول الكلمة دي..(طبعا أظرف بكتير من حماتي)


دي على فكرة أول مرة جيل الرواد يشاركوا في جلسة من جلساتي كل اللي جالي قبل كده جالي مع مامته..الأباهات دول بالنسبالي لسه موديل جديد ماتعاملتش معاهم قبل كده





طب ده طريقة التعامل معاه إيه بالظبط؟..أضحك في وشة و الا أبص في الأرض؟ أروح أسلم عليه والا آخده بالحضن والا اعمل إيه بالظبط؟..آااه خبرات الواحد الحياتية المحدودة بتفرق قوي في اللحظات التاريخية اللي زي دي





بس دي طريقة جديدة في التعارف أنا أسمع عن عريس يبعت أمه تنقيله ..لكن يبعت أبوه دي جديده..بس الرجل شكله بشوش كده و مبتسم و حبوب و بيبتسم خصوصا لطنط حشرية..يظهر يعرفوا بعض قبل كده





إتفضل يا عريس


نعمممم؟


هزيت راسي عايزة أسلك وداني يمكن أسمع كويس


عريس؟...مجازا يعني


لأ طبعا مجازا إيه؟ هو ده العريس


و ده أتجوزه إزاي يعني..ده جاي بتصاريحه و الا أخطف رجلي لمصلحة الآثار؟


طنط حشرية من تحت ضرسها : وانتي يعني كنتي لاقيه



مديت إيدي تاني ع السكينة
هي دي أخرتها..إنتي يا ست إنتي مش هترتاحي غير لما أفتحها في وشك سبع غرز

عريس زوزن اعترض

هي مين دي اللي تتجوزه لا لا إنتي ماتنفعيش خالص


يا سلااام ؟


آه ..لو فيه عروسة يبقى المدام


و بيشاور على ماما


نعمممم..مدام مين يا زلابية؟..ماما؟..إنت عايز تجوزه ماما؟..و بابا ده نوديه فين
بابا ..إيه ده يا طنط شكرية إحنا ماتفقناش على كده

لا ماهو يكون في علمك يا إما بابايا يتجوزها يا إما أنا مش هاعملها إحنا متفقين على كده..هي شقة واحدة
يعني إيه؟
يعني انا مش هتجوز فيها و أسيب بابايا لوحده ده برضه في سن خطر ..وا لاإيه يا بابا





يا بني آدم لكن دي ماما..يعني متجوزة بابا..إنت مابتفهمش





الراجل اللي كان مركز في حتة تانية خالص


طب والقمممر ده..جوز مين؟





طنط حشرية بتبص وراها


مين؟أنا؟..لأ ..أنا ماليش جوز..أنا فردة :D:D





الرجل فجأة نط و قعد على إيد الكرسي بتاعها.





يبقى خلاص انا عاوز دي





لاااااااااااء ..عايزني إيه؟؟أنا لا يمكن اتجوز بعد توفيق الله يرحمه..و بعدين انا أصوم أصوم و أفطر على تحتمس؟..لا لايمكن :eek::eek:





يبقى خلاص مافيش
سوسن على بعد 3 دقايق من إنها يغمن عليها

ما فيش.. ما فيش إيه؟


مافيش جواز.. ماهو يا إما إحنا الإتنين يا إما مافيش جواز





ماما..باقولك إيه؟..أنا مش هاسمحلك تضيعي الفرصة دي من إيدي..باقولك إيه ياللا ياللا إتكلي على الله :rolleyes::rolleyes:





لا يا حلوة هو مين ده؟..و أنا هاضيع نفسي عشان خاطر مين؟


عشان خاطري مش انا بنتك؟


و لو ..بنتي تقومي تضيعي مستقبلي؟


و هوب نطت زوزن على طنط حشرية و اندلقوا مع بعض على الأرض و سامعاها و هي بتنضرب


باقولك إيه هتتجوزيه يعني هتتجوزيه..

لايمكن أبدا


حرام عليكي يا ماما أنتى عوزاني اقعد قعدة البت دي؟ ( عليا انا) :D:D




آدي تفاصيل المشهد اللي شغال على الهوا

ماما اتفتحت في العياط ..طنط حشرية و زوزن بيضربوا في بعض و هما بيتمرمغوا ع الأرض..الجرسونات اتلموا عشان يتفرجوا و ابتدوا يراهنوا و أنا من كتر البلادة اللي بقت عندي و جتتي اللي خلاص نحست ما تأثرتش و قلت أسلي نفسي و اشتركت معاهم في الرهان.كنت في صف زوزن طبعا ضد طنط حشرية لكن الجملة الأخيرة خلتني مديت إيدي من ورا الجرسونات و رميت السكينة لطنط حشرية..العريس أخيرا و لأول مرة من أول ماشفناه بطل أكل و قعد يبص لطنط حشرية و زوزن و هما بيقطعوا في بعض و على وشه تعبير غريب كده خلاني أخدت ماما و أخدنا ديلنا في سنانا و طيران ع البيت



تكالبنا على جراحنا و نسينا الموضوع خالص ..عادي يعني متعودين على كده
مافكرناش بيه غير خبر صغير ناشرينه جيران طنط حشرية و زوزن في صفحة الحوادث بيطلبوا من أي حد عنده معلومات عنهم إنه يبلغهم لأنهم مارجعوش بيتهم من يجي شهر



تفتكروا يكونوا محجوزين فى مستشفى؟

والا يكون العريس يوميها ..كان لسه ماشبعش



لو كانت الحكاية كده
يبقى انا و بنية صافية و ضمير مستريح
و من أعمق أعماق قلبي باقوله




بالهنا و الشفا

mido_a_s
27-10-2008, 05:15 PM
ممكن ترجمة؟
:rolleyes::rolleyes::rolleyes:



اقصد انك مش خسرانة حاجة
يعنى انتى لفيتى على عرسان من اول الحزب الوطنى لغاية هيثم الروش طحن
جت بقه على عريس طنط حشرية الغلبانة مش يمكن عريس زوزن قال ما اتجوزش قبل اخويا الكبير مثلا فتكون طنط حشرية (مجبر اخاك لا بطل)
عموما كله هيبان مش كده ولا ايه
انا لسه ما قريتش الحلقة
اما اطلع اقراها:D

almazuona
27-10-2008, 08:59 PM
روعه يادكتوره والله البنت دي صعبانه عليا وهيه بدحكنا أوي

mido_a_s
28-10-2008, 06:29 AM
سبحان الله شيخ يابنى يا ميدو
مش قلتلك طنط حشرية مزنوقة :D
وبعدين انتى معرفتيش تعملى كام حركة كده من بتوع هند رستم توقعى بيها الواد عريس زوزن ولا ابوه ولا حته حد من الجرسونات:rolleyes:
فعلا خبراتها الحياتية محتاجة اعادة تقييم ونظرة شموليه مبدأية فى اطار من التنازلات المستمرة واللامستمرة حسب الاوضاع الراهنة على ارض الواقع ايوة اكيدهو ده الحل
لو عرفت تطبقه اكيد مشكلتها هتتحل وتتجوز على طول يلا يا بنات الحل قدامكم اهو انا قلته ومش هعرف اقوله تانى:cool:

اسكندرانيه
28-10-2008, 07:45 AM
يسلممممممممممممممممممممممممممممممممممممممممممممو القصص جميله جدا ومضحكه :D الله يديكي العافيه على مجهودك

MR. PrESIdEnt
28-10-2008, 10:03 AM
آه ..لو فيه عروسة يبقى المدام
و بيشاور على ماما
نعمممم..مدام مين يا زلابية؟..ماما؟..إنت عايز تجوزه ماما؟..و بابا ده نوديه فين


واخدة امها تقطع عليها :D
ياللا على بركة الله
اهي مامتها لقت حاجة بعد ما الراجل يتكل على الله يعني :D

بس ياخوفي البت تتعقد اكتر من كده
امها وهي متجوزة ومخلفة جاي لها عريس وعاوزها :D

منى توفيق
02-11-2008, 10:16 PM
حلوة أوى يا مها .. لكن هى دى آخر حلقة ولا إيه ؟

ღ بنـت الإســـلام ღ
04-11-2008, 05:27 PM
طلعت فوق السطوح هز الهوا كمي كل البنات اتجوزت وانا اعده جنب امي
:confused::confused::confused:
هههههههههههههههههههههههههه
حلوة قوي يا مها تسلم ايديكي ياجميل
ومستنيا تكمليها بليييييييييز
:D:D:D

الدكتورة مها
05-11-2008, 04:06 PM
اقصد انك مش خسرانة حاجة
يعنى انتى لفيتى على عرسان من اول الحزب الوطنى لغاية هيثم الروش طحن
جت بقه على عريس طنط حشرية الغلبانة مش يمكن عريس زوزن قال ما اتجوزش قبل اخويا الكبير مثلا فتكون طنط حشرية (مجبر اخاك لا بطل)
عموما كله هيبان مش كده ولا ايه
انا لسه ما قريتش الحلقة
اما اطلع اقراها:D

اهااااااااااااااا

معلش يا ميدو مخدتش بالي من معنى كلامك

ومعاك حق طبعا

جت على دة؟

المهم طمني بعد ما تخلص الحلقة

الدكتورة مها
05-11-2008, 04:07 PM
روعه يادكتوره والله البنت دي صعبانه عليا وهيه بدحكنا أوي


وحشاني يا المزيونة

ولسة باقي اليوميات احلى وأحلى

الدكتورة مها
05-11-2008, 04:09 PM
سبحان الله شيخ يابنى يا ميدو
مش قلتلك طنط حشرية مزنوقة :D
وبعدين انتى معرفتيش تعملى كام حركة كده من بتوع هند رستم توقعى بيها الواد عريس زوزن ولا ابوه ولا حته حد من الجرسونات:rolleyes:
فعلا خبراتها الحياتية محتاجة اعادة تقييم ونظرة شموليه مبدأية فى اطار من التنازلات المستمرة واللامستمرة حسب الاوضاع الراهنة على ارض الواقع ايوة اكيدهو ده الحل
لو عرفت تطبقه اكيد مشكلتها هتتحل وتتجوز على طول يلا يا بنات الحل قدامكم اهو انا قلته ومش هعرف اقوله تانى:cool:

مش عارفين بصراحة من غير الحل اللى قدمته دة كان ممكن نعمل ايه؟

:D:D:D:D:D


وكويس انك مش هاتعرف تقوله تاني

لاننا مش هانعرف نطبقه زي ما قتله

الدكتورة مها
05-11-2008, 04:10 PM
يسلممممممممممممممممممممممممممممممممممممممممممممو القصص جميله جدا ومضحكه :D الله يديكي العافيه على مجهودك

ربنا يعزك يا قمري




واخدة امها تقطع عليها :D
ياللا على بركة الله
اهي مامتها لقت حاجة بعد ما الراجل يتكل على الله يعني :D

بس ياخوفي البت تتعقد اكتر من كده

امها وهي متجوزة ومخلفة جاي لها عريس وعاوزها :D


هههههههههههههههه

فعلا حاجة تعقد والله

نورت يا مصطفي

الدكتورة مها
05-11-2008, 04:12 PM
حلوة أوى يا مها .. لكن هى دى آخر حلقة ولا إيه ؟


لا لسة يا منى

فاضل حلقة او اتنين وخلاويص


طلعت فوق السطوح هز الهوا كمي كل البنات اتجوزت وانا اعده جنب امي
:confused::confused::confused:
هههههههههههههههههههههههههه
حلوة قوي يا مها تسلم ايديكي ياجميل
ومستنيا تكمليها بليييييييييز
:D:D:D



حاضر يا اسماء

دلوقتى الحلقة الجديدة هاتنزل ان شاء الله

الدكتورة مها
05-11-2008, 04:17 PM
الحاسة الثامنة


جاري البحث عن طنط حشرية في جميع أرجاء المحروسة ..طنط حشرية آه لكن زوزن لأ لأ لأ..قال عايزة تتخطب قبلي قال .طب أهي جت على دماغها و دماغ أمها...بس أمها ..إهئ إهئ..طنط حشرية قطعت بيا قوي ..ماكنتش أعرف إنها هتسيب الفراغ ده في حياتي ..خلاص إتعودت عليها و على عرسانها ..صحيح هم كلهم إكسبايرد و لو أي حد من وزارة التموين أفشهم عندنا هيعملنا محضر زي بتاع الفسيخ الفاسد في شم النسيم لكن يعني.. العرسان كانوا داخلين طالعين رايحين جايين عاملين لنا حس و مخليين كل بنات الحي يهروا و ينكتوا في نفسيتهم ما هم بيبقوا منظر برضه و اللي مايعرفش يقول رز (ماعادش ينفع العدس بأه بعشرة جنيه).....الست دي أنا شكلي كده كنت ظالماها كانت بتعمل عشاني كل اللي في وسعها ..مش ذنبها بأه إن وسعها ده كان ضيق حبتين أهي كانت بتحاول...ماما كمان حست بالفراغ اللي سابته طنط حشرية في حياتنا فقررنا إحنا الإتنين ننزل ندور على طيف طنط حشرية في شوارع البلد و كل أما يتهيألي إني شفتها أشاور عليها و انا باصرخ في ماما بفرح

أهي يا ماما
لا يا حبيبتي دي بيضا



طب دي يا ماما؟
لا يا روحي دي طويلة


طب دي ...هي دي
لا دي مناخيرها بفتحتين مش شكل طنط حشرية خالص



و نرجع نجر أذيال الخيبة و عنينا مرغرغة بالدموع ..آاااه يا طنط حشرية ياللي اتبهدلت بعدك بهدلة الحضري في ماتشات المنتخب


و بعد كل مشاوير البحث و كل البوسترات اللي لزقناهم على الحيطان و العواميد و شبابيك التكاتك ..لم يستدل عليها في أي مكان. نفسي إتسدت عن كل حاجة لا عدت باكل و لا بانام ولا باخرج ولا حتى باروح الشغل.. شفتوا طنط حشرية مهمة أد إيه؟ أهي اتسببت في إني ما أرحش شغلي و ده أكيد أثر على عجلة الإنتاج و و ده اللي خلاني
أشكك في وجود أصابع أجنبية ملحوسة بآثار المؤامرة و تمويل خارجي مشموم من على بعد هدفه الأساسي هو التأثير على نفساويتنا عشان تتوقف عجلة الإنتاج ..و انتوا عارفين عجلة الإنتاج دي إحنا مأجرنها من عند واحد عجلاتي خلقه ضيق و بيشرب هيليوم 24 ساعة في اليوم و لو رجعناله العجلة و هي متوقفة ممكن يجري ورانا بخرطوم الهيليوم و يلسوعنا و انتوا عارفين إن إحنا شعب مش ناقص لسوعة..تفتكروا تكون إسرائيل هي اللي خطفت طنط حشرية ؟..و يكون العريس الأخير ده من بتوع (خالتي بتسلم عليك و بتقولك لو انت راجل مخابرات بحق و حقيق تجيبلنا 10 أرغفة من الفرن اللي جنبنا)؟..برضه مش بعيد



المهم إني من يوم إختفاء طنط حشرية فقدت حاجات كتير جدا..زي ماتكون نفسي اتسدت او جاتلي قفلة في النفسية من الموضوع كله..حتى مهاراتي البناتية اللي أنا مولودة بيها حاسة إنها بدأت تضمحل ..كله ممكن يتعوض و ييجي شوية تمرين لكن الطامة الكبرى إني فقدت الحاسة الثامنة..و دي الحاسة اللي البنت بتعرف عن طريقها الراجل عايز يسمع منها إيه بالظبط..حاجة كده مالناش دخل فيها و بتيجي لا إراديا في حالات معروفة و محدده


بنلاحظها قوي إحنا البنات و احنا ماشيين بنتكلم مع بعض في الشارع مثلا..فور أول ظهور لأي فرد من الجنس الخشن في محيط 3 ميل مننا ..فجأة تلاقي نبرات الصوت إتغيرت و الأسلوب نعم و حتى الحركة بأة ليها قوانين تانية خالص غير بتاعة أخوكوا نيوتن ربنا يجازيه (على اللي عمله في الأجيال المتعاقبة)




قبل الخطوبة تلاقي البنت من دول فجأة تلتفت لزميلها في الشغل


الله إيه الكرافتة الجميلة دي؟..دي شكلها شيك عليك خالص
إيه ده حقيقي بجد؟..ده كل الناس بتقولي عليها فلاحي و لونها وحش..أنا الوحيد اللي معجب بيها
عشان بس تعرف إن مافيش حد فاهمك قدي



طبعا الكرافتة أساسا أخضر في برتقاني و شكلها بيجيبلها اشمئناط و غممان نفس ..لكن الحاسة الثامنة بتأكد لها إنها مادام معفنة كده و هو مصمم يلبسها يبقى أكيد ليها معزة خاصة في قلبه و تبقى سكة مفتوحة تدخله منها


بعد الخطوبة و هي جنبه في العربية و هو بيغني بصوته الأجش المبحوح أكنه "على الشريف" الله يرحمه بيغني وردي وردي وردي في عيد الطفولة تلاقيها مغمضة عينيها و هيمانة


الله يا روحي..صوتك حنين قوي
بجد؟..مع إن ماما كل يوم تيجي تهبد عليا و انا باغني في الحمام و تقوللي الجيران بيشتكوا
عشان مامتك بتسمعك بودانها..لكن أنا باسمعك بقلبي


طبعا هي من جوه بتقول "جاك وجع في قلبك" بس أنا ألبس الدبلة في الشمال و أمسك القسيمة في إيدي و إبقى قابلني لو فتحت بقك أساسا والا قلت كلمتين على بعض



أنا بقه لقيت نفسي مخالفة كل التقاليد و شكلي كده قربت أنسى استخدام الحاسة الثامنة دي للأبد..الأسبوع اللي فات واحد صاحب بابا كان في زيارة عندنا و رغم كل الإستحياطات اللي أنا واخداها مش عارفة عرف منين موضوع الكتاب ( حازي يا بت حازي) و الراجل بيسألني بإبتسامة أبوية كده توحي بإنه شكله بيدور لإبنه على عروسة


إيه ده؟..بجد ..إنتي كتبتي كتاب يا حلوة
بغلاسة
أيوة
إسمه إيه؟
طبعا في الأوقات اللي الحاسة الثامنة شغالة عندي فيها طبيعي بارد و أقول
"كيف تطيعين زوجك"..أو "ألف أكله و أكله" ..أو حتى " كيف تحصل على سيخ حديد عز..بس في إيدك مش في صرصور ودنك "
و ساعتها بابقى عروسة لقطة
لكن بغبائي أرد
حازي يا بت حازي
و طبعا دي كانت آخر مرة اونكل ده يحط رجله فيها في بيتنا




مرة تانية كنت في جلسة إنترفيو مع العريس اللي اتقدملي بعد نشر الكتاب
(آه هو واحد بس)
و أبص ألاقيه بيقوللي
ياللا بأة
نعم؟
ياللا
ياللا إزاي يعني؟
إعملي بأة الشويتين بتوع الكتاب
شويتين إيه حضرتك؟
هزري كده و نكتي و اتريقي على خلق الله


مش آخد بالي أنا بأة و أسمعه اللي عايز يسمعه و أقوم ببطولة إستعباط كوميدي كبير يضرب الإستعباطات بتاعة نادية الجندي اللي كانت بتعملها زمان في تل أبيب
أو حتى ألبس الباروكة أم صلعة بتاعت "حمادة سلطان" و أضرب بنطلون أبيض و زاكتة حمرا و أصدح و أقول
"النكتة الجاية دي..جديدة"
"مرة واحد بيقول لمراته تصدقي جارنا بيقول إنه خان مراته مع كل ستات العمارة ماعدا واحدة بس..قالتله دي لازم الولية الرخمة اللي في الدور الرابع"
تنتارارارام رام رام


لأ..ساعتها أدور ع الحاسة الثامنة ..مش لاقياها..أدعبس جامد..راحت خلاص
أبصله بغباء كده و أقوله..
باقوللك إيه يا أخ ..أهه ده اللي موجود..مش عاجبك شوف المحل اللي جنبنا



شايفين المصيبة اللي أنا فيها..جالكوا كلامي إن المصاب عظيم و الخطب جلل
طنط حشرية و الحاسة الثامنة في وقت واحد




طب أتجوز إزاي أنا دلوقتي بأه؟




يا جماعة ..و العشرة و العيش و الملح..طب بلاش موضوع العيش ده عشان بأة صعب دلوقتي
و البتي فور و الملح حد يقوللي أرجع تاني إزاي الحاسة الثامنة..أو على الأقل يساعدني في البحث عن طنط حشرشر حبيبتشي



لحسن شكلها كده هترسى إني هافضل محطوطة في الفاترينة هنا لأبد الآبدين

almazuona
06-11-2008, 08:11 PM
عشان مامتك بتسمعك بودانها..لكن أنا باسمعك بقلبي


طبعا هي من جوه بتقول "جاك وجع في قلبك" بس أنا ألبس الدبلة في الشمال و أمسك القسيمة في إيدي و إبقى قابلني لو فتحت بقك أساسا والا قلت كلمتين على بعض

جميله أوي روعه يادكتوره
وحشتيني انتي كمان والله
أنا اعرف طنط حشريه فين ؟؟؟
بس جاوبيني شنو يعني حازي يابت حازي أصلا؟
واسم البنت المسكينه دي ايه؟
شكرا
((((طنط حشريه )))) أكلها الأستاذ للي فات ده
ههههههه;)

الدكتورة مها
08-11-2008, 10:39 PM
منورة يا المزيونة يا قمرة
وحشتيني جداااااااااااااااااااا
حازي يا بنت حازي .... يعنى كل البنات تقف صف ( حازي من محازاة) زي يقفوا فى طابور .. بس مش طابور العيش ... دة طابور انتظار ننوس عين مامته العريس :rolleyes::rolleyes::rolleyes:

والبنوتة سميها زي ما تحبي

واحنا بجد خايفين على طنط حش... قصدى شكرية جداااااااا

بس هاتعرفي مصيرها الحلقة الجاية ان شاء المولى

الباحثه2626
08-11-2008, 10:50 PM
بصراحة يا د/مها القصة دى فعلا ملهاش حل

انا مش عارفة ازاى مش قراتها من زمان انا لسة بداى

فيها قريب ومش خلصتها انا فى الصفحة 5 بس قلت لازم ارد

لانى اتاخرت كتير انى اشكرك على القصة الجميلة

دى يا قمر:)

ღ بنـت الإســـلام ღ
09-11-2008, 03:34 AM
مها القصة حلوة قوي يامها
والبت دي شكلها كدة غلبانة ومش لاقية ليها عريس
انا اخويا عايز عروسة ينفع
:D:D:D

ღ بنـت الإســـلام ღ
09-11-2008, 03:35 AM
اية يامها انتي هاتنزلي بقية الحلقة امتا
انا مش قادرة استنا خلاص عايزة اكملها
ياريت مش تتاخري

الدكتورة مها
13-11-2008, 10:56 AM
بصراحة يا د/مها القصة دى فعلا ملهاش حل


انا مش عارفة ازاى مش قراتها من زمان انا لسة بداى

فيها قريب ومش خلصتها انا فى الصفحة 5 بس قلت لازم ارد

لانى اتاخرت كتير انى اشكرك على القصة الجميلة


دى يا قمر:)



أهلا بيكي يا رشا

وانا سعيدة لان اليوميات عجبتك

وان شاء الله تكلمي الباقي وتعجبك اكتر

الدكتورة مها
13-11-2008, 10:58 AM
مها القصة حلوة قوي يامها
والبت دي شكلها كدة غلبانة ومش لاقية ليها عريس
انا اخويا عايز عروسة ينفع
:D:D:D

هاتصل بيها وأقولها على اخوكي

مع انى متاكدة ......... انها هتاخد أول طيارة وتنزل على سطوح بيتكم

اية يامها انتي هاتنزلي بقية الحلقة امتا
انا مش قادرة استنا خلاص عايزة اكملها
ياريت مش تتاخري


حاضر يا أسماء

اتفضلى الحلقة الجديدة ولا تزعلي

الدكتورة مها
13-11-2008, 11:05 AM
جواز نهى من حسام فاضل...فاااضل..فاااضل



قاعدين الصبح مع بعض قاعدة حلوة كده يسودها الود و الإحترام و النفسنة بنطلع غلنا في بعض..كل واحدة كالعادة بتعمل اللي يقدرها عليه ربنا عشان تنكد على زميلتها و تحرق دمها.. اللي نلاقيها فرحانة بنفسها شوية نقولها إيه اللون البلدي اللي انتي لابساه ده؟ :D:D..واللي لابسه طقم شيك نقولها هو حلو بس هو انتي تخنتي كده ليه؟ :p:p..و اللي جاية ع الصبح متفائلة و بتبتسم نقولها أسكتي مش "مهند" اتجوز..

المهم قاعدين في جو السلام النفسي ده نلاقي بسلامتها داخلة علينا و بترملنا حاجة حمرا طويلة و بفتيل كده على المكتب...آااااه..وأخير نفذتي إنتقامك يا نهى...صباع ديناميت؟..هي حصلت صباع ديناميت.. لهو احنا كنا محتضنينك و بنعلمك تلفي صوابع المحشي عشان في الآخر تلفلنا صباع ديناميت؟ :eek::eek::eek::eek:



لكن يا رييته كان صباع ديناميت ..يا ريتها كانت قنبلة مسامير ..يا ريتها كانت عربية مفخخة




إيه ده؟
دعوة فرحي
فرحك؟..فرحك إيه؟..أمال اللي من 6 شهور ده كان إيه؟
لأ..دي كانت الخطوبة..لكن ده الجواز :rolleyes::rolleyes:



جواز؟..إستغربتها قوي الكلمة دي؟..الواحد مسستم نفسه سنين على موضوع الخطوبة ..مين هتتخطب و مين بتفسخ الخطوبة و إمتى يا رب "أحمد عز" يخطبني و اذل كل الناس و الكلام ده..
أقصى أمانينا بتقف عند الخطوبة ..ما جاش في دماغنا إن فيه مرحلة تانية بعد كده


أتاااري..يوم كانت بتسألنا على محلات صيني و نسألها ليه تقولنا باعمل حسابي لعيد الأم..يوم تسألنا على دمياط نقولها إشمعنى تقولنا نفسي في أكلة سمك..الكبيرة بقه يوم ما سألتنا على محل فساتين فرح و قالتلنا إن صورة جواز مامتها إتحرقت و عايزة تأجر فستان تتصور بيه تاني..و إحنا صدقنا؟..هو إحنا هبل قوي كده والا إيه؟؟؟ :cool::cool::cool:


الدعوة كانت طويلة لونها أحمر ..(مافيش أي احترام لشعور أي حد زملكاوي)..و ملفوفة بشريط أبيض في أسود في أحمر..(مافيش أي إعتبار لشعور بعثة مصر في بكين :mad::mad::mad:)..و قال إيه ملفوف معاها سنبلة قمح..يعني إيه بقه سنبلة القمح دي إن شاء الله..دي أسلقها و الا أقليها و الا أطحنها و أعمل منها رغيفين ..مافيش أي إعتبار للناس اللي واقفين ليل و نهار في طوابير العيش؟ (الكلام ده في الصين طبعا مش عندنا ماتودوناش في داهية :confused::confused::confused:).. لأ و إيه ..الفرح كان تاني يوم..فاكرة بسلامتها إنها كده في السيف سايد و ماحدش هيلحق يعملها حاجة ..بس على مين..و حيااااة أيمن اللي اختفى في المسافة بين ليبيا و قبرص و ماحدش يعرفله طريق ..ليكون يوم تاريخي يفتكره الناس في الشرق الأوسط الجديد على مر العصور




طبعا هي رمتلنا الدعوة و جرت واحنا بعد مشاورات قررنا إن كلنا نروح ..يعني تقعد تقول علينا غيرانين والا مفروسين و الا تطلع إشاعة ع البت نيفين إنها قعدت تعض في إيد رحاب لما العضم في إيديها إنكشف..والا تقول على أسماء إنها قعدت تضرب دماغها في الحيطة لحد الحيطة ما اتعورت..والا تتطاول و تقول عليا إني قعدت أجز على سناني لما كل الحشو اللي في ضروسي وقع..لأ..مش هانديها الفرصة دي أبدا..و بعدين أدينا هنكون هناك ..و يمكن تجد في الأمور أمور



المهم اتفقنا على الحضور و اننا إيد واحدة و بما إن الموضة السنة دي في الفساتين اللبني و الأصفر..فقد اتشحنا -طبعا- كلنا بالسواد..ما هو إحنا في الحقيقة كنا رايحين نعزي....نعزي في الإنسانية..نعزي في التكافل ..نعزي في مصلحة الدولة العليا..الناس بقالهم 3000 سنة بيقولوا نظموا النسل و دي بمنتهى البجاحة رايحة تتجوز عشان تخلف و تجيبلنا عيال قمامير يلعبوا و يغنوا و ..أممم..قصدي عيال مقرفين يزنوا و يكسروا و يوجعوا دماغنا و يخلصوا على موارد البلد ..لكن لأ..أنا لا يمكن أسمح بكده أبدا..و أنا رايحة على قاعة الفرح لمحت اللوحة الكبيرة بتاع "وقفة مصرية"..(نفركش جواز أختنا..نتشبرق كلنا) و من هنا من هذا الموقف قررت أخرج مخزون التربية الوطنية اللي جوايا كله و أنفذ المطلوب..مش عشاني..لكن عشان مصر



في الفرح بقه المضروبة في قلبها واقفالي بفستان فرح قطره إتنين كيلو (دون أي إعتبار للتكدس السكاني ولا قانون المرور الجديد) ..جنبها الدكتور حسام ترتسم السعادة و الترحاب على كل ملمح من ملامح وجهه, ودانه بتهوي على المعازيم و سنانه كلها خارجة بره بقه بترحب بيهم..باختصار كل الديفوهات اللي أنا باحبها كأنها واقفة بتغيظني و تطلعلي لسانها..يا بنت الإيه يا نهى..مابتقعيش غير واقفة



اجتمعنا على أول ترابيزة قدام الكوشة (إلهي تولع باللي فيها) :mad::mad::mad: و مدينا إيدينا فوق إيدين بعض و أقسمنا قسم حزبنا الجديد (كتع) "كيف تقهرين عروسة" بقه المرة دي , و هي طول ما بترقص مع المحروس عينها علينا وعلى وجهها أقسى آيات الفزع و الرعب




الصراحة هي لو تعرف إحنا بنتفق على إيه..كانت إترعبت أكتر



و أول ما الراجل بتاع الدي جي أبو صوت وحش ده قال عايزين أصحاب العروسة و قفنا كلنا حواليها زي شلة صقور حوالين فار أبيض مذعور و استعنا بالله





و بدأنا تنفيذ الخطة


.

.

almazuona
13-11-2008, 01:01 PM
لااااااااااااااااااااااااااا
حرام عليكي يادكتوره
كميلها رجاءا
مش ممكن أستنى للأسبوع الجاي لما افتح نت مره تانيه
بليز
عايز أعرف حيعملوا أيه في البنت المسكينه
الكبيرة بقه يوم ما سألتنا على محل فساتين فرح و قالتلنا إن صورة جواز مامتها إتحرقت و عايزة تأجر فستان تتصور بيه تاني..و إحنا صدقنا؟..هو إحنا هبل قوي كده والا إيه؟؟؟
كبيره كبيره
طبعا شكلهم هبل لما صدقوها

ღ بنـت الإســـلام ღ
13-11-2008, 03:09 PM
يانهار مش باين
لو فية بنات فعلا كدة يامها والله تبقي الدنيا تخرب ومافيش بنت تتجوز
من كتر الحقد اللي في البنات
والا تقول على أسماء إنها قعدت تضرب دماغها في الحيطة لحد الحيطة ما اتعورت
وبعدين بقا يا مها مين اسماء دي تقصدي بيها مين
اكيد مش انا طبعا
:D:D:D:D

princemady
15-11-2008, 12:22 AM
أشكرك د.مها على هذا العرض المتميز والأسلوب الشيق المسلسل اللى حايخلينى أموت واعرف بقية الرواية لحد نهايتها
بجد اختيارك للراوية اختيار موفق جداً وأسلوبك فى عرضها غاية فى التشويق والإثارة
بس أرجوكى ماتتأخريش علينا بباقى الحلقات

mido_a_s
15-11-2008, 02:59 AM
متتاخريش يا دكتورة وربنا معاكى :):)

essaweat
16-11-2008, 05:46 AM
حلوة اوي الجزء التاني
بس تازل الصيدليه
هههههههههههههههههههههههههه
بجد ضحكت اوي عالصبح كده

dr.omar
17-11-2008, 06:18 PM
أسلوبك جميل جداً يا دكتورة فى الكتابة الساخرة
ليه ما بتنقليش على المرحلة التانية بعد كتابة الموضوعات الخفيفة
يعنى هما كل الكتاب الساخرين اللى ماليين السوق أحسن منك فى إيه؟!
بالتوفيق

الدكتورة مها
19-11-2008, 03:40 PM
لااااااااااااااااااااااااااا
حرام عليكي يادكتوره
كميلها رجاءا
مش ممكن أستنى للأسبوع الجاي لما افتح نت مره تانيه
بليز
عايز أعرف حيعملوا أيه في البنت المسكينه
الكبيرة بقه يوم ما سألتنا على محل فساتين فرح و قالتلنا إن صورة جواز مامتها إتحرقت و عايزة تأجر فستان تتصور بيه تاني..و إحنا صدقنا؟..هو إحنا هبل قوي كده والا إيه؟؟؟
كبيره كبيره
طبعا شكلهم هبل لما صدقوها


حاضر يا المزيونة

مش هاتاخر عليكي

الدكتورة مها
19-11-2008, 03:42 PM
يانهار مش باين
لو فية بنات فعلا كدة يامها والله تبقي الدنيا تخرب ومافيش بنت تتجوز
من كتر الحقد اللي في البنات
والا تقول على أسماء إنها قعدت تضرب دماغها في الحيطة لحد الحيطة ما اتعورت
وبعدين بقا يا مها مين اسماء دي تقصدي بيها مين
اكيد مش انا طبعا
:D:D:D:D


ليهم حق يحقدوا يا سمسمة

هما يعنى كانوا لاقوا جواز وقالوا لا؟؟؟؟؟؟؟؟؟

:o:o:o

ههههههههههههههههههههههه

no comment

لاحسن اتعض

;););)

الدكتورة مها
19-11-2008, 03:44 PM
أشكرك د.مها على هذا العرض المتميز والأسلوب الشيق المسلسل اللى حايخلينى أموت واعرف بقية الرواية لحد نهايتها
بجد اختيارك للراوية اختيار موفق جداً وأسلوبك فى عرضها غاية فى التشويق والإثارة
بس أرجوكى ماتتأخريش علينا بباقى الحلقات

منورة يا قمري

وباذن الله مفيش تاخير ولا حاجة

واشكرك على كلامك الرائع المشجع

متتاخريش يا دكتورة وربنا معاكى :):)

ازيك يا ميدو؟؟؟؟؟؟؟؟؟

يارب تكون بخير

ومفيش تاخير

الدكتورة مها
19-11-2008, 03:46 PM
حلوة اوي الجزء التاني
بس تازل الصيدليه
هههههههههههههههههههههههههه
بجد ضحكت اوي عالصبح كده

وانا مبسوطة انى قدرت اضحكك

ويارب محدش يمر بالبلاوي دى كلهاااااااااا

أسلوبك جميل جداً يا دكتورة فى الكتابة الساخرة
ليه ما بتنقليش على المرحلة التانية بعد كتابة الموضوعات الخفيفة
يعنى هما كل الكتاب الساخرين اللى ماليين السوق أحسن منك فى إيه؟!
بالتوفيق

اهلا بدكتورنا

والموضوع فعلا نزل فى صورة كتب فى السوق

وانا نقلت المضووع مش اكتر

وماليش فى الكتابة بصراحة خالص

الدكتورة مها
19-11-2008, 04:05 PM
البت نهى إتجوزت ..بس مش بالساهل يعني






أنا كنت وصلت لفين؟؟؟؟؟؟؟؟؟ آه كنا وقفنا في دايرة حوالين البنت السهنة التي لا تتمتع بأية روح وطنية و عايزة تبوظ مخطط التنمية بتاع البلد و رفعنا إيدينا و حلفنا القسم

أحلف بسماها و بترابها..لهشلفط وش اللي خطبها
..


لكن لأ..و هو ذنبه إيه؟..هي السبب ..شيرشيه لا فام ..إسألوني أنا..أيوه أيوه و كمان خلتني أرطن بالفرنساوي عشان
كده لازم أتصرف بسرعة أنا بقيت باقول كلام غريب و بتصرف تصرفات أغرب ..و لازم أنهي الموضوع ده يا إما مش هلاقي نفسي :mad::mad:


فلاش باك بقه سريع كده..ليلة الفرح البني ده و أنا راجعه من الشغل فضلت أفكر و قلت لنفسي يا بنت يا وطنية يا قمر إنتي ..البلد محتاجة كوادر و الحزب (حزب كتع الإشتراكي الوحدوي طبعا) محتاج دماء جديدة و انتي مش هتعملي زي الناس الغير متفتحين و ماتعمليش حساب للمستقبل و تربي صف تاني قادر على تحمل المسئولية لوجدت في الأمور أمور..لكن ألاقيه فين الصف التاني ده؟..أجيبه منين الجيل الجديد؟ ..فجأة قبل ما أوصل باب شقتنا لقتني باطير في الهوا و أضرب شقلباظ ماحصلش قبل ما أستقر على الأرض في وضع زرع بصل الشهير..بابص حواليا لقيت الأرض مليانة بلي و في لحظة ظهر قدامي الوش البريء ذو الإبتسامة الشيطانية ..هند بنت أماني..أييييوان هي دي..البت شخصية كده و مركز و بأه ليها شنة و رنة في المنطقة ..عاملة تنظيم عصابي مكون من كل عيال الحي و طوول النهار و الليل مقالب في الناس..بس البت عليها عقل إيه ..في الشدة شديد و في الأذية مؤذي..وجدتها..هي دي ..خير خلف لخير سلف..أخدت البت من إيديها ..طبعا بعد ركبتين في قصبة رجلي و فاصل من الخربشة العض و رستها ع المطلوب بعد ما لهفت 15 جنيه عشان تشتري بيهم مصاصتين(عيال غلابة و الله عايشين في الغلا ده إزاي) و يوم الفرح إستأذنت أماني اللي كانت هتزغرط و قعدت تحلف عليا آخد جوزها بالمرة و يحلوا عن سماها الإتنين ..لكن أقنعتها بالعافية إني آخد البنت لوحدها و أبأه آخد الأستاذ فوفو أفسحه في فرصة تانية إن شاء الله




عودة ليوم الفرح الكحلي ده..وقفنا إحنا جيل الرواد حوالين العروسة و ماعداناش طبعا إننا نلف لفتين كده و ناخد كام منظر قدام الكاميرا ..لعل و عسى..و إدينا للبنت نظرتين سيبوا ركبها و سيبنا المرحلة الأولى و جبهة القتال لجيل الغد..البت هند بقه تعجبكم قوي ..في ثواني كانت متعرفة على كل العيال اللي في الفرح و ضمتهم لصفوف المقاومة و راحت مرتبة قواتها و الكل أخد مكانه في قاعة الفرح و نص ساعة و كانت مدية إشارة الهجوم




منى توفيق الطفلة البريئة صاحبت الملامح التي تدل على إن أمها بتدربها لتكون أول سفاحة على مستوى الجمهورية و القارة الإفريقية و يمكن بعدها تحترف, تمركزت جنب العروسة و العريس ........... وأول ما بدأوا يشربوا الشربات افتكرت إنها ماسلمتش على العريس (ذوق و الله) ماتعرفش إزاي بقه كوباية الشربات بتاعة العريس فجأة إستقرت في حجر العروسة و الفستان الأبيض بقه أبيض في فوشيا (على فكرة بقه أحلى بكتير.. كنت تحسه فاضي كده و مش مدندش كما ينبغي ..إيه مدندش دي؟..ما علينا :rolleyes::rolleyes:) الفرح كله سكت و بص للبنية على أساس إنها هترقع بالصوت بأه و تقول له إنت مابتشفش و يقوم هو رازعها يمين طلاب مكن و نخلص من الليلة السودا دي و الراجل أبوصوت وحش بتاع الدي جي اللي صدعنا ده..الخطة كانت على وشك النجاح و البت لسه هتصرخ و احنا استعدينا نزغرط لكن لقيتها بصتلنا كده بطرف عينها و شكلها فقست الموضوع ..البت السهنة سهمت شوية و قامت راسمة إبتسامة واسعة




فداك يا حبيبي




نعم؟..فداك ..و يا حبيبي؟:eek::eek::eek: .هو ده كل اللي قدرتي عليه؟..فين "ما تفتح يا أعمى؟"..فين "إنت انتصيت في نواضرك؟"..فين " إنت عارف الفستان ده بكام ..ده تمنه يشتري أهلك كلهم"..إييييه..عليه العوض في المرأة المصرية و قاموسها اللغوي الفخيم

ما علينا ..أنا لسه مافقدتش الأمل في زهورالمستنقع..قصدي المستقبل




woover طفل وديع فيه تاتش من كمال الشاذلي و هو صغير..لئيم كده و سهن و بنضاره (ده woover طبعا) تمركز (برضه) جنب ترابيزة التورتة و بمنتهى البراءة اللي في الدنيا مد إيده على مفرش الترابيزة عشان كان عايز يلمع بيه إزاز النضارة (يمشي بيها مغشلقة يعني؟) مد إيده و في سره حلف القسم و هوب كانت نهى واخدة التورتة ال5 أدوار في حضنها و مستقرة على الأرض في وضع الكاتب المصري الفرعوني القديم ..الحممممد لله أكيد دلوقتي ترجع لعقلها و تعرف إن الجوازة دي نحس و تنفد بروحها و الا عريسها يشوف منظرها كده يعرف إنها شرارة و كل مناسبة ليها حادثة و على نهاية أول سنة جواز هتكون اتشوهت و يبقى مصيرها تطلع في إعلانات ميلودي" أول إنجليش أول ذا تايم"..و يقوم حادفها اليمين و ربنا يستر و ماتوطيش و ييجي في حد تاني و نخلص بقه من الليلية الزرقا دي و البوفيه اللي جايبينه تبرع من بنك الطعام فرع الصومال ده ..لكن البنت الصفرا دي أبداااااااا..اتاخدت كده شويه و بعدين بصتلنا و فجأة اتفتحت في الضحك و قعدت تاخد حتت من التورتة من على الفستان و تأكل المأسوف على شبابه في بقه




آااه ما بدهاش ..احنا كده لازم نعمل معاها الكبيرة بأه ..إديت الإشارة لفريق الرواد عشان ينتشروا و إضطريت آسفة إني أدي الضوء الأحمر لهند عشان تبقه ضربة مزدوجة مالهاش رجعة..البت هند إتلفتت حواليها و مدت إيديها على شمعة محطوطة جنب الكوشة و نزلت (بمنتهى حسن النية) تدور على قرش وقع منها في وسط الزحمة (مش باقولكم جيل غلبان) ..القرش كان وقع فين بأااه؟..إسم الله عليكم..تحت جيبونة نهى ..نزلت البنت الرقيقة دي و أنا متابعاها و قلبي واقف في وسط زوري من القلق عليها لحسن حد ياخد باله منها و بعدين يمكن ياخد منها القرش..قربت البنت م الفستان بالشمعة..قربت قوي و لسه هتنطلق أول شرارة و تمسك في الجيبونة ..بارفع عيني لقيت نهى أخدت بالها و سحبت الفستان بسرعة و بصتلي بصة ..عمري ما هنساها..فزع على استغراب على جملة بتطوف جوه عينيها الإتنين بتقول (كده بردوا؟ ) و راحت زي ما تكون خارت قواها (أيوه هما بيقولوها كده) و قعدت في ركن القاعة البعيد و هي عمالة تتلفت حواليها و كأنها بتقول "كلكوا عليا والا إيه؟"..صعبت عليا المضروبة..رحت قعدت جنبها ع الأرض ..رفعت عينيها و بصتلي و فجأة حطت راسها على كتفي و إنفتحت في العياط ..بابص بعيني في أنحاء ساحة المعركة لقيت العريس بيرقص هو و أصحابه و هو ده كل اللي همه ..أمه و أمها بيلفوا بالشبكة يفرسوا في المعازيم و هو ده كل اللي يهمهم ..المعزيم واقفين يلغوا في البوفيه و ده كل اللي هاممهم ..حسيت إن البت دي غلبانة و ماحدش حاسس بيها غيري..تحركت بعضا من المشاعر الإنسانية اللي كنت مخبياها تحت سجادة البطين الأيمن آخر مرة و أنا بانضفه فأطلقتلها العنان ..و في لحظة عدم صدق مع النفس رفعت إيدي إشارة بانتهاء العمليات العسكرية و إيقاف الجزء التاني حرب الإستنزاف ..




أمانى سحبت فلوسها من إيد الكهربائي اللي كانت اتفقت معاه يعملها ماس كهربائي محندق كده و يولعلها في المجلس..قصدي القاعة..الباحثة 2626 سابت ودن أم العريس بعد ما كانت عمالة تحكيلها حكايات عن البنت ما اعرفش هي إيه (ربنا يستر على ولايانا) ..و asmaaصرفت نظر عن كعبلة العريس عشان يقع في اتجاه أحلام و هي مستعداله بسكينة التورتة..جم البنات و هم مستغربين و اتلمينا كلنا حوالين البت اللي شغالة شحتفة و نهنهة

خلاص ..قومي إخفي و اتجوزي بدل ما أرجع في كلامي

البنت ماصدقت و قامت جري و كملت الفرح ..بعريسها بفستانها بتورتتها بشرباتها ..إيييه..أهو الواحد يعمل الخير و يرميه ع الأرض..معلش بأه يا مصر..كان بودي أخدم و الله لكن أعمل إيه في قلبي الرهيف ؟البنات ماكانوش مقتنعين باللي أنا عملته و كان لسه باين على وشوشهم أمارات الإمتعاض

كده؟..و احنا اللي فاكرينك قوية؟

جبتي الضعف ده منين؟

ده كان خلاص هايلبس في سكينة التورتة

معلش بأه يا جماعة..البت غلبانة و منكسرة و صعبت عليا ..و بعدين أكيد هتقدر إن رقبتها كانت في إيدينا و سيبناها بمزاجنا..دلوقتي تشوفوا

عدت الليلة الرصاصي و جت آخر لحظة في الفرح ..لحظة البوكية ..مسكت البوكية و إدتنا ضهرها ..شوية و لفت و بصتلي عشان تحدد موقعي بالظبط و غمزتلي..يا سلااام..أنا قلت كده برضه..هو ده الإمتنان ..هو ده العرفان بالجميل ..يا فرحة مصر بيكي يا نهى ..وقفنا كلنا صف واحد و كل واحدة مستعدة تلقف البوكيه ..لكن أنا الوحيدة اللي كنت عارفة إنها هترميهولي و هوب في لحظة راحت لفة ناحيتي و بعزم ما فيها و طااااخ..بالبوكية في وشي و أخدت بعضها و طلعت جري على بره..ما دريتش بنفسي غير و هما بيعملولي كمادات على عينيا و بيحاولوا يشوفوا صرفة في الفتحة التالتة اللي ظهرت في مناخيري



هاااه؟..مش دي اللي كنتي بتدافعي عنها ؟




مش كان زماننا ولعنالها في الفرح؟




معلش معلش..مش ليها بيت و فيه أشياء قابلة للإشتعال؟..مش ليها ستاير و كنب..مش ليها جوز دلوقتي؟..بت يا هند ..خدي معاكي سكينة التورتة..بكره هنحتاجلها ..و برضه مش عشاني...كله عشان مصر

ღ بنـت الإســـلام ღ
19-11-2008, 04:21 PM
هههههههههههههههههههههههههههههههههههه
هههههههههههههههههههههههههههههههههههههه
لاء بجد يا مها انتي مش معقولة والله
انتي بجد هايلة
وبالمناسبة انا مكنتش هاكعبل
العريس بس دة انا كنت هاقطم رقبتة كمان
منتظرين الباقي يا مها
علشان نشوف عصابة المنتدي عملت اية مع نهي

بنت النور
19-11-2008, 04:27 PM
بجد بجد انتي تحفة دمك خفيف اوي اوي و انا من اول ما بلشتي بكتابة الرواية دي و انا متابعها و بستنا فيها على احر من الجمر تسلم ايدك يا قمراية دنتي تحفة

الدكتورة مها
19-11-2008, 04:30 PM
هههههههههههههههههههههههههههههههههههه
هههههههههههههههههههههههههههههههههههههه
لاء بجد يا مها انتي مش معقولة والله
انتي بجد هايلة
وبالمناسبة انا مكنتش هاكعبل
العريس بس دة انا كنت هاقطم رقبتة كمان
منتظرين الباقي يا مها
علشان نشوف عصابة المنتدي عملت اية مع نهي


يبقى انتى السبب فى فشل الخطة

اخنا مش متفقين انك هاتكعبل يالعريس بس :mad::mad:

لازم يعنى الحركات الارتجالية دي ( يعنى ايه متسالنيش)

وهاتشوفي قريب باقي العصابة وبلاويها

الدكتورة مها
19-11-2008, 04:32 PM
بجد بجد انتي تحفة دمك خفيف اوي اوي و انا من اول ما بلشتي بكتابة الرواية دي و انا متابعها و بستنا فيها على احر من الجمر تسلم ايدك يا قمراية دنتي تحفة


بس عيب عليكي يا احلام اللى كنتى هاتعمليه دة

معقولة تمسكي السكينة للعريس؟؟؟؟؟؟؟؟؟؟

شكلك غلاوية زي بقية عضوات المنتدى :mad::mad:

اما نشوف يوم فرحك هايحصل ايه؟؟؟؟؟؟؟؟


بس متقلقيش عندي ليكي خطة متخرش المية

بنت النور
19-11-2008, 04:53 PM
انا لسة مكملتش قراية فمبعرفش لسة انا ليييييه عملت كدة بالعريس حقرة و قولك ردة فعلى مرسي عشان حتطيني بالرواية يا حبيبتشي

ღ بنـت الإســـلام ღ
19-11-2008, 05:00 PM
يبقى انتى السبب فى فشل الخطة

اخنا مش متفقين انك هاتكعبل يالعريس بس :mad::mad:

لازم يعنى الحركات الارتجالية دي ( يعنى ايه متسالنيش)

وهاتشوفي قريب باقي العصابة وبلاويها


يا سلام يعني هاتيجي عليا انا يعني يا مها
ماتشوفي انتي حنية قلبك هيا اللي بوظت الخطة
اللي اعدنا نخطط ليها قبل الفرح باسبوع
عموما هانعوضها العملية الجاية

منى توفيق
19-11-2008, 07:41 PM
منى توفيق الطفلة البريئة صاحبت الملامح التي تدل على إن أمها بتدربها لتكون أول سفاحة على مستوى الجمهورية و القارة الإفريقية و يمكن بعدها تحترف, تمركزت جنب العروسة و العريس ........... وأول ما بدأوا يشربوا الشربات افتكرت إنها ماسلمتش على العريس (ذوق و الله) ماتعرفش إزاي بقه كوباية الشربات بتاعة العريس فجأة إستقرت في حجر العروسة و الفستان الأبيض بقه أبيض في فوشيا (على فكرة بقه أحلى بكتير.. كنت تحسه فاضي كده و مش مدندش كما ينبغي ..إيه مدندش دي؟..ما علينا :rolleyes::rolleyes:) الفرح كله سكت و بص للبنية على أساس إنها هترقع بالصوت بأه و تقول له إنت مابتشفش و يقوم هو رازعها يمين طلاب مكن و نخلص من الليلة السودا دي و الراجل أبوصوت وحش بتاع الدي جي اللي صدعنا ده..الخطة كانت على وشك النجاح و البت لسه هتصرخ و احنا استعدينا نزغرط لكن لقيتها بصتلنا كده بطرف عينها و شكلها فقست الموضوع ..البت السهنة سهمت شوية و قامت راسمة إبتسامة واسعة


يعنى أنا يا مها الحق عليّ إنى كنت عايزة أضيف نوع من التجديد علي لون فستانها .. غلطت يعنى :(

وبعدين ماهى البعيدة طلعت معندهاش دم ولا كأنى عملت حاجة يعنى هو كان حوق فيها :mad:

امانى
19-11-2008, 08:29 PM
ههههههههههههههههههههه عشان تعرفوا انى الممول الاصيل والوحيد للعصابه بتاعتكم وتعرفوا انى مستعده اضحى حتى اخر سحتوت فى اموالى (يعنى ايه سحتوت)؟؟....:rolleyes::rolleyes:

الباحثه2626
19-11-2008, 09:24 PM
هههههههههههههههههههه

بجد مش لاقية كلام اقوله القصة روعة اواكتر من روعة دمها زى العسل وانا فرحانة قوى انك افتكرتينى

لاء وايه من جيل الرواد يعنى مش كومبرس وممكن الاقى ليا دور تانى ومن الناحية دى اطمنى انا معاك

يا ريس فى اى خرابات ...خناقات ....لبش ..فى اى منطقة فى العالم بس انت قشر ياجميل;););)
بس بلاش دور النمامة ده مش لايق على خاااااااالص
بالحق قبل ما انسى شوفتى البنت منى قالت عليكى ايه وانت غايبة هابقى اقولك بينى وبينك

almazuona
20-11-2008, 01:24 PM
روعه يادكتوره
بجد جميله كمليها بسرعه أرجوكي
حلقه جميله
أوحساسها دا جاه منين
بعدين البنت نهى لما حددت الموقع عشان ترميلها البوكيه
مش ضروري قصدها تصيبها يعني
يمكن تكون جت بالغلط

essaweat
24-11-2008, 11:17 AM
نفسيته..عشان كده كل اما ييجي ياخد الزبالة من عندنا و كنت أعدي قدام الباب كان بيبصلي و بياخد نفس عميق و يصرخ بأعلى صوته


زباااااااااالاااااااااااااه

ههههههههههههههههههه
الله يخربيت كده
لما العزيز تذله الايام والليالي
اليوميات دي فعلا مش ممكن
ونقلها نشكر الدكتوره مها عليه لانك بصراحة اضفتي عليه تشويق رهيب

woover
24-11-2008, 12:36 PM
هههههههههههههههههههههههه
فوق الفظيع فوق الفظيع
بس لعلمك يا دكتورة
انا كان عيني على التورته
اول ما البت هند قالتلى تورته وكده
ماعرفتش امسك نفسي
رحت جرى على الفرح
بس اهى وقعت فى حضن نهى بقى
مكانش ليا نصيب فيها
ولعلمك
انا كنت بدى دروس لكمال الشاذل واصحابه بس انا اعتزلت دلوقتى وسبتلهم هما يكملوا

الدكتورة مها
24-11-2008, 04:02 PM
انا لسة مكملتش قراية فمبعرفش لسة انا ليييييه عملت كدة بالعريس حقرة و قولك ردة فعلى مرسي عشان حتطيني بالرواية يا حبيبتشي

حطيتك بالرواية؟

هو انتعى نسيتي دورك المهم والفعال فى الليلة دى والا ايه؟


شكلك كدة نسيتي وعاوزة تخلعي منها

الدكتورة مها
24-11-2008, 04:08 PM
يا سلام يعني هاتيجي عليا انا يعني يا مها
ماتشوفي انتي حنية قلبك هيا اللي بوظت الخطة
اللي اعدنا نخطط ليها قبل الفرح باسبوع
عموما هانعوضها العملية الجاية



اعمل ايه بس يا اسماء؟

البت صعبت عليا خالص


وعنيها قالت كلام كبير أوى


وكمان مين عالم؟


مش يمكن لما تكون فاتحة خير على بنات العصابة كلها؟

الدكتورة مها
24-11-2008, 04:10 PM
يعنى أنا يا مها الحق عليّ إنى كنت عايزة أضيف نوع من التجديد علي لون فستانها .. غلطت يعنى :(

وبعدين ماهى البعيدة طلعت معندهاش دم ولا كأنى عملت حاجة يعنى هو كان حوق فيها :mad:



ما خلاص يا جمالات يا اوختشي


البت غارت ... قصدى اتجوزت واتهنت


وكل العملية باظت ورا مجهودنا بلاش

:mad::mad::mad:

الدكتورة مها
24-11-2008, 04:16 PM
ههههههههههههههههههههه عشان تعرفوا انى الممول الاصيل والوحيد للعصابه بتاعتكم وتعرفوا انى مستعده اضحى حتى اخر سحتوت فى اموالى (يعنى ايه سحتوت)؟؟....:rolleyes::rolleyes:

ونعم التضحية

فعلا الكهربائي بيشكر فيكي جدا

بيقولى ان الخطة بعد ما اتغيرت

روحتي ونفضتيه واخدتي كل اللى معاه وروح بيتهم مشي :D:D:D

الدكتورة مها
24-11-2008, 04:20 PM
هههههههههههههههههههه


بجد مش لاقية كلام اقوله القصة روعة اواكتر من روعة دمها زى العسل وانا فرحانة قوى انك افتكرتينى

لاء وايه من جيل الرواد يعنى مش كومبرس وممكن الاقى ليا دور تانى ومن الناحية دى اطمنى انا معاك

يا ريس فى اى خرابات ...خناقات ....لبش ..فى اى منطقة فى العالم بس انت قشر ياجميل;););)
بس بلاش دور النمامة ده مش لايق على خاااااااالص

بالحق قبل ما انسى شوفتى البنت منى قالت عليكى ايه وانت غايبة هابقى اقولك بينى وبينك



هاتقوليلي عليكي؟

كل خناقات المنتديات محدش بيشعللها .... أحم أحم قصدى بيخلصها غير

بس مقولتليش

جمالات ... انا عرفاها

وياما بتقول عليا .... وكل كلمة بتوصلنى

قالت عليا ايه المرة دي؟

ღ بنـت الإســـلام ღ
24-11-2008, 04:20 PM
اعمل ايه بس يا اسماء؟

البت صعبت عليا خالص


وعنيها قالت كلام كبير أوى


وكمان مين عالم؟


مش يمكن لما تكون فاتحة خير على بنات العصابة كلها؟




اة يا مها يا اوختشي
عندك حق في كلامك دة
احنا نعمل الخير ونرمية البحر
علشان ربنا يكرمنا احنا كمان كدة
:D:D:D

الدكتورة مها
24-11-2008, 04:24 PM
روعه يادكتوره
بجد جميله كمليها بسرعه أرجوكي
حلقه جميله
أوحساسها دا جاه منين
بعدين البنت نهى لما حددت الموقع عشان ترميلها البوكيه
مش ضروري قصدها تصيبها يعني
يمكن تكون جت بالغلط

يا سلام على قلبك الطيب

جت غلط؟؟؟

طيب والفتحة التالتة الى فى مناخيري؟؟؟؟؟

وحمة دي والا حسنة طلعت لوحدها؟

نفسيته..عشان كده كل اما ييجي ياخد الزبالة من عندنا و كنت أعدي قدام الباب كان بيبصلي و بياخد نفس عميق و يصرخ بأعلى صوته


زباااااااااالاااااااااااااه

ههههههههههههههههههه
الله يخربيت كده
لما العزيز تذله الايام والليالي
اليوميات دي فعلا مش ممكن
ونقلها نشكر الدكتوره مها عليه لانك بصراحة اضفتي عليه تشويق رهيب

منور طبعا

وباذن الله هاتعجبك باقي الرواية

هههههههههههههههههههههههه
فوق الفظيع فوق الفظيع
بس لعلمك يا دكتورة
انا كان عيني على التورته
اول ما البت هند قالتلى تورته وكده
ماعرفتش امسك نفسي
رحت جرى على الفرح
بس اهى وقعت فى حضن نهى بقى
مكانش ليا نصيب فيها
ولعلمك
انا كنت بدى دروس لكمال الشاذل واصحابه بس انا اعتزلت دلوقتى وسبتلهم هما يكملوا

شكل اعضاء المنتدى هايشتركوا ويجيبولك عيش وحلاوة قريب

دة لو الحكم مخفف

الدكتورة مها
24-11-2008, 04:25 PM
اة يا مها يا اوختشي
عندك حق في كلامك دة
احنا نعمل الخير ونرمية البحر
علشان ربنا يكرمنا احنا كمان كدة
:D:D:D

دة كاس وداير على الكل

وادعي معايا اننا ندوق منه قريب

ولازم نعمل للمستقبل

عشان ربنا يسهل لينا

essaweat
24-11-2008, 09:30 PM
:rolleyes:انا خلصتها كده ولا ايه
انا شكلي مضحوك عليا
فين الباقي؟؟؟؟؟؟؟؟؟؟؟؟؟؟؟؟؟
احنا متفقناش عالتقسيط ده
حصل ايه لباقي العصابه :rolleyes::rolleyes::rolleyes::rolleyes::rolleyes::rolleyes:
اديني مستنييييييييييييييييييييييييييي

almazuona
28-11-2008, 11:27 AM
يادكتوره فت أسبوع انا مقعدتش فيه على النت
وميش حلقه جديده كده؟؟؟
أرجوك يادكتوره

tosoro
03-12-2008, 06:06 PM
يا جماعة فين الحلقات الجديدة

almazuona
04-12-2008, 02:25 PM
يادكتوره بليز فين الحلقه الجديده حموت بدون هالقصه

nour_flower
06-12-2008, 01:57 PM
طبعا جميله جدا ومضحكه أوووووووووووووووى
بس ممكن يحصل كده فى الحقيقه البنات تكون بضاعه تعرض فى كل مكان علشان خاطر الزواج
:):):):):):):):)

منمن
07-12-2008, 04:02 PM
ايه الحلاوه ديه تحفه جدا وكملى الباقى تقبلى مرورى

عاشق المنتدى
14-12-2008, 12:07 PM
رائعة و الاسلوب أكثر من رائع والسخرية مذهلة فى كتابة الموضوع
ننتظر البقية
شكرا لك

منى قمر
25-12-2008, 12:01 AM
الصراحه يا د مها مش حكدب عليكى
انا عمرى مافكرت اقرا القصة دى
ده كله علشان ماكنتش فاهمه اسمها وكنت اظنها قصة اجتماعيه كئيبة
وانا مش ناقصة كئابه اليومين دول
بس قلت اغامر واشوف مافيهاش بد
ووجدتها اكثر من رائعه
وابكتنى من كثرة الضحك
الا اننى ايضا وصلت الى مرحلة من الاكتئاب
وصعبة البنوته دى عليا قوى
يمكن علشان مريت ببعض الى هيه مرت بيه
وربنا مايوريكم مكروه فى عزيز لديكم
لكن تظل فى النهايه القصة اكثر من رائعة
ولعلمكم انا خفت منكم ومن عصابة المنتدى:rolleyes:
والله يكون فى عون نهى:D
وانتم ناسين ان كله سلف ودين ولا ايه:eek:

almazuona
25-12-2008, 12:37 PM
يادكتوره عايزين التكمله بليـــــــــــــز
حموت

الدكتورة مها
26-12-2008, 10:38 PM
:rolleyes:انا خلصتها كده ولا ايه
انا شكلي مضحوك عليا
فين الباقي؟؟؟؟؟؟؟؟؟؟؟؟؟؟؟؟؟
احنا متفقناش عالتقسيط ده
حصل ايه لباقي العصابه :rolleyes::rolleyes::rolleyes::rolleyes::rolleyes::rolleyes:
اديني مستنييييييييييييييييييييييييييي

اسفة للتاخير يا سكر

معلش نظام التقسيط هو اللى شغال اليومين دول

يادكتوره فت أسبوع انا مقعدتش فيه على النت
وميش حلقه جديده كده؟؟؟
أرجوك يادكتوره

حاضر يا المزيونة

اسفة والله وغصب عنى

يا جماعة فين الحلقات الجديدة

حاضر يا قمر

الدكتورة مها
26-12-2008, 10:41 PM
يادكتوره بليز فين الحلقه الجديده حموت بدون هالقصه

بعد الشر عنك يا قمر

المضووع قلب ادمان والا ايه؟
:rolleyes::rolleyes::rolleyes:


طبعا جميله جدا ومضحكه أوووووووووووووووى

بس ممكن يحصل كده فى الحقيقه البنات تكون بضاعه تعرض فى كل مكان علشان خاطر الزواج

:):):):):):):):)


طبعا يا نور ممكن يحصل

بس كل شيء قسمة ونصيب فى الاول والاخر


ايه الحلاوه ديه تحفه جدا وكملى الباقى تقبلى مرورى

نورتي يا منمن

رائعة و الاسلوب أكثر من رائع والسخرية مذهلة فى كتابة الموضوع
ننتظر البقية
شكرا لك

اهلا بيك يا محمد

الدكتورة مها
26-12-2008, 10:43 PM
الصراحه يا د مها مش حكدب عليكى

انا عمرى مافكرت اقرا القصة دى
ده كله علشان ماكنتش فاهمه اسمها وكنت اظنها قصة اجتماعيه كئيبة
وانا مش ناقصة كئابه اليومين دول
بس قلت اغامر واشوف مافيهاش بد
ووجدتها اكثر من رائعه
وابكتنى من كثرة الضحك
الا اننى ايضا وصلت الى مرحلة من الاكتئاب
وصعبة البنوته دى عليا قوى
يمكن علشان مريت ببعض الى هيه مرت بيه
وربنا مايوريكم مكروه فى عزيز لديكم
لكن تظل فى النهايه القصة اكثر من رائعة
ولعلمكم انا خفت منكم ومن عصابة المنتدى:rolleyes:
والله يكون فى عون نهى:D

وانتم ناسين ان كله سلف ودين ولا ايه:eek:


كلامك دة فرحني اوىىىىىىىىىى

وعلى فكرة

فى مضووع كدة فى بالي ناوية انفذه بعد ردك على المضووع

وباذن الله تنضمي للعصابة فى الجوازة الجاية


يادكتوره عايزين التكمله بليـــــــــــــز
حموت

من عيونييييييييييييييي

almazuona
28-12-2008, 03:37 PM
بصراحه يادكتوره هي فعلا انقلبت أدمان
شكرا لتلبية الطلب

الدكتورة مها
28-12-2008, 03:59 PM
والله يا المزيونة يا حبيبتي مفيش حلقة جديدة نزلت

طب اعمل ايه؟

ومقدرش على زعلك

عشان كدة فى موضووع مشابه لهذا الموضوع اسمه

عاوزة اتجوز ( فى نفس القسم هنا)

ودة مؤقتا لحد ما صاحبة الكتاب تنزل حلقات جديدة

Az_Bondok
29-12-2008, 01:05 AM
الف شكر يا دكتور
على الموضوع التحفه ده
سؤ حظى طبعا اللى خلانى اقراها متاخر كدهبس حقيقى الف شكر

Az_Bondok
30-12-2008, 12:37 AM
بس انا عندى كام تساؤل كده
وواحد استفسار

هو ده كان اخر جزء فى الكتاب؟؟؟ جواز البت نهى؟؟
طب ازاى؟
المفروض ينتهى بجواز البطله..والا كلنا هانتعقد

ايه رايك نالف جزء اسمه" واخيرا اتجوزت؟؟؟""

هاه؟؟ ايه رايك فى الفكيره دى؟؟

منى قمر
30-12-2008, 12:49 AM
وانا معاكى يا وزة والا فعلا كل البنات حتتعقد
واحنا مش ناقصين عقد كفاية الى عندنا
ههههههههه:D

Az_Bondok
30-12-2008, 01:15 AM
وانا معاكى يا وزة والا فعلا كل البنات حتتعقد

واحنا مش ناقصين عقد كفاية الى عندنا

ههههههههه:D


تمام اذن... موافقه
وموافقة مها تحصيل حاصل
اى كلام يعنى:D

almazuona
31-12-2008, 03:36 PM
والله يا المزيونة يا حبيبتي مفيش حلقة جديدة نزلت


طب اعمل ايه؟

ومقدرش على زعلك

عشان كدة فى موضووع مشابه لهذا الموضوع اسمه

عاوزة اتجوز ( فى نفس القسم هنا)


ودة مؤقتا لحد ما صاحبة الكتاب تنزل حلقات جديدة


متشكره بس واااااااااااااااااااااااااااااااااااااااااااااع
أول ماتنزل الحلقه ياريت تنزليها
لأني بجد حمووووت
عايزه أشوف البت دي عروسه

روميساء
06-01-2009, 01:59 AM
لا تعليق
بجد انتى مشكله مشكله
عمرى ماشفت واحده بخفت الدم والتلقائيه ديه فعلا تستحقين عن جداره لقب
بسمة المنتدى
روووووووووووووووووووووووووووووووووووووووووووووووووووووووووووووووووووووووووووووووووووووووووووووووووعه
فعلا اسمك بأه علامه مميزه على اى موضوع
ومستنييييين بقيت التكمله:):)

noorhan
13-01-2009, 02:03 PM
بجد تحفة و خفة دمك تجنن ملهاش حل

angel77
14-01-2009, 07:55 AM
الله ايه الجمال دا ، كتبتيها نقلتيها مليش دعوة دا انا فقعت من الضحك اليومين دول ، بجد تسلم ايديك يا دكتورة مها ، بس رجائي انك تكمليها دا انا بستنى باقي القصة بفارغ الصبر ، انشالله يكون عرسك هوا اللي جاي وبرضك تشوفي شقاوة عصابة المنتدى وحنيتهم عليك.


:smoke1::nosweat::smoke1::nosweat:

noorhan
15-01-2009, 12:54 PM
بجد خفة دم مش ممكن
و اهى بتصبرنا على الهم اللى احنا فيه
ربنا يفك هم كل مكروب

بلادونا الشرق
07-02-2009, 12:16 AM
اه فكرتنى بقصص انا عايزة اتجوز بتاع الدكتورة غادة عبد العال
شكرررررررررررررررررررررا على الموضوع

حازم إمام
08-02-2009, 06:15 AM
قصة جميلة جداً يا دكتورة وآسف إني اتأخرت في الرد
تقبلي مروري
يا مبدعة المنتدى

a7mad
08-02-2009, 06:58 AM
الباقى بسرعة عشان نهضم مرة واحدة
و اكيد كالعادة المملة لازم اقول شكرا انا و اللة عايز اقترح ان الى يقول شكرا ينطرض و لو كانت بالنحوى

موءة
24-04-2009, 09:53 PM
ههههههههه
جميلة قوى
بس لا حياة مع الامل
الياس هو الى ماشى مع الحياة
:harhar1::harhar1::harhar1::harhar1::harhar1::harhar1::harhar1::harhar1::harhar1:

ياسين ياسين
30-04-2009, 01:26 AM
:happy::happy::happy:ههههههههههههههههههههههههههههههههههههههههههههههههه
ههههههههههههههههه جميلة جميلة
جدااااااااااا شكرا لك يا د/مها:happy::happy::happy:

مرفت
04-05-2009, 08:11 PM
امر يضحك وامر يبكى:evil_lol::evil_lol::evil_lol::evil_lol:

tatfat
27-06-2009, 10:14 AM
شكرا لك يا مها على الرواية الجميلة دى صحيح الرد متاخر بس انا قراتها اليوم كلها شفتى انا نفسى مستغرب:happy::happy::happy:بس الاسلوب جميل وياريت تكملى هى البنت مش حتتجوز ولا مستنيه ادهم صبرى يخطفها على توك توك ابيض:bleh::bleh::bleh:

.. فجر الإسلام ..
27-06-2009, 12:34 PM
جميلة اوى اوى اوى يا مها بجد روعة وتحفة انا كمان مبطلتش ضحك كمليها بقه

Egyptian Engine
09-07-2009, 11:21 AM
Rely very very funny My friends at work asking my why I am laughing too much but I can't explain to them & they can't read Arabic
very nice Dr Maha

jess
18-07-2009, 02:34 PM
الرواية اكثر من رائعة فعلا كل موضوعاتك مميرة مثلك يا بسمة المنتدى

رفيقه الدرب
13-01-2010, 10:59 PM
تسلمى عالموضوع الجامد

منى البنا
20-06-2010, 11:32 AM
فييييييييييييييييييييييين البااااااااااااااااااااااااااااااااااقى اصوووووووووووووووووووط كل ما ادخل رواية واوصل للصفحات الاخيرة اجدها غير كامه وبعدين بقى يعنى الروايه دى اتكتبت فى 2008 واحنا فى 2010 ولسه مش كملت دة اسمه كلالالالالالالالالالالالالالام

sasaelhadary
30-06-2010, 04:48 PM
هاى دى اول مشاركه ليه فى النتدى
بجد تجننننننننننننننننننن ومستنيه الباقى:icon30::icon30::icon30::icon30:

salahmed
30-06-2010, 05:30 PM
قصة طريفة جدا

شكرا جزيلا:icon30::icon30::icon30::icon30:

مون مون
11-07-2010, 10:17 PM
د/مها
بدايةً أود أ أشكرِك على هذا النقل الرائع:rewayat235:
والذى يعكس للأسف واقعاً مريراً نعيشه هذه الأيام
ألا وهى ظاهرة العنوسة التى إنتشرت فى مجتمعنا
ورجاءً إذا كانت هناك أجزاء أخرى لهذه اليوميات فلا تتأخرى فى نزولها
:rewayat239::rewayat239::rewayat239:

الدكتورة مها
11-07-2010, 10:52 PM
من عيوني الاتنين


ادوني بس يومين

وهاضيفهالكم ان شاء الله كاملة


منورين يا شباب